JÒDI JOU, an chay moun ka kwè Bondyé ka kouté tout lapwiyè. Konsa, yo ka di i pa enpòtan ki dyé ou adwésé an lapwiyè, paskè tout lapwiyè ka alé menm plas-la. Moun ki ka kwè tout wilizyon dwèt an zyé Bondyé, èk moun ki vlé tout wilizyon twavay ansanm, ka sipòté katjil sala. Mé ès sa vwé? Ès Bondyé ka kouté tout lapwiyè?

Bib-la ka moutwé, an chay moun pa ka adwésé moun-lan yo sipozé adwésé-a an lapwiyè. An tan pasé, diwan tan-an yo té ka ékwi Bib-la, an chay moun té ka adwésé imaj an lapwiyè yo. Anfen, sa sé on bagay ki té byen konmen a lè sala. Mé, plizyè fwa, Bondyé té vèti pèp li konsèné vyé labitid sala. I té ka toujou di yo pou pa fè sa. Mi sé sa Sam 115:4-6 ka di konsèné idòl: ‘Yo ni zòwèy mé yo pa sa tann.’ Konsa, lè’w ka pwédyé, i pa ka fè pyès sans pou’w adwésé on dyé ki pa sa tann ou.

Annou konsidiwé on bèl wakont an Bib-la ki ka édé nou pou konpwann pwen sala. Pwofèt Ilaydja té bay sé pwofèt Bal-la on tès. I té di yo pou pwédyé èk kwiyé asou dyé yo. Apwé sa, i menm Ilaydja té kay pwédyé èk kwiyé asou Dyé’y, pou yo sa wè ki Dyé ki té kay wéponn. Sé pwofèt Bal-la dakò, èvèk sé pa dé pwédyé yo pwédyé bay dyé yo. Yo jis hélé épi tout fòs yo, mé dyé yo pa janmen wéponn. Anfen, wakont-la di: ‘Pyèsonn pa té ka wéponn yo, èk pyèsonn pa té ka ba yo ganm.’ (1 Wa 18:29) Mé kisa ki fèt lè Ilaydja pwédyé?

Ében apwé Ilaydja pwédyé, Bondyé wéponn lapwiyè’y la menm. I voyé difé hòd syèl-la pou konsonmé sakwifis-la Ilaydja té ofè-a. Mé kisa ki té diféwans-lan ant lapwiyè Ilaydja, épi lapwiyè sé pwofèt Bal-la? Nou ka twapé wépons-lan an lapwiyè-a Ilaydja té ofè-a, an 1 Wa 18:36, 37. Magwé lapwiyè-a té byen kout—twant (30) mo pawòl an langaj Hibrou, Ilaydja adwésé Bondyé pa non’y Jéhova, twa (3) fwa.

Bal ében “mèt,” sété dyé moun péyi Kénann. Èk sé moun sala té ni plizyè diféwan dyé yo té ka kwiyé menm Bal-la. Mé Jéhova sé on non ki spésyal. An tout inivès-la, sé yon sèl Dyé ki ni non sala. Èk i té di pèp li: “Mwen sé Jéhova. Sa sé non mwen. Mwen pa ka bay pyèsonn laglwa-a ki sa mwen-an.”​—Izaya 42:8.

Bon, ès lapwiyè Ilaydja èk lapwiyè sé pwofèt Bal-la té alé menm plas-la? Moun ki té ka adowé Bal, té ka pwatiké tout sòt kalité vyé lavi an adowasyon-an yo té ka bay Bal. Èk sé vyé pwatik sal sala té ka dézonnowé sé moun-lan. Yo té ka jis ofè moun kon sakwifis pou sé fo dyé sala. Mé, Jéhova té enstwi pèp li Izwayèl, pou adowé’y adan an mannyè ki té ka onnowé yo. Katjilé asou sa: Si’w té vlé voyé on lèt bay on bon jan’w ou ka wèspèkté, ès ou té kay adwésé lèt-la èk mété non on lòt moun asou’y, sitou on moun ki ni on mové wépitasyon? An menm mannyè-a, Ilaydja té adwésé Jéhova an lapwiyè’y. Konsa, lapwiyè Ilaydja pa té sa janmen alé menm plas-la épi lapwiyè sé pwofèt Bal-la.

Si sé Jéhova ou ka adwésé an lapwiyè’w, ou ka adwésé Kwéyatè-a. Sé li ki Papa tout moun. a Pwofèt Izaya té di Jéhova an lapwiyè: “Ou, Dyé Jéhova, sé Papa nou.” (Izaya 63:16) Konsa, Jéhova sé Dyé-a Jézi Kwi té ka palé konsèné, lè’y té di sé disip li-a, “Mwen ka alé jwenn Papa mwen, ki sé [Papa’w] tou, èk Bondyé mwen, ki sé [Bondyé’w] tou.” (Jan 20:17) Wi, Jéhova sé Papa Jézi. Sé li ki Dyé-a Jézi té ka adwésé an lapwiyè, èk sé li menm Jézi enstwi sé disip li-a pou adwésé an lapwiyè.​—Mafyou 6:9.

Ès Bib-la ka di, nou sipozé adwésé Jézi, Mari, sé sen-an, ében sé nanj-lan an lapwiyè nou? Non. Bib-la ka moutwé a klè, sé Jéhova sèlman nou sipozé adwésé an lapwiyè nou. Annou konsidiwé dé (2) wézon pouki nou sa di sa. Pwèmyéman, lapwiyè sé yon pa an adowasyon nou, èk Bib-la ka di, sé Jéhova sèlman nou sipozé adowé. (Ègzodòs 20:5) Dézyenman, Bib-la ka moutwé Jéhova sé Moun-lan ‘ki ka tann lapwiyè.’ (Sam 65:2) Èk magwé Jéhova ka bay lézòt an chay wèskonsabilité, i p’òkò janmen bay pyèsonn wèskonsabilité-a pou tann lapwiyè. Jéhova sé Dyé-a ki pwonmèt pou kouté lapwiyè chak di nou.

Konsa, si’w vlé Bondyé kouté lapwiyè’w, ou ni pou adwésé Jéhova an lapwiyè’w. Bib-la di: “[Jéhova] kay sové népòt moun ki . . . kwiyé asou’y.” (Twav. 2:​21) Mé ès sa vlé di, Jéhova ka kouté tout kalité lapwiyè? Si nou vlé Jéhova kouté lapwiyè nou, ès la ni anyen ankò nou bizwen konnèt?