1. Kisa ki sa fè nou pè?

 ANNOU konsidiwé déotwa èspéyans. Nestor épi madanm li María, té vlé wann sèvis koté ki té bizwen pli pwoklanmatè. b Pou fè sa, yo té bizwen apwann mannyè pou dépansé mwens lajan. Mé yo té pè yo pa té kay ni djèwté si yo té ni pou viv asou mwens lajan. Osi nou ni èspéyans Biniam, i vini an Témwen Jéhova adan an péyi koté yo té ka opozé lavéwité-a. Konsa i wéyalizé ki, kon an Témwen Jéhova yo té kay pèsikité’y. Èk sa té fè’y pè. Mé i té pli pè sa fanmi’y té kay fè lè yo apwann i adan an wilizyon ki nèf. Èk nou ni èspéyans Valérie. Dòktè-a té di Valérie i té ni an mové kalité kansè. Diwan tan sala i té difisil pou’y jwenn an dòktè ki té kay fè’y lopowasyon-an san’y sèvi san. Alò, i té pè i té kay mò.

2. Pouki nou ni pou twavay wèd pou ganyen a bout pèwèz nou?

² Ès ou ja ni pèwèz konsa? An chay di nou ja ni pèwèz konsa. Mé si nou pa kontwolé pèwèz nou, nou kay fè mové disizyon ki sa afébli wilasyon nou épi Jéhova. Èvèk sé sa Satan vlé. Osi i kay éséyé sèvi pèwèz nou ni pou fè nou dézobéyi lwa Jéhova, tèl kon konmand-la pou pwéché bon nouvèl-la. (Wévé. 12:17) Satan méchan, èk i ni an chay fòs. Mé ou sa pwotéjé kò’w. Ki mannyè?

3. Kisa ki kay édé nou ganyen a bout pèwèz nou?

³ Lè nou asiwé Jéhova enmen nou, èk i ka sipòté nou, Satan pa kay fè nou pè. (Sam 118:6) Pou ègzanp, moun-lan ki té ékwi Sam 118 té èspéyansé an chay sitiwasyon ki té difisil. I té ni an pil lèlmi, la té jis ni moun an gwo pozisyon ki té lèlmi’y (vèwsé 9, 10). Délè, i té anba an pil tèt cho (vèwsé 13). Èk osi Jéhova té kowijé’y (vèwsé 18). Kanmenm, moun-lan ki té ékwi Sam 118 té chanté: “Mwen pa kay pè.” Kisa ki té fè’y santi tèlman sòv? I té sav magwé Jéhova té kowijé’y, Papa’y Jéhova té enmen’y an pil. Osi, i té asiwé népòt sitiwasyon i té adan, Papa’y ki ni an pil lanmityé té kay toujou édé’y.—Sam 118:29.

4. Si nou ni konfyans-lan ki Jéhova enmen nou, ki pèwèz nou sa ganyen a bout?

⁴ Nou bizwen ni asiwans-lan ki Jéhova enmen nou. Si nou ni asiwans sala, sa kay édé nou ganyen a bout sé twa (3) pèwèz sala: (1) pèwèz-la ki ou pa sa potjiwé bay fanmi’w, (2) pèwèz lézòm, èk (3) pèwèz lanmò. Sé fwè èk sè-a nou té palé konsèné an pawagwaf yonn té sa ganyen a bout pèwèz yo, paski yo té ni asiwans-lan ki Jéhova enmen yo.

5. Kisa ki sa fè an tèt fanmi santi antjèt? (Gadé pòtwé-a ki asou kouvèti Gad-la.)

⁵ An tèt fanmi ka pwan wèskonsabilité’y pou potjiwé bay fanmi’y byen sèwiyé. (1 Tim. 5:8) Si ou sé an tèt fanmi, pitèt diwan COVID 19 pandemic-la ou té pè ou té kay pèd twavay ou. Pitèt ou té antjèt ou pa té kay sa potjiwé manjé ében an plas pou fanmi’w wèsté. Osi, pitèt ou té pè si’w té pèd twavay ou, ou pa té kay sa twapé an lòt twavay. Ében pitèt kon Nestor épi María, ou té kwè ou pa té sa viv asou mwens lajan. Malèwèzman Satan ja fè an chay moun doubout sèvi Jéhova paski yo té ni sé pèwèz sala.

6. Kisa Satan ka éséyé pou fè nou kwè?

⁶ Satan ka éséyé pou fè nou kwè Jéhova pa enmen nou, èk i pa kay édé nou pou potjiwé bay fanmi nou. A kòz di sa, nou pé katjilé nou ni pou fè tout sa nou pé pou tjenn twavay nou. Nou pé jis fè an disizyon ki sa afébli wilasyon nou épi Jéhova.

