BIB-LA KA CHANJÉ LAVI MOUN

Kisa an nomn ki sòti Scotland té twapé pli bon pasé léta-a i té ni-an? Kisa ki té édé an nonm ki sòti Brazil doubout kouwi vyé lavi èk doubout fimen kokén? Kisa ki pousé on nonm an Slovenia doubout bwè an chay wonm? Annou konsidiwé sa sé moun sala ni pou di.

“Pou mwen, lavi mwen té bon.”—JOHN RICKETTS

LANNÉ MWEN FÈT: 1958

PÉYI MWEN FÈT: SCOTLAND

AVAN: MWEN TÉ AN NONM BIZNIS ÈK MWEN TÉ KA FÈ AN CHAY LAJAN 

LAVI MWEN AN TAN PASÉ: Lavi mwen té bon lè mwen té ka lévé. Papa mwen té an òfisyé an lawmé Langlitè, èk pou sa fanmi mwen té ka viv an diféwan péyi. Apa di Scotland, nou té viv an Langlitè, Almany, Kenya, Malaysia, Ireland èk Cyprus. Lè mwen té (8) ywit lanné, mwen koumansé atandé èk wèsté adan an lékòl an Scotland. Apwé tan pasé, mwen fini inivèsité-a an Cambridge.

Lè mwen té (20) ven lanné, mwen koumansé twavay adan an gwo biznis, èk mwen fè sa pou ywit lanné. An biznis sala, nou té ka fè, vann èk voyé pétwol oliwon latè-a. An koumansman-an, mwen té twavay an Soud Lanméwik èk apwé mwen té twavay an Afwik èk Australia. Lè mwen alé wèsté Australia, mwen ouvè biznis mwen menm, mé apwé on lè mwen vann li.

Mwen té fè an chay lajan lè mwen vann biznis mwen. Konsa, lè mwen té (40) kawant lanné mwen doubout twavay. Mwen sèvi tan mwen pou voyajé. Dé fwa mwen kouwi motobayk mwen owon Australia, èk yon fwa mwen voyajé oliwon latè-a. Pou mwen, lavi mwen té bon.

MANNYÈ BIB-LA CHANJÉ LAVI MWEN: Avan mwen doubout twavay, mwen té vlé wimèsyé Bondyé pou lavi-a mwen té ka enjwi. Konsa, mwen koumansé alé Légliz Anglican paski sé la mwen té ka alé dépi mwen té piti. Mé m’a té satisfè épi sa yo té ka enstwi. Alò, mwen désidé pou étidyé Bib-la épi sé Mormon-lan, mé apwé on lè, mwen doubout paski yo pa té swiv sa Bib-la ka di.

Yon jou, Témwen Jéhova konyen asou lapòt mwen. La menm, mwen té sa wè tout sa yo ka enstwi bazé asou Bib-la. Yonn an sé lévanjil-lan yo moutwé mwen sé 1 Timòfi 2:3, 4. Sé vèwsé sala di Bondyé “vlé tout nomn sové épi vini konnèt lavéwité.” Sa ki vwéman touché mwen, sé mannyè Témwen Jéhova ka fè éfò pou édé moun konnèt lavéwité-a ki an Bib-la.

Létid Bib mwen épi sé Témwen-an té édé mwen pou apwann lavéwité-a ki an Bib-la. Pa ègzanp, mwen té apwann Bondyé èk Jézi pa menm moun-lan, sa vlé di yo pa Twa Pèwsonn an yon Dyé. Anfen, yo sé dé diféwan moun. (Jan 14:28; 1 Kòrint 11:3) Pa dé kontan mwen té kontan lè mwen apwann lavéwité sala! Mé, mwen té faché paski mwen té gaspiyé tout tan mwen ka éséyé konpwann an bagay ki té fo.

Touswit, mwen koumansé atandé mitin Témwen Jéhova. Sé fwè èk sè-a té byen janti èk yo té ka fè tout sa yo pé pou viv an ling épi pwensip Bib. Sa vwéman touché tjè mwen. Lanmityé-a anpami yo té fè mwen asiwé mwen té twapé wilizyon vwé-a.​—Jan 13:35.

MANNYÈ MWEN TWAPÉ BENNÉFIS: Apwé mwen té batizé, mwen jwenn an bèl madanm, non’y sé Diane. I té lévé kon on Témwen Jéhova, èk mwen té kontan sé bèl kawaktè-a i té ni. Apwé on lè, nou té mayé. Diané ka sipòté mwen èk i ka édé mwen pou wèsté fidèl bay Bondyé. Sa sé an kado hòd Jéhova.

Mwen èk Diane té ni an gwo dézi pou pwéché bon nouvèl-la an plas ki té bizwen pli pwoklanmatè. Konsa, an lanné (2010) dé mil dis, nou alé wèsté Belize. An péyi sala, nou ka pwéche bay moun ki enmen Bondyé èk ki vlé apwann pli konsèné’y.

Mwen ni lapé an lidé mwen èk tjè mwen paski mwen konnèt lavéwité-a konsèné Bondyé èk Pawòl li. Apwézan, mwen ka wann sèvis kon an piyonnè wéglé. Èk mwen té ni pwivilaj-la pou édé an pil moun apwann lavéwité-a èk dèdiké lavi yo bay Jéhova. La pa ni anyen ki pli bon pasé sa. Alafen, mwen twapé pli mèyè mannyè-a pou wimèsyé Bondyé pou tout sa mwen ka enjwi an lavi mwen.

“Yo té twété mwen byen.”—MAURÍCIO ARAÚJO

LANNÉ MWEN FÈT: 1967

PÉYI MWEN FÈT: BRAZIL

AVAN: MWEN TÉ KA KOUWI VYÉ LAVI

LAVI MWEN AN TAN PASÉ: Mwen té lévé an Avaré, an ti vil an São Paulo ki té byen dous. Pwèskè tout moun an vil sala té ka twavay.

Papa mwen mò lè mama mwen té ansent épi mwen. Lè mwen té an tibway, mwen té ka mété had manman mwen asou mwen lè i pa té la. Mwen koumansé fè kon an fanm èk moun té kwè mwen té an mal manman. Apwé an lè, mwen koumansé ni sèks épi tibway èk nonm.

Lè mwen té apipwé diznèf lanné, mwen té ka chaché pou nonm èk fanm pou kouché épi. Mwen té ka gadé pou yo an kabawé, an fèt, èk jik an légliz. Lè nou té ni kannaval, mwen té ka abiyé kon an fanm, èk mwen té ka dansé asou lawi-a épi sé moun-lan ki an lékòl samba. Anpil moun té konnèt mwen.

Mwen té jan épi mal manman, djanmèt èk moun ki ka pwan dwòg. Adan di yo té ankouwajé mwen pou sèvi kokén, èk mwen té vini yon èslav anba kokén. Délè, nou té ka fimen tout lannwit. Èk lòt lè, lè mwen té pa kò mwen, mwen té ka fimen kokén tout lajounen. Mwen té vini si tèlman mèg, moun té ka di mwen ni SIDA.

MANNYÈ BIB-LA CHANJÉ LAVI MWEN: A lè sala, mwen jwenn épi Témwen Jéhova. Yo té moutwé mwen jantiyès. Yonn an sé lévanjil-la yo té moutwé mwen sé Ronm 10:13, la i di: “Senyè-a kay sové népòt moun ki kwiyé asou nonʼy.” Sé pawòl sala té édé mwen wè mannyè i ènpotan pou sèvi non Jéhova. Plizyè fwa apwé mwen té fimen tout lannwit, mwen té ka ouvè finèt mwen épi dlo an zyé mwen èk mwen té ka sipliyé Jéhova pou édé mwen.

