SAN DOUT ou ja òbzòvé, pwèskè tout sé pli gwo wilizyon-an an latè-a ni sa yo ka kwiyé kay lapwiyè, ében plas spésyal pou moun pwédyé. Osi, yo ka di moun ki lè an jounen-an yo sipozé pwédyé. Mé, ès Bib-la ka di nou ki koté, èk ki lè nou sipozé pwédyé?

Ében, Bib-la ka moutwé, la ni sèten lokasyon lè i bon pou nou pwédyé. Pou ègzanp, avan Jézi té manjé épi sé disip li-a, i wimèsyé Bondyé an lapwiyè. (Louk 22:17) Èk lè sé disip Jézi-a té ka asanblé pou adowé Jéhova, yo té ka pwédyé ansanm kon yon gwoup. Mé, sa pa té anyen ki té nèf, paskè pou plizyè lanné avan sa, lè sé Jwif-la té an tanp-lan, ében an lòt plas yo té ni pou adowé Bondyé, yo té ka toujou pwédyé. Anfen, Bondyé té vlé tanp-lan an Jérouzalèm vini, “an plas tout nasyon kay sèvi pou pwédyé.”​—Mak 11:17.

Bondyé ka kontan lè sèvant li vini ansanm kon on gwoup pou pwédyé. Èk si yo an lilyon épi yonn a lòt, èvèk lapwiyè yo an ling épi pwensip Bib, Bondyé kay wéponn lapwiyè-a. Anfen, lapwiyè kon sa pé jis motivé Bondyé pou fè bagay i pa té kay fè, si yo pa té pwédyé pou’y fè’y. (Hibrou 13:18, 19) Tèmwen Jéhova ka toujou pwédyé an sé mitin yo-a. Pa dé kontan yo té kay kontan pou byenvini’w an Lasal Wéyòm-lan, koté ou kay sa tann sé lapwiyè sala épi dé zòwèy ou.

Mé kanmenm, Bib-la pa ka di, nou sipozé pwédyé sèlman a sèten lè, èk an sèten plas. An Bib-la, nou ka li konsèné sèvant Bondyé ki té pwédyé an plizyè diféwan plas, èk a diféwan lè. Jézi té di: “Lè ou ka pwédyé, antwé an chanm ou, fèmé lapòt ou, èk pwédyé bay Papa’w. Pyèsonn pa sa wè Papa-a, mé i ka wè tout sa ki ka fèt. Sé li ki kay wékonpansé’w.”​—Mafyou 6:6.

Mi on bèl envitasyon! Ou sa apwoché Jéhova, Moun-an Ki Pli Ho-a an inivès-la a népòt lè, épi ou sa palé épi’y ant zòt dé-a tousèl. Èk ou sa asiwé i kay tann ou. Sa ka édé nou pou konpwann pouki Jézi té ka toujou alé adan an plas pa kò’y pou pwédyé. Asou yon lokazyon, i pasé tout swè-a ka palé épi Papa’y an lapwiyè, paskè i té ni on disizyon ki enpòtan pou’y fè, èk i té vlé diwèksyon Bondyé.​—Louk 6:​12, 13.

Bib-la ka di nou konsèné lòt moun­ki té pwédyé lè yo té ni gwo disizyon pou fè, ében lè yo té ni gwo wèskonsabilité asou kont yo. Délè yo té ka pwédyé fò, èk lòt lè yo té ka pwédyé an silans. Osi, yo té ka pwédyé lè yo té ansanm épi lòt moun, èk yo té ka pwédyé lè yo té pa kò yo. Sa ki té pli enpòtan sé sa, yo té ka pwédyé. Bondyé ka envité sèvant li pou: “Toujou pwédyé.” (1 Tèsalonnika 5:​17) Wi, Jéhova toujou pawé pou tann lapwiyè moun ki ka fè volonté’y. Ès bèl envitasyon sala pa ka moutwé’w mannyè Jéhova enmen nou?

An chay moun an latè-a pa ni konfyans an pyèsonn, konsa yo pa asiwé si lapwiyè sa vwéman édé yo. Pitèt ou menm ka mandé kò’w: ‘Ès lapwiyè sa vwéman édé mwen?’