• LANNÉ MWEN FÈT: 1941

• PÉYI MWEN FÈT: BENIN

• AVAN: MWEN TÉ NI PLIZYÈ MADANM ÈK MWEN TÉ KA OPOZÉ TÉMWEN JÉHOVA

LAVI MWEN AN TAN PASÉ:

Mwen sòti Contonou, an gwo vil an Benin. Mwen té lévé Katolik, mé m’a té ka alé légliz souvan. Lwa-a an péyi mwen té ka pèwmité on nonm pou mayé plizyè fanm. Alò, an chay nonm Katolik an vil mwen té ni plizyè madanm. Konsa, apwé an tan mwen mayé kat fanm.

Lè an wévòt té lévé an lanné mil nèf san swasant dis (1970), mwen té kwè sa té kay bon pou péyi mwen. Alò, mwen té sipòté’y èk mwèn antwé an politiks. Sé moun-lan ki té lévé wévòt-la pa té enmen Témwen Jéhova paski yo pa té ka mélé an politiks. Mwen té yonn an sé moun-lan ki té ka pèsikité Témwen Jéhova. Èk an lanné mil nèf san swasant-sèz (1976), lè gouvèdman-an té kouwi dèyè misyonnè Témwen Jéhova an péyi-a, pa dé kontan mwen té kontan. Mwen té asiwé yo pa té kay janmen witounen.

MANNYÈ BIB-LA CHANJÉ LAVI MWEN:

An lanné mil nèf san katwiven dis (1990) wévòt-la fini. Mwen té sipwi lè mwen wè misyonnè Témwen Jéhova an péyi-a ankò. Mwen koumansé katjilé pitèt Bondyé té épi sé moun sala. A lè sala, mwen té ka twavay adan an lòt plas. Yonn an sé moun-lan mwen té ka twavay épi sété an Témwen Jéhova, i pa té gaspiyé tan pou pwéché ban mwen. I té sèvi Bib-la pou édé mwen wè Jéhova kon an Dyé ki ni lanmityé èk jistis. (Ditonronnonmi 32:4; 1 Jan 4:8) Mwen té kontan sa mwen té ka apwann. Mwen té vlé apwann pli konsèné Jéhova. Konsa, lè i ofè mwen an létid Bib, mwen dakò pou étidyé épi’y.

Pa djè tan apwé, mwen koumansé alé mitin Témwen Jéhova. Sa ki té vwéman touché tjè mwen sé lanmityé-a anpami yo. Yo pa té ni pwéféwans pou pyèsonn, yo té twété tout moun menm mannyè-a. Pli mwen asosiyé épi sé Témwen-an, sé pli mwen wéyalizé yo sé Kwityen ki vwé.​—Jan 13:35.

Mwen té sav si mwen té vlé sèvi Jéhova, mwen té ni pou kité Légliz Katolik-la. Sa pa té ézé pou mwen fè, paski mwen té pè sa lézòt moun té kay di. Apwé an chay tan pasé, épi èd Jéhova mwen té ni kouwaj-la pou kité Légliz-la.

La té ni an lòt gwo chanjman mwen té ni pou fè. Mwen té ka toujou viv épi plizyè madanm. Mé mwen té apwann an Bib-la, Bondyé pa plè épi kalité lavi sala. (Jennésis 2:​18-​24; Mafyou 19:​4-6) Sé sèlman pwèmyé mawiyaj mwen I té kay aksèpté. Konsa, mwen té ni pou alé lodyans pou wéjistwé pwèmyé mawiyaj mwen èk dévosé sé lòt madanm mwen-an. An plis disa, mwen té fè awanjman pou potijwé sa yo té bizwen pou viv. Sé chanjman sala vwéman édé nou tout, paski apwé plizyè lanné dé an sé madanm sala té vini Témwen Jéhova osi.

MANNYÈ MWEN TWAPÉ BENNÉFIS:

Magwé madanm mwen sé an Katolik, i ka wèspèkté disizyon mwen pou sèvi Jéhova. Nou toulédé ka dakò sé Jéhova ki ka édé mwen pou vini an pli bon mawi.

