1. (a) Kisa Bib-la té di ki té kay fèt an dènyé tan-an? (b) Kisa sa ka moutwé a klè?

 JÒDI JOU bagay an latè-a byen mové. Pou ègzanp, fanmi pa ni lanmityé pou yonn a lòt kon avan. Moun pli vyolan, èk yo ka gadé pou kò yo tousèl. Èk osi, an chay moun ka twouvéʼy difisil pou konfyé moun an lotowité. Lè ou wè bagay konsa, ès i difisil pou kwè bagay kay vini pli mèyè? Pitèt. Mé an menm di tan-an, sé mové bagay-la ki ka fèt-la sipozé bati konfyans ou. Pouki nou sa di sa? Sé paski sé bagay sala ki ka fèt-la, sé ègzaktiman sa Bib-la té ja di ki té kay fèt asou dènyé tan-an. (2 Tim. 3:1-5) Alò, sa ka moutwé nou a klè, Jézi ja koumansé kondwi kon wa an Wéyòm Bondyé. Mé la ni plizyé lòt pwofèsi ki ni pou fè épi Wéyòm Bondyé. Konsa, i kay bon pou nou gadé lòt pwofèsi ki té fèt déotwa lanné ki pasé èk sa kay fòtifyé lafwa nou.

2. Kisa nou kay konsidiwé an atik sala? Èk kisa sa kay édé nou wè? (Bay an wimak asou pòtwé-a ki asou kouvèti-a.)

² An atik sala, nou kay diskité twa bagay, (1) an pwofèsi ki ka moutwé ki lè Wéyòm Bondyé koumansé kondwi, (2) pwofèsi ki ka moutwé Jézi ka kondwi kon Wa an Wéyòm Bondyé, èk (3) pwofèsi ki ka moutwé mannyè Wéyòm Bondyé kay détwi tout sé lèlmiʼy-la. Èk nou kay wè, lè nou mété tout sé pwofèsi sala ansanm, i a klè nou ka vwéman viv an bout dènyé tan-an.

3. Ki asiwans pwofèsi-a an Dannyèl 7:13, 14 ka ban nou?

³ La ni an bèl pwofèsi an Dannyèl 7:13, 14 ki ka ban nou asiwans-lan ki, Jézi sé pli mèyè Wa-a pou Wéyòm Bondyé. Èk la pa kay ni pyès Kondwitè apwéʼy, paski pyèsonn pa kay détwi Wéyòm li. San dout, i kay an plézi pou moun an tout nasyon sèviʼy. Osi, an lòt pwofèsi an liv Dannyèl ka moutwé ki, Jézi té kay koumansé kondwi an Wéyòm-lan an bout sèt tan-an. Kanmenm, ès i posib pou nou konnèt ki lè Jézi té vini Wa?

4. Ki mannyè Dannyèl 4:10-17 ka édé nou pou konnèt ki lanné Jézi té kay vini Wa? (Gadé nòt-la an bout paj-la osi.)

⁴ Li Dannyèl 4:10-17. ‘Sèt tan-anʼ ki mansyonnen an pwofèsi Dannyèl, ka wépwézanté dé mil senk san ven (2,520) lanné. Sèt tan-an té koumansé an lanné sis san sèt (607) avan lépòk nou. Sa sé lanné-a lè jan Babilonn té tiwé dènyé wa-a pou kondwi asou twòn Jéhova an Jérouzalèm. Sèt tan-an bout an lanné mil nèf san katòz (1914) an lépòk nou, lè Jéhova mété moun-lan ki té ni dwa-a pou kondwi, sa sé Jézi Kwi, kon Wa an Wéyòm li. *—Izik. 21:25-27.

5. Ki bennéfis nou sa twapé lè nou konpwann pwofèsi-a konsèné ‘sèt tan-anʼ?

⁵ Ki bennéfis nou sa twapé lè nou konpwann pwofèsi-a konsèné ‘sèt tan-anʼ? Lè nou konpwann pwofèsi-a konsèné ‘sèt tan-an,ʼ sa kay ban nou asiwans-lan ki, Jéhova kay fè tout sa i pwonmèt pou fè alè. Menm kon Jéhova té bay an lè pou Jézi vini Wa, èk sa fèt vwé, an menm mannyè-a tout sé pwofèsi-a kay fèt vwé a lè-a Jéhova désidé. Wi, jou Jéhova ‘pa kay anwitaʼ!—Hab. 2:3.

6. (a) Kisa nou ka wè ki ka fèt asou latè-a ki ka moutwé Jézi ka kondwi kon Wa an Wéyòm Bondyé? (b) Ki mannyè Wévélasyon 6:2-8 ka moutwé Jézi ja ka kondwi kon Wa?