7. Ki asiwans Jézi ka ban nou?

⁷ Jézi ki konnèt Jéhova pli mèyè pasé nou tout, ban nou asiwans-lan ki Jéhova “konnèt tout sa [nou] bizwen avan [nou] mandéʼy”. (Maf. 6:8) Èk Jézi konnèt ki Jéhova toujou pawé pou potjiwé sa nou bizwen. Kon Kwityen, nou an fanmi Jéhova. Konsa Jéhova sé tèt fanmi-an, èk nou ni asiwans-lan ki, i kay fè menm sa i di tout tèt fanmi pou fè an 1 Timòfi 5:8.

8. (a) Kisa ki kay édé nou ganyen a bout pèwèz-la ki, nou pa sa potjiwé ban fanmi nou? (Mafyou 6:31-33) (b) Fwè-a èk sè-a ki an pòtwé-a ka mennen manjé ba yon sésé. Ki mannyè nou sa fè menm kon yo?

⁸ Lè nou ni asiwans-lan ki Jéhova enmen nou èk i enmen fanmi nou, nou kay asiwé i kay ban nou sa nou bizwen. (Li Mafyou 6:31-33.) Jéhova vlé potjiwé ban nou, nou sav sa paski i plen lanmityé, èk i Donnan! Lè Jéhova fè latè-a, i ban nou pli pasé sa nou té bizwen pou viv. I plen latè-a épi bagay pou nou sa enjwi. (Jen. 2:9) Délè nou pa ka ni djè, mé nou ni pou chonjé Jéhova ka toujou potjiwé ban nou. (Maf. 6:11) Osi nou ni pou chonjé, népòt sa Jéhova ban nou apwézan èk an tan pou vini, pli valowab pasé népòt sakwifis nou fè. Sé sa Nestor èk María té wéyalizé.​—Izay. 65:21, 22.

9. Kisa ou sa apwann an ègzanp Nestor èk María?

⁹ Nestor èk María té ni an bèl kay èk bon twavay an Kòlonmbiya. Yo di: “Nou té vlé vann adan bagay nou té ni pou fè plis an sèvis Jéhova, mé, nou té pè nou pa té kay ni djèwté paski nou té ni pou viv asou mwens lajan.” Kisa ki té édé yo ganyen a bout pèwèz yo? Yo katjilé konsèné sé diféwan mannyè-a Jéhova té moutwé yo i enmen yo. Konsa yo té ni asiwans-lan ki, Jéhova té kay otjipé yo si yo té kité twavay yo. Konsa yo vann kay yo èk yo alé adan an lòt koté an Kòlonmbiya ki té bizwen pli pwoklanmatè. Ki mannyè yo té santi konsèné disizyon yo? Nestor di: “Nou vwéman wè sa Mafyou 6:33 ka di. Nou pa janmen mantjé anyen. Épi apwézan nou ka viv an lavi ki plen lakontantman.”

10. Pouki i pa ka sipwi nou lézòm pè yonn a lòt?

¹⁰ Dépi Adanm èk Èv wébèl kont Jéhova, lézòm ka maltwété yonn a lòt. (Éklé. 8:9) Pou ègzanp, moun ka sèvi pouvwa yo pou maltwété lézòt, moun vyolan, manmay an lékòl ka ensilté èk mennasé lòt manmay, èk adan moun ka maltwété fanmi yo. Konsa i pa ka sipwi nou pou wè lézòm pè yonn a lòt! Ki mannyè Satan ka éséyé sèvi pèwèz lézòm kont nou?

11-12. Ki mannyè Satan ka sèvi pèwèz lézòm kont nou?

¹¹ Satan vlé nou pè moun pou nou doubout pwéché, ében pou nou doubout fè sé lézòt bagay-la Jéhova di nou pou fè. Konsa, Satan ka enflouwansé sé gouvèdman-an pou bann twavay nou, èk pou pèsikité nou. (Louk 21:12; Wévé. 2:10) An latè Satan an chay moun ka simen mansonj konsèné Témwen Jéhova. A kòz di sa, moun ki kwè sé mansonj sala ka pwan nou sèvi wizib ében yo ka jis bat nou. (Maf. 10:36) Ès sé bagay sala ka sipwi nou? Awa! Paski Satan té sèvi sé menm bagay sala an pwèmyé syèk-la.​—Twav. 5:27, 28, 40.