Mwen té kwè, kon an politisyen mwen té sa édé sé moun-lan an konmin mwen pou ni an pli mèyè lavi, mé mwen wéyalizé tout éfò mwen pa té vo anyen. Apwézan mwen sav, sé sèlman Wéyòm Bondyé ki sa wanjé tout sé pwòblenm-lan asou latè-a, pa mwen. (Mafyou 6: 9,10) Mwen ka wimèsyé Jéhova an chay paski i ka moutwé mwen mannyè pou viv an lavi ki ka plè’y.

• LANNÉ MWEN FÈT: 1977

• PÉYI MWEN FÈT: BRAZIL

• AVAN: MWEN TÉ AN PASTA ADAN LÉGLIZ PENTECOSTAL-LA 

LAVI MWEN AN TAN PASÉ:

Mwen té lévé pwé Itu, yon vil an São Paulo. An vil sala, la té ni an chay kwim.

Mwen té byen vyolan èk mwen té ka kouwi vyé lavi. Apa di sa, mwen té ka vann dwòg. Mé apwé an tan, mwen wéyalizé kalité lavi sala té kay tjwé mwen èben fè mwen alé lajòl. Konsa, mwen désidé pou chanjé lavi mwen. Alò, mwen koumansé alé Légliz Pentecostal-la, èk apwé an tan mwen vini an pasta.

Mwen té kwè mwen té sa vwéman édé moun pa twavay-la mwen té ka fè an légliz-la. Alò, mwen té ka pwéché asou radyo-a. Èk sé konsa tout moun an konmin-la té vini konnèt mwen. Mé apwé an lè, mwen wéyalizé sé moun-lan ki té ka pwan douvan an légliz-la pa té mélé épi sé manm yo-a, èk yo pa té menm entéwésé pou bay Bondyé lonnè. Pou mwen, sèl sa yo té entéwésé adan, sé pou fè lajan. Konsa, mwen désidé pou kité légliz-la.

MANNYÈ BIB-LA CHANJÉ LAVI MWEN:

Lè mwen koumansé étidyé Bib-la épi Témwen Jéhova, mwen té sa wè aklè yo té diféwan épi lòt wilizyon. Anfen, la té ni dé bagay ki té vwéman touché tjè mwen. Pwèmyé bagay-la sé, Témwen Jéhova ka fè tout sa yo pé pou viv an ling épi sa yo ka pwéché. Pou ègzanp, yo pa ka annik palé konsèné lanmityé pou Bondyé èk pwochen, mé yo ka moutwé lanmityé. Dézyenm bagay-la sé, yo pa ka mélé an zafè pòlitiks èk yo pa ka pwan pa an ladjè. (Izaya 2:4) Sé dé bagay sala té fè mwen asiwé mwen té twapé wilizyon-an ki vwé, sa sé chimen ètwèt-la ki ka mennen lavi ètonnèl.—Mafyou 7:​13, 14.

Mwen wéyalizé si mwen té vlé plè Bondyé, mwen té kay ni pou fè gwo chanjman an lavi mwen. Mwen té bizwen chanjé mannyè-a mwen té ka twété fanmi mwen. Mwen té ni pou fè éfò pou bay yo pli antansyon èk moutwé yo lanmityé. Osi, mwen té ni pou apwann mannyè pou abésé kò mwen. I pa té ézé pou mwen fè sé chanjman sala, mé épi èd Jéhova mwen té fè’y. Lè madanm mwen wè sé chanjman-an mwen té ka fè-a, pa dé kontan i té kontan. Magwé i té koumansé étidyé Bib-la avan mwen, sé chanjman-an mwen té ka fè-a pousé’y pou fè pli pwogwé. Nou touledé té sav nou té vlé sèvi Jéhova. Konsa, nou té batizé kon Témwen Jéhova asou menm jou-a.

MANNYÈ MWEN TWAPÉ BENNÉFIS:

Mwen èk madanm mwen ni bèl pwivilaj-la pou édé twa ich nou pou vansé pwé Jéhova. Apwézan, fanmi nou ni lakontantman. Touléjou mwen ka wimèsyé Jéhova paski i fè mwen konnèt lavéwité-a ki an Bib-la. Wi, Bib-la ka vwéman chanjé lavi moun! Mwen sé on bon ègzanp.

• LANNÉ MWEN FÈT: 1957

• PÉYI MWEN FÈT: AUSTRALIA

• AVAN: MWEN TÉ SOUFÈ AN CHAY LÈ MWEN TÉ PITI 

LAVI MWEN AN TAN PASÉ:

Mwen té lévé an Newcastle an vil an New South Wales. Pawan mwen té ni sèt ich èk sé mwen ki té pli gwan. Lavi mwen pa té ézé lè mwen té piti. Papa mwen té vyolan èk i té ka bwè an chay wonm. Manman mwen té vyolan osi. I té ka bat mwen èk i té ka di mwen bagay pou kwazé tjè mwen. I té ka toujou di mwen, mwen mové èk mwen kay bwilé an lanfè. Sé pawòl li-a té ka fè mwen pè.

Manman mwen té ka bat mwen si tèlman mové, délè, mwen té ka mantjé lékòl. Lè mwen té wonz (11) lanné, jan gouvèdman tiwé mwen lakay pawan mwen. Pwèmyéman, yo mété mwen adan an kay pou òflen èk apwé, yo mété mwen adan an kouvan. Lè mwen té katòz (14) lanné, mwen kité kouvan-an. Mwen pa té vlé viwé lakay pawan mwen, konsa, mwen désidé pou wèsté asou lawi-a yo ka kwiyé Kings Cross, an Sydney.

Paditan mwen té ka wèsté asou lawi-a, mwen té ka pwan dwòg, mwen té ka bwè an chay wonm, mwen té ka gadé pònogwafi èk mwen té an djanmèt. Yon jou, mwen èspéyansé yon bagay ki té vwéman fè mwen pè. An tan sala, mwen té ka wèsté lakay mèt an disko. Yon swè, dé nonm té vini wè’y. Alò, i di mwen alé an chanm-lan pou yo palé, mé lè mwen té an chanm-lan, mwen té ka tann konmézasyon yo. Mèt disko-a té ka fè awanjman pou vann mwen bay dé nonm-lan. Yo di yo kay séwé mwen abò an gwo bato èk mennen mwen Japon pou twavay adan an kabawé. Lè mwen tann sa, mwen té vini pè èk mwen soté balkon-an èk mwen kouwi ay mandé soukou.

Mwen jwenn an nonm ki té ka vizité Sydney. Mwen di’y sitiwasyon mwen èk mwen kwè i té kay ban mwen lajan. Pito sa, i mennen mwen koté-a i té ka wèsté pou mwen sa benyen èk manjé. Pou di’w lavéwité-a, m’a té janmen kité. Èk apwé yon lanné, nou té mayé. 

MANNYÈ BIB-LA CHANJÉ LAVI MWEN:

Lè mwen koumansé étidyé Bib-la épi Témwen Jéhova mwen apwann an chay bagay. Èk sa mwen apwann fè mwen faché paski mwen té toujou kwè sé Bondyé ki té ka fè moun soufè. Mé létid Bib mwen té édé mwen konpwann sé Satan ki wèskonsab pou sé mové bagay-la ki ka fèt asou latè-a. Èk lè mwen apwann Bondyé pa ka pini moun an lanfè sa soulajé mwen, paski tout lavi mwen, mwen té pè mwen té kay bwilé an lanfè.

Sa ki vwéman touché mwen sé mannyè-a sé Témwen-an ka sèvi Bib-la pou djidé lavi yo. Yo pa té annèk di yo té ni lafwa, lavi yo té ka moutwé yo ni lafwa. Kanmenm, I té difisil pou mwen aksèpté sa sé Témwen-an té ka enstwi mwen. Mé, yo kontiné moutwé mwen wèspé èk lanmityé.

Sa ki té pli difisil pou mwen sé sa: mwen té ka santi mwen pa vo anyen. Mwen té hayi kò mwen, èk mwen té kontiné santi kon sa pou an chay tan apwé mwen batizé. Mwen té sav mwen enmen Jéhova, mé mwen té asiwé i pa té sa janmen enmen an moun kon mwen.

Mé, katjil mwen chanjé apipwé (15) kenz lanné apwé mwen té batizé. Ou wè, yon jou an fwè té ka bay an diskou èk i té sèvi Jémz 1:23, 24. Sé vèwsé sala ka konpawé Pawòl Bondyé épi on miwè èk nou sa sèvi’y pou édé nou wè kò nou mannyè-a Jéhova ka wè nou. Konsa, sa fè mwen katjilé. Mwen té ka koumansé mandé kò mwen si mwen té ka wè kò mwen mannyè-a Jéhova ka wè mwen. An koumansman-an, mwen té wifizé aksèpté sa. Èvèk mwen té kontiné kwè i té enposib pou Jéhova enmen mwen.