⁶ Pa twò lonng avan Jézi mò, i té di sé disip li-a sèten bagay ki té kay fèt, ki té kay fè yo sav, i ja koumansé kondwi kon Wa an syèl. Anpami sé bagay-la Jézi té mansyonnen, sé ladjè, lafen, èk twanblanntè. Osi, i té di yo la té kay ni tout sòt kalité maladi “adan an chay koté”. Èk yon ègzanp an sé maladi sala, sé viròs COVID-la ki owon latè-a. Alò, tout sé bagay-la ki ka fèt-la ka moutwé Jézi ka kondwi kon Wa. (Maf. 24:3, 7; Louk 21:7, 10, 11) Pli pasé swasant (60) lanné apwé Jézi mò, èk viwé an syèl, i bay zapòt Jan asiwans-lan ki, sé bagay sala té kay fèt. (Li Wévélasyon 6:2-8.) Èk tout sé bagay sala ja fèt dépi Jézi koumansé kondwi kon Wa an lanné mil nèf san katòz (1914).

7. Pouki kondisyon asou latè-a ja vini si tèlman mové dépi Jézi koumansé kondwi kon Wa?

⁷ Pouki kondisyon asou latè-a ja vini si tèlman mové dépi Jézi koumansé kondwi kon Wa? Wézon-an bagay vini tèlman mové asou latè-a sé paski Wévélasyon 6:2 di nou, pwèmyé bagay-la Jézi té fè lèʼy koumansé kondwi kon Wa, sé goumen an ladjè kont Satan èk sé zèlèv li-a. Silon Wévélasyon chapit 12, Satan èk sé zèlèv li-a pèd batay sala, èk Jézi jété yo désann asou latè-a. Alò, Satan anwajé èk dépi i désann asou latè sala i ka pasé waj li asou lézòm. Èk sé pou wézon sala, bagay tèlman “téwib an latè-a.”—Wév. 12:7-12.

8. Lè nou wè pwofèsi ki an Bib-la konsèné Wéyòm-lan ka fèt vwé, ki mannyè sa ka wédé nou?

⁸ Ki bennéfis nou sa twapé kon nou ka wè sé pwofèsi sala ka fèt? Sé mové bagay-la ki ka fèt an latè-a, èk sé chanjman-an nou ka wè an atitid moun ka moutwé nou ki, Jézi ka kondwi kon Wa. Alò, pito nou lévé faché lè nou wè mannyè moun méchan èk yo ka gadé pou kò yo tousèl, sé pou nou toujou chonjé aksyon yo ka moutwé pwofèsi Bib ka fèt vwé. Wi, Wéyòm-lan ka kondwi! (Sam 37:1) Èk kon bout sistèm-lan ka vini pli pwé, nou sa èspéwé bagay asou latè-a kay vini pli mové. (Mak 13:8; 2 Tim. 3:13) Nou ka wimèsyé Jéhova paski i ka édé nou konpwann wézon-an nou ni si tèlman twaka asou latè-a jòdi.

9. Kisa Dannyèl 2:28, 31-35 ka di nou konsèné dènyé gouvèdman-an? Èk ki lè gouvèdman sala koumansé kondwi?

⁹ Li Dannyèl 2:28, 31-35. Nou ka wè pwofèsi sala ka fèt vwé jòdi jou. Nèbyoukadnéza té ni an wèv, èk wèv sala té ka moutwé sa ki té kay fèt an ‘sé dènyé jou-aʼ apwé Jézi koumansé kondwi kon Wa. Anfen, Bib-la té di, lè Jézi koumansé kondwi kon Wa, i té kay ni an chay lèlmi. Anpami sé lèlmi sala sé dènyé gouvèdman-an ki ni pli pouvwa ki kay kondwi an latè-a. An liv Dannyèl, dé pyé-a an imaj-la ki fèt èk ‘fè épi tè gwaʼ ka wépwézanté gouvèdman sala. Gouvèdman sala ja ka kondwi. I koumansé kondwi diwan pwèmyé gwo ladjè-a, lè Langlitè èk Lanméwik mété tèt yo ansanm pou fòmé yon gouvèdman. An annglé nou ka kwiyé gouvèdman sala, ‘Anglo-American World Powerʼ. Wèv-la Nèbyoukadnéza té ni té moutwé la té kay ni dé bagay konsèné gouvèdman sala ki té kay diféwan hòd sé lézòt gouvèdman-an ki mansyonnen an imaj-la.