¹² Òpozisyon hòd gouvèdman sé pa sèl bagay-la Satan ka sèvi pou fè nou pè. Adan moun ka pè, paski yo pa sav sa fanmi yo kay fè ében di lè yo vini Témwen Jéhova. Adan di yo ka pli pè fanmi yo tounen kont yo pasé pou moun bat yo. Yo enmen fanmi yo an chay, èk yo vlé fanmi yo vini konnèt Jéhova èk enmen’y osi. Konsa i ka fè yo lapenn lè fanmi yo pa ka moutwé wèspé pou Jéhova, èk pèp li. Kanmenm, manm fanmi ki pa kontan Témwen Jéhova ka vini Témwen Jéhova délè. Mé, si fanmi’w pa vlé ni anyen pou fè épi’w paski ou vini an Témwen Jéhova, kisa ou kay fè?

13. Si nou ni konfyans-lan Jéhova enmen nou, ki mannyè sa kay édé nou si fanmi nou widjèkté nou? (Sam 27:10)

¹³ Nou sa pwan kouwaj an Sam 27:10. (Li’y.) Menm si fanmi nou widjèkté nou, lè nou chonjé mannyè Jéhova enmen nou, nou pa kay pè. Èk nou kay ni konfyans-lan ki, si nou andiwé, Jéhova kay wékonpansé nou, èk ban nou tout sa nou bizwen pou viv. Osi, i kay édé nou pou viv an lavi ki ni lapé épi djèwté, èk sa kay édé nou pou wèsté pwé’y. Sé sa Biniam té èspéyansé.

14. Kisa ou sa apwann an èspéyans Biniam?

¹⁴ Biniam té vini an Témwen Jéhova menm si i té sav gouvèdman-an ka pèsikité sé Témwen-an an péyi’y. Paski Biniam té sav Jéhova enmen’y sa té édé’y ganyen a bout pèwèz lézòm. Biniam di: “Pèsikasyon-an té pli mové pasé mwen té kwè. Mé, sa mwen té pli pè pasé pèsikasyon-an, sété òpozisyon hòd fanmi mwen. Mwen té pè, paski disizyon mwen pou vini an Témwen Jéhova té kay dézapwenté papa mwen ki pa té an Témwen. Mwen té osi pè fanmi mwen pa té kay wèspèkté mwen ankò.” Kanmenm, Biniam té asiwé Jéhova ka toujou otjipé sé moun-lan i enmen-an. Biniam di: “Mwen katjilé asou mannyè Jéhova té ja édé fwè èk sè lè yo pa té ni lajan, lè yo té èspéyansé enjistis, èvèk lè moun té vlé bat yo. Konsa, mwen té sav si mwen té wèsté fidèl pou Jéhova, i té kay benni mwen. Yo awété mwen plizyè fwa èk yo jis fè mwen kwiyoté. Mé, mwen wè pou kò mwen, Jéhova toujou la pou édé nou si nou wèsté fidèl pou li.” Jéhova vwéman té vini an Papa pou Biniam, èk pèp Jéhova té vwéman vini fanmi’y.

15. Pouki nou pè lanmò?

¹⁵ Bib-la di, lanmò sé an lèlmi. (1 Kòr. 15:25, 26) Délè lè nou katjilé konsèné lanmò sa ka fè nou pè, sitou si nou ében an moun nou enmen byen malad. Mé pouki nou pè lanmò? Paski Jéhova fè nou épi dézi-a pou enjwi lavi pou tout tan. (Éklé. 3:11) Délè lè nou pè lanmò, sa pé édé nou pou pwotéjé lavi nou. Pou ègzanp, sa sa édé nou fè bon disizyon konsèné sa nou ka manjé, konsèné lézèksis, pou alé oti dòktè èk pou pwan wimèd lè’y nésésè. Èk osi, pou nou pa mété lavi nou an danjé.

16. Paski Satan sav nou pa vlé mò, ki mannyè i ka sèvi sa kont nou?

¹⁶ Satan sav nou enmen lavi nou. I jis di, nou kay bay tout sa nou ni pou sové lavi nou, jis wilasyon nou épi Jéhova. (Jòb 2:4, 5) Satan sé an vyé mantè! Mé, paski Satan sav nou pè lanmò, èk i ni “pouvwa anlè lanmò”, i ka sèvi lanmò pou fè nou abandonnen Jéhova. Délè moun ki anba kondwit Satan ka di, yo kay tjwé nou si nou pa doubout sèvi Jéhova. (Hib. 2:14, 15) Délè, Satan ka sèvi maladi pou fè nou kasé lwa Jéhova. Dòktè ében fanmi nou ki pa Témwen Jéhova pé ban nou chalè pou pwan san, èk sa pé fè nou kasé lwa Jéhova. Osi, an moun pé ankouwajé nou pou pwan twètman ki pa an ling épi pwensip Bib.

17. Silon Ronm 8:37-39, pouki nou pa sipozé pè lanmò?

¹⁷ Magwé nou pa vlé mò, nou asiwé Jéhova pa kay doubout enmen nou si nou mò. (Li Ronm 8:37-39.) Lè moun ki enmen Jéhova mò, i ka tjenn yo an menmwa’y, konmsi yo vivan. (Louk 20:37, 38) Pa dé anvi Jéhova anvi pou ba moun ki mò lavi ankò. (Jòb 14:15) Jéhova ja péyé an gwo pwi pou nou sa “ni lavi étonnèl”. (Jan 3:16) Konsa nou sav Jéhova enmen nou an chay, épi i mélé épi nou. Alò, pito nou doubout sèvi Jéhova lè nou malad, ében lè moun vlé tjwé nou, nou vlé apiyé asou Jéhova pou konsolé nou, pou ban nou lasajès, èk pou fòtifyé nou. Èk sa sé ègzaktiman sa Valérie èk mawi’y té fè.​—Sam 41:3.

18. Kisa ou apwann an èspéyans Valérie?

¹⁸ Lè Valérie té twant senk (35) lanné, dòktè té di’y i té ni an mové kansè. Annou wè mannyè lanmityé té édé’y pou ganyen a bout pèwèz lanmò. I di: “Lè mwen èk mawi mwen apwann mwen té ni kansè sa chanjé lavi nou an chay. Mwen té bizwen fè an gwo lopowasyon pou mwen viv. Mwen té konsilté an pil dòktè, mé yo tout wifizé pou fè lopowasyon-an san san. Mwen té pè, mé lè mwen konsidiwé konmand Bondyé, la pa té ni pyès mannyè mwen té kay aksèpté san! Diwan tout lavi mwen, Jéhova té moutwé mwen an chay lanmityé. Atjwèlman mwen té ni pwivilaj-la pou moutwé’y lanmityé déviwé. Chak fwa mwen twapé mové nouvèl, sa té ka fè mwen pli détèminé pou fè Jéhova kontan èk pou pa fè Satan kontan. Kanmenm, dòktè-a fè mwen lopowasyon san i sèvi san. Magwé mwen ni pwòblenm èk santé mwen toujou, Jéhova ja toujou potjiwé sa nou bizwen. Pou ègzanp, simenn-lan avan mwen apwann mwen té ni kansè, nou konsidiwé atik sala an mitin-lan ‘Meeting Today’s Adversities With Courage.’ c Atik sala vwéman konsolé mwen èk mawi mwen. Nou li’y plizyè fwa. Atik konsa èk lè nou kontiné pwéché, èk atandé sé mitin-lan édé nou pou ni lapé an lidé nou èk an tjè nou. Èvèk sa édé nou pou fè bon disizyon osi.”

19. Kisa ki kay fèt touswit?

¹⁹ Épi èd Jéhova, Kwityen oliwon latè-a ja ganyen a bout sitiwasyon ki difisil, èk yo ja ni siksé kon yo ka goumen kont Denmou-an. (1 Pita 5:8, 9) Konsa, ou sa ni siksé osi. Touswit, Jéhova kay ba Jézi èk yon san kawant kat mil (144,000) moun-lan ki kay kondwi épi Jézi diwèksyon “pou détwi twavay Denmou-an”. (1 Jan 3:8) Apwé sa, pèp Bondyé ki asou latè-a ‘pa kay pè anyen èk la pa kay ni anyen pou fè yo pè’. (Izay. 54:14; Mayk. 4:4) Jis tan jou sala wivé, nou ni pou twavay wèd pou ganyen a bout pèwèz nou.

20. Kisa ki kay édé nou ganyen a bout pèwèz nou?

²⁰ Nou ni pou kontiné fòtifyé konfyans nou ki, Jéhova enmen nou èk i ka pwotéjé pèp li. Osi si nou mèdité asou èk palé konsèné mannyè Jéhova ja pwotéjé pèp li an tan pasé, sa kay édé nou tou. Èk nou ni pou chonjé mannyè Jéhova ja édé nou an sitiwasyon ki té difisil. Konsa, épi èd Jéhova nou sa ganyen a bout pèwèz nou!​—Sam 34:4.