Mé déotwa jou apwé, mwen li an lévanjil ki té édé mwen chanjé katjil mwen. Lévanjil sala sé Izaya 1:18, la i di, ‘Jéhova di: “Vini, annou wanjé bagay ant nou dé-a. Menm si péché zòt pli wouj pasé san, mwen kay fè yo blan kon lannèj.”’ Vèwsé sala vwéman touché tjè mwen, i té fè mwen santi konmsi Jéhova té ka palé ban mwen diwèktiman, èk i té ka di mwen “Vini, Vicky, annou wanjé bagay ant nou dé-a. Mwen konnèt ou, mwen konnèt péché’w, mwen konnèt tjè’w èk mwen enmen’w an chay.”

Mwen pa té sa dòmi swè sala. M’a té sa kwè Jéhova té sa vwéman enmen mwen. Konsa, mwen koumansé katjilé asou sakwifis Jézi. Sibitman, mwen wéyalizé sé pa jòdi ni yè Jéhova ka moutwé mwen pasyans. I té moutwé mwen pasyans an plizyè diféwan mannyè. Mé sé konmsi mwen té ka di’y: “Lanmityé’w pa sa kouvè péché mwen. Sakwifis Gason’w pa asé pou pawdonnen péché mwen.” Sé konmsi mwen té ka widjèkté Sakwifis Gason Jéhova. Mé, lè mwen vwéman pwan tan pou médité asou wanson-an, mwen koumansé santi lanmityé Jéhova.

MANNYÈ MWEN TWAPÉ BENNÉFIS:

Apwézan, mwen pa ka santi koupab èk mwen kontan lavi mwen. Mwen ni on pli bon wilasyon épi mawi mwen. Èk mwen si tèlman kontan mwen sa sèvi èspéyans mwen pou édé lézòt moun. An plis di sa, jou apwé jou, wilasyon mwen épi Jéhova ka vini pli fò. 

• LANNÉ MWEN FÈT 1974

• PÉYI MWEN FÈT: RUSSIA

• AVAN: MWEN TÉ ENMEN KOUTÉ AN KALITÉ MIZIK YO KA KWIYÉ ”‏PUNK ROCK”‏ 

LAVI MWEN AN TAN PASÉ:

Mwen fèt an Votkinsk. Sa sé menm plas-la Pyotr Ilich Tchaikovsky té fèt. I té an nonm ki té ka ékwi mizik. Fanmi mwen té pòv èk papa mwen té on bon nonm, mé i té ka bwè an chay wonm. Konsa, fanmi mwen té toujou antjèt paski nou pa té sav sa ki té kay fèt an kay-la.

M’a té ka fè byen lékòl, èk kon tan pasé mwen koumansé santi mwen pa vo anyen. Mwen té toujou vlé wèsté pa kò mwen èk m’a té ka konfyé pyèsonn. Mwen pa té enmen lékòl, i té ka ban mwen tèt chò. Pou ègzanp, i té difisil pou mwen pwézanté ansayman mwen douvan klas-la. Mwen pa té sa menm èspliké bagay ki senp magwé mwen té sa éspliké’y avan. Lè mwen fini lékòl, sé titja mwen-an ékwi asou kat mwen: “M’a sa éspliké kò mwen èk mwen pa té entèlijan.” Sé pawòl sala fè mwen hayi kò mwen pli. Alò, mwen katjilé ki sans i ka fè pou mwen viv?

Padan jennès mwen, mwen koumansé bwè an chay wonm. An koumansman-an, lè mwen té ka bwè wonm, sa té ka fè mwen santi bon. Mé lè mwen bwè an chay wonm, konsyans mwen té ka bat mwen. Lavi mwen pa té ka fè sans. Mwen té vini pli dékouwajé, èk délè m’a té vlé kité kay mwen. Mwen té vlé tjwé kò mwen.