10. (a) Kisa pwofèsi Dannyèl té di èk nou ka wè ka fèt vwé an sé plas-la gouvèdman ‘Anglo-Americanʼ-lan ka kondwi? (b) Kisa nou pa vlé fè? (Gadé bwèt-la “ Pwan Pokosyon Épi Tè Gwa-a!”)

¹⁰ Pwèmyéman, yo sèvi métal ki wèd kon lò ében dajan pou wépwézanté sé gouvèdman-an an imaj-la. Mé an imaj-la, sé fè èk tè gwa ki mélanjé ansanm ki ka wépwézanté gouvèdman ‘Anglo-Americanʼ-lan. Tè gwa-a ka wépwézanté ‘sé jan latè-aʼ. (Dann. 2:43, ftn.) Jòdi jou, nou ka wè enflouwans moun lè yo ka voté èk lè yo ka pwotèsté pou diféwan bagay. Yo ka jis fòmé ti ògannizasyon pou goumen pou dwa yo. Èk tout sa ka fèʼy difisil pou gouvèdman ‘Anglo-Americanʼ-lan akonpli sa yo vlé fè.

11. Paski gouvèdman ‘Anglo-Americanʼ-lan ka kondwi apwézan, koumannyè sa ka fòtifyé lafwaʼw ki, nou ka viv an dènyé tan-an?

¹¹ Dézyenman, pyé imaj-la ka wépwézanté gouvèdman ‘Anglo-Americanʼ-lan. Konsa, gouvèdman sala sé dènyé gouvèdman-an an pwofèsi sala. Èk la pa kay ni pyès lòt gouvèdman lézòm apwé gouvèdman sala. Pito, Wéyòm Bondyé kay détwi gouvèdman ‘Anglo-Americanʼ-lan èk tout lòt gouvèdman lézòm diwan Anmagèdonn. *—Wév. 16:13, 14, 16; 19:19, 20.

12. Ki pwèv èk èspwa pwofèsi Dannyèl ka ban nou?

¹² Ki bennéfis nou sa twapé hòd pwofèsi Dannyèl? Pwofèsi sala ka ban nou lòt pwèv ki, nou ka viv an dènyé tan-an. Anho dé mil senk san (2,500) lanné ki pasé, pwofèt Dannyèl té ékwi konsèné kat (4) gouvèdman ki té kay kondwi pèp Bondyé apwé gouvèdman Babilonn. Apa di sa, i di gouvèdman ‘Anglo-Americanʼ-lan té kay dènyé gouvèdman-an an sé gouvèdman sala. Konsa, pwofèsi sala ka konsolé nou, èk i ban nou èspwa ki, toutalè Wéyòm Bondyé kay détwi tout sé gouvèdman lézòm-lan ki asou latè-a, èk Wéyòm li kay kondwi latè-a.—Dann. 2:44.

13. (a) An Wévélasyon 17:9-12, kisa “ywityenm wa-a” èk “dis wa”-a ka wépwézanté? (b) Ki mannyè pwofèsi sala ja fèt?

¹³ Li Wévélasyon 17:9-12. Pwèmyé gwo ladjè-a té annékòz an chay donmaj. Èk kéchòy fèt èk sa moutwé nou ka viv an dènyé tan-an. Èk diwan tan sala, sé kondwitè latè-a té vlé mennen lapé asou latè-a. Konsa, an mwa Janvyé lanné mil nèf san ven (1920), yo koumansé yon ògannizasyon yo ka kwiyé ‘The League of Nationsʼ, an annglé. Mé an mwa Òktòb lanné mil nèf san kawant senk (1945), Nasyon Ini waplasé ògannizasyon sala. Liv Wévélasyon ka kwiyé ògannizasyon sala, “ywityenm wa-a”. Mé, i pa ka wépwézanté pyès sé gouvèdman-an ki an imaj-la an pwofèsi Dannyèl. Konsa, Nasyon Ini, ében “ywityenm wa-a” pa ni an chay pouvwa paski i ka twapé pouvwaʼy hòd sé gouvèdman-an ki ka sipòtéʼy-la. Bib-la ka kwiyé sé gouvèdman sala, “dis wa”.

14-15. (a) Kisa Wévélasyon 17:3-5 ka di konsèné “Gwan vil Babilonn-an”? (b) Jòdi jou, kisa ki ka fèt épi sé moun-lan ki ka sipòté fo wilizyon?

