ÈS LAPWIYÈ ka édé nou? Bib-la ka wéponn, wi. Lè sèvant fidèl Bondyé pwédyé, yo ka twapé an chay bennéfis. (Louk 22:40; Jémz 5:​13) Anfen, lapwiyè ka édé nou pou ni on bon wilasyon épi Bondyé. Mé, i ka édé nou an lòt mannyè osi. Ki mannyè?

Ében annou di, on moun bay ich ou on kado. Ès ou té kay di ich ou, sèl sa’y ni pou fè, sé apwésyé kado-a an tjè’y? Mé non! Asiwé ou té kay di ich ou, i ni pou di moun-lan ki ba’y kado-a mèsi. Wi, nou pé ni on santiman an tjè nou, mé lè nou di, ében fè on bagay pou moutwé mannyè nou ka santi, sa ka fòtifyé santiman-an nou ni an tjè nou-an. Mé, ès sé menm bagay-la ki ka fèt lè nou ka palé épi Bondyé an lapwiyè? Absoliman! Annou gadé yonndé ègzanp ki ka moutwé sa.

Pwédyé pou wimèsyé Bondyé. Lè nou di Papa nou Jéhova mèsi pou tout sé bon bagay-la nou ni-an, sa ka édé nou pou fiksé asou sé bennédiksyon-an nou ka wisouvwè. Èk akòz di sa, nou kay dévlopé pli apwésiyasyon, nou kay ni pli tjè kontan, èk nou kay ni on atitid ki pli pozitiv.​—Filipay 4:6.

Mi yon ègzanp: Jézi té di Papa’y mèsi pou mannyè-a i té ka kouté èk wéponn lapwiyè’y.​—Jan 11:41.

Pwédyé pou mandé Bondyé pawdonnasyon. Lè nou mandé Bondyé pou pawdonnen nou pou on péché nou fè, sa ka ban nou òpòtyounité-a pou katjilé asou mannyè aksyon nou ka afèkté wilasyon nou épi Jéhova. Èk i kay édé nou pou wè mannyè i enpòtan pou nou aksèpté katjil Jéhova, èk fè tout sa nou pé pou nou pa wépété menm lèwè-a nou té fè-a. A lè sala konsyans nou pa kay bat nou twòp, konsa nou kay twapé soulajman.

Mi yon ègzanp: David té pwédyé pou moutwé mannyè i té wigwété sa’y té fè-a, èk pou moutwé twistès-la i té ka santi akòz di péché-a i té fè-a.​—Sam 51.

Pwédyé pou mandé Bondyé diwèksyon épi lasajès. Lè nou mandé Jéhova pou djidé nou èk pou ban nou lasajès-la nou bizwen pou fè bon disizyon, sa ka édé nou dévlopé imilité. I ka fè nou chonjé nou ni limit, èk i ka édé nou pou fòtifyé konfyans nou an Papa nou ki an syèl.​—Pwovèb 3:​5, 6.

Mi yon ègzanp: Épi imilité, Sòlomonn té mandé Bondyé pou ba’y diwèksyon èk lasajès pou’y kondwi jan Izwayèl.​—1 Wa 3:​5-​12.

Pwédyé lè’w dékouwajé ében lè’w twakasé. Si nou ouvè tjè nou an lapwiyè lè nou twakasé, Jéhova kay soulajé nou, èk nou kay apwann pou dépan asou’y, pito nou dépan asou kò nou.​—Sam 62:8.

Mi yon ègzanp: Lè on lèlmi ki té byen danjéwé té ka mennasé, Wa Asa, i pwédyé pou mandé Jéhova èd. ​—2 Kwonnikèl 14:11.

Pwédyé pou moun ki ni pwòblenm. Lè’w pwédyé bay lézòt moun, sa ka édé’w pou dévlopé pli konpasyon, pou pa gadé pou kò’w tousèl, èvèk i kay édé’w pou mété kò’w an plas lézòt moun.

Mi yon ègzanp: Jézi té ka toujou pwédyé bay sé disip li-a.​—Jan 17:​9-​17.

Pwédyé pou glowifyé Bondyé. Lè nou glowifyé Jéhova an lapwiyè pou tout sé bèl bagay-la i ja fè-a, èk pou sé bèl kawaktè-a i ni-an, nou kay dévlopé pli wèspé èk pli apwésiyasyon pou li. Sé kalité lapwiyè sala kay osi édé nou pou vansé pli pwé Dyé nou èk Papa nou, Jéhova.

Mi yon ègzanp: David té ka glowifyé Bondyé an chay pou sé bèl bagay-la i fè-a.​—Sam 8.

On lòt bennéfis nou ka twapé lè nou pwédyé sé sa, Bondyé ka ban nou lapé’y pou kalmé tjè nou épi lidé nou. Lapé sala si “tèlman bon, pyèsonn pa sa fini konpwann li.” (Filipay 4:7) An latè sala, ki plen twaka épi konfizyon, i pa ézé pou wèsté kam. Konsa, lè nou ni lapé an tjè nou épi an lidé nou, sa sé vwéman on bennédiksyon. Anfen, i ka jis pòté nou bennéfis an mannyè fizikal. (Pwovèb 14:30) Mé ki mannyè nou ka twapé lapé sala? Ès nou sa twapé’y pa kò nou, ében nou bizwen on bagay enpòtan pou nou sa twapé’y?