Lè mwen té ven (20) lanné, mwen koumansé kouté an kalité mizik yo ka kwiyé “heavy-metal”. Kalité mizik sala té ka ban mwen kouway. Konsa, mwen fè jan épi moun ki té enmen’y osi. An plis di sa, mwen kité chivé mwen pwofité, mwen pèsé dé zòwèy mwen èk mwen té ka abiyé kon sé mizisyen-an mwen té kontan-an. Mizi an mizi, mizik sala té ka fè mwen vyolan èk mwen té ka fè bagay kon an nomn ki fou. Souvan, mwen té ka babyé épi fanmi mwen.

Mwen té kwè mizik sala té kay ban mwen tjè kontan, mé sé pa sa ki té fèt. Mwen té vin on diféwan moun, mizik sala té chanjé mwen. Èk lè mwen apwann sé mové bagay-la sé mizisyen-an mwen té kontan-an té ka fè, sa kwazé tjè mwen.

Alò, mwen té vlé tjwé kò mwen ankò, mé apwézan mwen té pli sèwiyé. Sèl wézon m’a té fè’y sé paski mwen té sav, sa té kay tjwé manman mwen. Mwen sav i té enmen mwen an chay, èk i té ja fè an pil bagay pou mwen. Sitiwasyon mwen té byen difisil pou mwen aji épi. M’a té vlé viv, mé mwen pa té sa tjwé kò mwen.

Pou édé mwen aji épi sitiwasyon mwen, mwen koumansé li liv Wisi ki té ékwi dépi lontan. Yonn an sé liv-la té ka palé konsèné an moun ki té ni an chay kouwaj èk ki té ka wann sèvis adan an légliz. Liv sala té fè mwen katjilé konsèné Bondyé. Sibitman, mwen té ni an gwo dézi pou sèvi Bondyé èk édé lézòt moun. Alò, mwen té fè an bagay m’a té janmen fè avan. Mwen sipliyé Bondyé. Mwen mandé’y pou édé mwen jwenn an wézon pou viv. Lè mwen té ka pwédyé, mwen té ka santi lapé an lidé mwen èk an tjè mwen. Èk sa ki té vwéman èstòdinè, sé sa ki té fèt apwé. Djòs dé nèditan apwé, on Témwen Jéhova konyen asou lapòt mwen èk i ofè mwen an létid Bib. Mwen té sav, sa té wépons-lan pou lapwiyè mwen. Èk sé kon sa lavi mwen chanjé pou pli mèyè.

MANNYÈ BIB-LA CHANJÉ LAVI MWEN:

Magwé sa pa té ézé pou fè, mwen doubout kouté mizik-la èk bwè wonm-lan mwen té enmen-an. Mé sé chanson-an wèsté an lidé mwen pou an chay tan apwé. Èk népòt lè mwen pasé an koté mizik-la té ka jwé, la menm mwen té ka chonjé lavi-a mwen té ka viv avan-an. Konsa, mwen désidé pou pa pasé sé koté sala paski m’a té vlé sé vyé memwa-a distwé tout sé bèl bagay-la ki té ka wasiné an tjè mwen. Èk lè sé katjil-la konsèné lavi-a mwen té ka viv an tan pasé vini an lidé mwen, mwen té plédé bay Bondyé pou èd. Konsa, lè mwen té fè sa, mwen té èspéyansé sa Filipay 4:7 ka di. I di “Bondyé kay baʼw lapé an tjèʼw épi an lidéʼw.”

Létid Bib mwen té enstwi mwen ki, Bondyé konmandé Kwityen pou patajé bon nouvèl-la épi lézòt. (Mafyou 28: 19, 20) M’a té janmen kwè mwen té sa fè sa. Mé an menm di tan, sé bagay-la mwen té ka apwann-lan té ka ban mwen tjè kontan èk lapé. Èk mwen té sav i té enpòtan pou moun tann bon nouvèl-la. Magwé mwen té pè, mwen koumansé patajé sa mwen té ka apwann épi lézòt. Mwen té sipwi mannyè pwédikasyon-an té ban mwen konfyans èk fòtifyé lafwa mwen.

MANNYÈ MWEN TWAPÉ BENNÉFIS:

Apwézan, mwen mayé èk mwen ni an bon fanmi. Mwen kontan mwen ja édé plizyè moun apwann lavéwité-a, anpami sé moun sala sé manmam mwen èk sésé mwen. Pa dé kontan mwen kontan mwen ka sèvi Bondyé èk édé lézòt apwann konsèné’y, paski sé sa ki ka vwéman bay lavi mwen valè.