¹⁴ Li Wévélasyon 17:3-5. Bondyé té bay zapòt Jan an vizyon. Èk an vizyon sala, i té wè an fanm vyé lavi. Non fanm sala sété “Gwan vil Babilonn-an,” èk i ka wépwézanté tout fo wilizyon. Ès vizyon sala ka jwenn akonpli? Wi, paski pou plizyè mil lanné fo wilizyon ja twavay ansanm épi sé gouvèdman latè-a èk i ja ba yo an chay sipò. Kanmenm, touswit, Jéhova kay mété katjil-la an tjè sé gouvèdman-an pou fè sa “i té ja ni plan pou fè dépi lontan”. Èk kisa ki kay wézilta-a? Sé gouvèdman-an, “dis wa”-a, yo kay tounen kont fo wilizyon épi yo kay détwi yo.—Wèv. 17:1, 2, 16, 17.

¹⁵ Ki mannyè nou sav Gwan vil Babilonn-an kay détwi touswit? Pou édé nou wéponn kwèsyon sala, i kay bon pou nou chonjé sa ki té ka pwotéjé vil Babilonn an tan lontan. Sété dlo Lawivyè Youfrétis-la. An menm mannyè-a, liv Wévélasyon ka konpawé sé milyon di moun-la ki ka sipòté Gwan vil Babilonn-an menm kon “dlo” sala. (Wév. 17:15) Mé menm kon sa ki té fèt an tan lontan, pwofèsi-a ka di nou, ‘dlo-a kay chéchéʼ. Sa vlé di fo wilizyon kay pèd sé moun-lan ki ka sipòtéʼy. (Wév. 16:12) Èk sa ka fèt vwé jòdi jou. An chay moun ja pèd konfyans an wilizyon, èk yo ka gadé lòt koté pou solousyon pou sé pwoblenm yo-a.

16. Ki bennéfis nou kay twapé lè nou konpwann sé pwofèsi-a konsèné lè Nasyon Ini té fòmé, èk lè gwan vil Babilonn-an kay détwi?

¹⁶ Ki mannyè sé pwofèsi sala sa édé nou? Tjenn an lidé, sé gouvèdman latè-a ja fòmé Nasyon Ini. Èk nou ka wè, an chay moun ja pèd konfyans an wilizyon. Tout sa ka moutwé a klè nou ka viv an dènyé tan-an. Magwé an chay moun ka pèd konfyans an wilizyon, sé pa sa ki kay détwi fo wilizyon. Kon nou ja mansyonnen, sé Jéhova ki kay météʼy an tjè sé “dis wa”-a, sa vlé di, sé gouvèdman-an ki ka sipòté Nasyon Ini-a, pou “yo fè sa i té ja ni plan pou fè dépi lontan”. Fo wilizyon kay détwi si tèlman vit, moun an latè-a kay sipwi. * (Wév. 18:8-10) Lè fo wilizyon détwi, sa kay afèkté latè-a adan an mannyè ki téwib. Sa kay annékòz an chay soufwans. Mé pèp Bondyé kay ni dé wézon pou yo sa wéjwi. Pwèmyéman, fo wilizyon, gwan lèlmi Jéhova, pa kay la ankò. Èk dézyenman, touswit Bondyé kay délivwé nou hòd mové latè sala!—Louk 21:28.

17-18. (a) Kisa nou sa fè pou kontiné fòtifyé lafwa nou? (b) Kisa nou kay diskité an lòt atik-la?

¹⁷ Pwofèt Dannyèl té ja di, an dènyé tan-an la té ‘kay ni nòlaj ki vwé alabondansʼ. Èk sa ka fèt menm kon Dannyèl té di, paski jòdi jou nou ka konpwann sé pwofèsi sala pli mèyè. (Dann. 12:4, 9, 10) Èk sé pwofèsi sala tèlman aplon, yo ka fòtifyé lafwa nou an Jéhova, èk an Pawòl li. (Izay. 46:10; 55:11) Konsa, kontiné fòtifyé lafwaʼw. Ki mannyè ou sa fè sa? Ou sa fè sa lèʼw étidyé Pawòl Bondyé, èk lèʼw édé lézòt moun dévlopé an bon wilasyon épi Jéhova. Wi, nou sa ni konfyans-lan ki, Jéhova kay pwotéjé tout moun ki ka apiyé asouʼy, èk i kay ba yo ‘lapé san boutʼ.—Izay. 26:3.

¹⁸ An lòt atik-la, nou kay diskité pwofèsi ki ni pou fè épi kongwigasyon Kwityen. Kon nou kay apwann, sé pwofèsi sala ka moutwé nou ka viv an dènyé tan-an. Nou kay osi gadé èvidans ki kay moutwé, Wa nou, Jézi, ka diwèkté sèvant Bondyé jòdi.