Mannyè-a mwen té ka viv lavi mwen té ka twakasé manman mwen anpil, èk i té pè mwen té kay mò. Sa té fè mwen lapenn, alò, mwen désidé pou doubout pwan dwòg. An ti tan apwé sa, mwen dakò pou étidyé Bib-la épi sé Témwen-an. Yo té ban mwen asiwans-lan ki, létid-la té kay fòtifyé détèminasyon mwen pou doubout sèvi dwòg; èk sé sa menm i té fè!

Pli mwen té étidyé Bib-la, sé pli mwen wéyalizé mwen té bizwen fè chanjman an lavi mwen. Mwen té ni pou doubout kouwi vyé lavi, mé sa pa té ézé pou mwen fè, paskè mwen té ka fè sé bagay sala dépi mwen té an tibway. Kanmenm, sa ki vwéman édé mwen sé, lè mwen doubout asosiyé épi mové konpanni èk lè mwen doubout alé an sé kabawé-a èk an fèt.

Magwé i pa té ézé pou fè sé chanjman sala, mwen té kontan pou apwann Jéhova mélé épi mwen, èk i vwéman konnèt mannyè mwen té ka santi. (1 Jan 3:​19, 20) An lanné (2002) dé mil dé, mwen doubout kouwi vyé lavi. Èk an menm lanné sala, mwen té batizé kon an Témwen Jéhova.

MANNYÈ MWEN TWAPÉ BENNÉFIS: Sé chanjman-an mwen té fè an lavi mwen pousé manman mwen pou koumansé étidyé Bib-la. Malèwèzman, i tonbé malad, i té ni an strok. Mé, i ka fè tout sa i pé pou kontiné fòtifyé wilasyon’y épi Jéhova.

I ni ywit lanné dépi mwen ka wann sèvis kon an piyonnè wéglé, èk mwen ka pasé pwèskè tout tan mwen ka enstwi lézòt konsèné Jéhova. Pou di’w lavéwité-a, mwen té ni pou goumen kont sé vyé dézi-a mwen té ni avan. Mé i ka soulajé mwen pou sav, mwen sa plè Jéhova lè mwen fè sé bagay-la ki ka ba’y tjè kontan.

Apwézan, mwen ni lakontanman èk mwen ni an pli mèyè lavi paski mwen ni an bon wilasyon épi Jéhova èk mwen ka viv an ling épi sé pwènsip li-a.

“Mwen té an wonmyé.”—LUKA ŠUC

LANNÉ MWEN FÈT: 1975

PÉYI MWEN FÈT: SLOVENIA

AVAN: MWEN TÉ KA BWÈ AN CHAY WONM

LAVI MWEN AN TAN PASÉ: Mwen té fèt an Ljubljana, an Slovenia. Lavi mwen té bon jistan mwen wivé (4) kat lanné. A lè sala, papa mwen tjwé kò’y. Apwé sa fèt, manman mwen té ni pou twavay wèd pou potjiwé ban mwen èk pli gwan fwè mwen.

Lè mwen té (15) kenz lanné, mwen alé wèsté épi gwanmanman mwen. Mwen té kontan wèsté épi’y paski sé jan mwen-an té ka wèsté tou pwé’y. Osi, mwen té ka fè sa mwen té vlé lè mwen té la. Lè mwen té (16) sèz lanné, mwen té koumansé asosiyé épi moun ki té ka bwè wonm an bout simenn-lan. Mwen té kité chivé mwen vin lonng, mwen té ka abiyé kon an wébèl, èk pli ta apwé, mwen koumansé fimen.

Magwé mwen té sèvi plizyè dwòg, mwen té kontan bwè wonm pli. An koumansman-an, mwen té ka bwè yonndé vè diven, mé apwé an tan, mwen té ka bwè pli pasé an boutèy. Mwen té ka bwè jistan mwen vini sou, mé pyèsonn pa té sav paski mwen té apwann mannyè pou séwé’y byen. Délè, sèl bagay-la ki té ka fè an moun sav mwen té ka bwè, sé lè yo pwan lòdè’y asou mwen. Mé pyèsonn pa té sav mwen té bwè apipwé (10) dis panyt diven ében labyè mélé èpi vodka!

