• MWEN FÈT AN LANNÉ: 1963

• MWEN FÈT AN PÉYI: LANGLITÈ

• AVAN: MWEN TÉ KA ENJWI AN LÉTA KI TÉ NI GWO LONNÈ

LAVI MWEN AN TAN PASÉ:

Mwen té fèt Croydon, yon vil an Soud London. Pawan mwen té ni nèf ich, èk mwen té sizyenm-lan. Pawan mwen sòti St. Vincent an Kawayib-la. Manman mwen té ka atandé légliz Mètòdis. Magwé mwen té ni an dézi pou apwann diféwan bagay, m’a té ni pyès dézi pou apwann konsèné Bondyé. Lè lékòl té fèmé pou vakans, mwen té ka pwété plizyè liv hòd laybri-a pou li bo létan-an an vil mwen.

Déotwa lanné apwé mwen kité lékòl, mwen té vlé édé moun ki té bizwen èd. Konsa, mwen koumansé édé moun ki té ka wèsté asou lawi-a, moun ki té enfim èk moun ki té ni pwoblenm pou li èkwi. Apwé sa, mwen désidé pou alé inivèsité pou étidyé siyans. Lè mwen gradyouét, mwen té twapé plizyè twavay ki ni gwo lonnè. Mwen té ka fè an chay lajan èk pa dé bèl lavi mwen té bèl. Mwen té ka twavay pou kò mwen, èk sèl sa mwen té bizwen pou fè twavay mwen, sété an konpyouta èk intannèt-la. Wi, lavi mwen té dou. Souvan, mwen té ka alé lòt pèyi pou yonndé simenn. Mwen té ka wèsté adan an lotèl mwen té enmen an chay, paski la té ni koté pou fè lézèksis. Mwen té ka toujou fè lézèksis paski mwen té vlé tjenn kò mwen an fòm. Vwéman, mwen té kwè mwen té ka viv an bon lavi. Mé an menm di tan-an, m’a té janmen obliyé sé moun-lan ki té bizwen èd.

MANNYÈ BIB-LA CHANJÉ LAVI MWEN:

Pou plizyè lanné, mwen té ka katjilé ‘Pouki nou asou latè-a?’ Mé, m’a té janmen gadé pou sé wépons-lan an Bib-la. Yon jou, an lanné 1999, Margaret, pli jenn sésé mwen ki té an Témwen Jéhova vizité mwen épi jan’y. Jan sala té byen janti, i moutwé i té mélé épi mwen, èk sé sa ki pousé mwen pou aksèpté envitasyon’y pou étidyé Bib-la. Kanmenm, mwen pa té ka fè djè pwogwé paski léta mwen èk mannyè-a mwen té ka viv lavi mwen té ka pwan tout tan mwen.

An lanné 2002, mwen té alé adan an lòt vil an Soud Langlitè pou wèsté. Mwen té viyé inivèsité paski mwen té vlé vini an dòktè an siyans. A lè sala, mwen koumansé atandé mitin pli souvan épi jenn gason mwen. Magwé mwen té ka enjwi sa mwen té ka apwann an inivèsité-a, sa mwen té ka apwann an Bib-la té pli mèyè. Wézon-an sé paski i té ka édé mwen konpwann pouki la ni tèlman pwoblenm asou latè-a, èk ki mannyè Bondyé kay wanjé sé pwoblenm sala. Mwen té wéyalizé sa Mafyou 6:24 ka di sé lavéwité-a. Vwéman, nou pa sa sèvi dé mèt, swé nou sèvi Bondyé èben wichès. Konsa, mwen sav mwen té ni pou désidé kisa ki té pli enpòtan an lavi mwen.

An lanné-a 2001, mwen té ka atandé mitin souvan. A lè sala, Témwen Jéhova té ka jwenn ansanm kon an ti gwoup lakay an Témwen. Yo té ka étidyé liv-la Is There a Creator Who Cares About You?  a Sa mwen té apwann an sé mitin sala vwéman ouvè zyè mwen èk mwen té asiwé sé sèlman Kwéyatè nou Jéhova, ki sa wanjé tout pwoblenm lézòm. An inivèsité-a, yo té ka enstwi mwen pou pa kwè adan an Kwéyatè. Sé lésisyon sala té fè mwen faché. Konsa, apwé dé mwa, mwen kité inivèsité-a èk mwen désidé pou fè éfò pou vansé pli pwé Bondyé.

Lévanjil-la ki pousé mwen pou chanjé lavi mwen sé Pwovèb 3:5, 6, i di: “Konfyé Jéhova épi tout tjè’w, èk pa dépan asou lasajès ou. Chonjé’y an tout sa ou ka fè, èk i kay fè tout bagay maché byen an lavi’w.” Vwéman, kon an dòktè an siyans mwen té ni an gwo pozisyon èk mwen té ka fè an chay lajan, mé sa mwen té ka apwann konsèné Bondyé té ka ban mwen pli satisfaksyon. Wi, pli mwen apwann konsèné divwa Jéhova pou latè-a, èk mannyè Jézi sakwifyè lavi’y ban nou, sé pli mwen té vlé dédiké lavi mwen bay Kwéyatè nou. Konsa, mwen té batizé an Avwi, lanné 2003. Apwé sa, mizi an mizi mwen koumansé fè lavi mwen pli senp.

MANNYÈ MWEN TWAPÉ BENNÉFIS:

Wilasyon mwen épi Jéhova byen valowab. Wi, paski mwen konnèt Jéhova mwen ni lapé èk djéwté an lavi mwen. Osi, mwen ni tjè kontan lè mwen ka asosiyé épi sé fwè èk sè mwen-an.

Sa mwen ka apwann an Bib-la èk an sé mitin-lan ka vwéman satisfè dézi mwen pou nòlaj. Apwézan, léta mwen sé pou pwéché bon nouvèl-la bay lézòt moun. Mwen kontan’y an chay paski mwen sa vwéman édé moun pou wè yo sa ni an pli mèyè lavi dépi apwézan, èk yo sa ni bèl èspwa pou viv pou tout tan an latè nèf-la. An Jen lanné 2008, mwen vini on piyonnè wéglé. Mwen ni pli djèwté èk satisfaksyon an lavi mwen. