BIB-LA KA CHANJÉ LAVI MOUN

KISA ki té pousé an nonm ki té ka payé èk ki té ka vòlè chanjé lavi’y? Annou konsidiwé sa’y té di.

“Mwen té kontan chouval èk mwen té kontan gadé kous chouval.”—RICHARD STEWART

LANNÉ MWEN FÈT: 1965

PÉYI MWEN FÈT: JANMAYIK

AVAN: MWEN TÉ KA PAYÉ ÈK MWEN TÉ AN VÒLÈ

LAVI MWEN AN TAN PASÉ: Mwen té lévé an Kingston, Janmayik. Vil sala té ni an pil moun, èk sé moun-lan té pòv paski la pa té ni twavay. A kòz di sa, vil sala té ni an chay kwim èk moun té ka viv an pèwèz. Mwen té ka tann bal ka pété pwéské touléjou.

Manman mwen té ka twavay wèd èk i té ka fè tout sa’y pé pou potjiwé ban mwen, pli jenn fwè mwen èvèk sésé mwen. I té fè asiwé nou té ni an bon endikasyon mé mwen pa té entéwésé an lékòl. Kanmenm, mwen té kontan chouval èk mwen té kontan gadé kous chouval. Alò, mwen té ka mawon lékòl pou alé gadé kous chouval. Mwen té ka jik mouté chouval.

Tjèk tan apwé, bagay chanjé an lavi mwen. Mwen koumansé payé an chay asou chouval. Mwen té ka kouwi vyé lavi, anfen, mwen té ni plizyè fanm. Mwen té ka fimen zèb èk mwen té ka vòlè pou sipòté lavi mwen. Mwen té ni an pil fizi èk mwen té ka pòté yonn lè mwen té ka vòlè. Atjwèlman, pa dé kontan mwen kontan pyèsonn pa té mò an sé vòl sala.

Apwé an tan, polis awété mwen èk yo mété mwen lajòl. Lè yo ladjé mwen, mwen kontiné fè menm sé bagay-la mwen té ka fè avan mwen té alé lajòl. Anfen, mwen té pli mové pasé mwen té yè avan. Magwé mwen té ka gadé innosan, tèt mwen té wèd, mwen té ka faché vit èk mwen té bwital. M’a té mélé épi pyèsonn, mwen té ka gadé pou kò mwen tousèl.

MANNYÈ BIB-LA CHANJÉ LAVI MWEN: Diwan tan sala, manman mwen étidyé Bib-la épi Témwen Jéhova èk i batizé. Lavi manman mwen té chanjé konplètman. Mwen té sa wè sé bon chanjman-an i té fè. Alò, mwen désidé pou apwann kisa ki té pousé’y pou fè sé chanjman sala. Konsa, mwen koumansé étidyé Bib-la épi sé Témwen-an.

Mwen wéyalizé sa Témwen Jéhova ka enstwi diféwan épi sa lòt wilizyon ka enstwi. An plis di sa, tout sa sé Témwen-an ka enstwi bazé asou Bib-la. Èk yo sé sèl gwoup moun mwen konnèt ki ka pwéché kay an kay menm kon sé Kwityen-an an pwèmyé syèk-la. (Mafyou 28:19; Twavay 20:20) Èvèk lè mwen wè lanmityé-a yo ni anpanmi yo, mwen té asiwé mwen té twapé wilizyon ki vwé-a.​—Jan 13:35.

Sa mwen apwann an Bib-la, fè mwen wéyalizé mwen té ni pou fè gwo chanjman an lavi mwen. Mwen apwann Jéhova hayi fònikasyon èk si mwen té vlé plè’y, mwen té ni pou tiwé an lavi mwen tout sé bagay-la ki ka déplè’y. (2 Kòrint 7:1; Hibrou 13:4) Sa ki vwéman touché tjè mwen, sé lè mwen apwann mannyè-a mwen ka viv lavi mwen sa fè Jéhova kontan èben fè’y lapenn. (Pwovèb 27:11) Konsa, mwen désidé pou doubout fimen zèb, pou jété sé fizi mwen-an èk pou fè éfò pou vini an pli mèyè moun. Mé sa ki té pli difisil pou mwen fè, sété pou doubout kouwi vyé lavi èk payé.

An koumansman-an, m’a té vlé jan mwen sav mwen té ka étidyé Bib-la épi Témwen Jéhova. Mé katjil mwen chanjé lè mwen li sa Jézi di an Mafyou 10:33. La i di, “Mé si an moun widjèkté mwen an piblik, mwen kay widjèktéʼy menm mannyè-a douvan Papa mwen ki an syèl.” Lévanjil sala pousé mwen pou di sé jan mwen-an mwen ka étidyé Bib-la épi sé Témwen-an. Yo té sipwi pou tann sa. Yo pa té sa kwè an moun kon mwen té vlé vini on Kwityen. Mé mwen di yo, m’a té vlé ni anyen pou fè épi vyé lavi-a mwen té ka viv avan-an.

MANNYÈ MWEN TWAPÉ BENNÉFIS: Manman mwen té si tèlman kontan lè’y wè sé chanjman-an mwen té fè an lavi mwen. Osi, i té ni djwèté lè mwen koumansé viv an ling épi sé pwensip-la ki an Bib-la. Apwézan, i ni lapé an lidé’y èk tjè’y paski i pa ka twakasé lidé’y ka katjilé asou sé mové bagay-la mwen té ka fè. Anfen, nou ka enjwi pasé tan ansanm ka palé konsèné lanmityé nou pou Jéhova.

Délè, lè mwen chonjé kalité lavi-a mwen té ka viv avan, m’a sa kwè sé chanjman-an mwen té fè épi èd Jéhova. Mwen pa ni pyès dézi pou viv vyé lavi sala èvèk kouwi dèyè wichès ankò.

Si mwen pa té fè éfò pou swiv sé pwensip-la ki an Bib-la, swé mwen té kay mò èben mwen té kay an lajòl. Atjwèlman, mwen ni an bon lavi èk fanmi mwen ni lakontantman. I ka ban mwen an chay djèwté pou sèvi Jéhova épi madanm mwen èk fi mwen. Mwen ka wimèsyé Jéhova paski i mennen mwen anpanmi gwo fanmi’y ki ni an chay lanmityé. Vwéman, pa dé kontan mwen kontan on moun fè éfò pou enstwi mwen sa Bib-la ka di. Èk mwen apwésyé bèl pwivilaj-la mwen ni pou pwéché bon nouvèl-la èk édé lézòt apwann konsèné Bondyé. La pa ni asé mo pawòl pou dékwi mizi kontan mwen kontan Jéhova, pou tout sa i ja fè ban mwen.

[Blurb]

“Mwen apwann mannyè-a mwen ka viv lavi mwen sa fè Jéhova kontan èben fè’y lapenn”

[Picture]

Mwen té sa wè sé bon chanjman-an manman mwen té fè

[Picture]

Mwen épi madanm mwen èk fi mwen