Souvan, lè sé jan mwen-an èk mwen té alé an fèt, sé mwen ki té ka édé yo maché, magwé sé mwen ki té bwè pli wonm. Yon jou, mwen tann yonn an sé jan mwen-an di mwen sé an wonmyé. Sé pawòl sala vwéman kwazé tjè mwen paski sa sé an vyé èspwèsyon pou an moun ki ka bwè pli pasé lézòt.

Alò, mwen koumansé katjilé konsèné lavi mwen, èk mwen wéyalizé lavi mwen pa té ka fè sans. Èk sa té fè mwen dékouwajé, mwen té ka santi konmsi mwen pa té vo anyen.

MANNYÈ BIB-LA CHANJÉ LAVI MWEN: Diwan tan sala, mwen òbzòvé yonn an sé jan mwen-an té fè chanjman an lavi’y; i té vini pli dous. Mwen té vlé sav kisa ki té édé’y fè sé chanjman sala, alò, mwen envité’y pou manjé adan an wèstòwan épi mwen. Padan nou té ka palé, i di mwen i fè sé chanjman sala paski i té ka étidyé Bib-la épi Témwen Jéhova. I osi di mwen adan sé bagay-la i té ka apwann-lan. Paski m’a té lévé ka alé légliz, m’a té janmen tann sé bagay-la i té ka di mwen. Touswit apwé, mwen koumansé étidyé Bib-la épi sé Témwen-an èk atandé mitin.

Létid Bib mwen té édé mwen pou apwann sé bèl lavéwité-a ki an Bib-la. Pou ègzanp, mwen apwann nou ka viv an sa Bib-la ka kwiyé “dènyé tan-an.” (2 Timòfi 3:​1-5) Osi, mwen apwann Bondyé kay détwi sé méchan-an asou latè-a èk i kay bay sé moun-lan ki dwèt-la òpòtyounité-a pou viv pou tout tan adan an pawadi. (Sam 37:29) Sa mwen apwann-lan pousé mwen pou chanjé lavi mwen paski mwen té vlé vini yonn anpami sé moun-lan ki dwèt-la.

Mwen koumansé di sé jan mwen-an sé bèl lavéwité-a mwen té ka apwann an Bib-la. Mé yo pa té vlé tann mwen, yo té ka pwan mwen sèvi papicho. Pou di’w lavéwité-a, sa té an bennédiksyon pou mwen, paski sa moutwé mwen yo pa té vwéman mélé épi mwen. Mwen wéyalizé sé yo ki té ka enflouwansé mwen pou bwè an chay wonm. Sèl sa ki té enpòtan pou yo, sé pou vini sou an bout simenn-lan.

Konsa, mwen doubout asosiyé épi sé moun sala èk mwen koumansé fè jan épi sé Témwen-an. Lè mwen té épi sé Témwen-an mwen té ka twapé an chay ankouwajman. Yo sé moun ki sensè, yo vwéman enmen Bondyé èk yo té ka fè tout sa yo pé pou viv an ling épi sé pwensip-la ki an Bib-la. Ègzanp yo vwéman édé mwen paski mizi an mizi, mwen té sa doubout bwè an chay wonm.

MANNYÈ MWEN TWAPÉ BENNÉFIS: Mwen ka wimèsyé Jéhova an chay paski mwen pa ka dépan asou wonm pou mwen ni tjè kontan. Vwéman, mwen pa sav ki koté mwen té kay yé si mwen pa té chanjé lavi mwen. Mwen sav mwen ka viv an pli mèyè lavi apwézan.

I ni sèt lanné dépi mwen ka wann sèvis an lòfis bwanch Témwen Jéhova an Slovenia. Apwézan, lavi mwen ka fè an chay sans paski mwen ni an bon wilasyon épi Jéhova èk mwen ka sèvi’y.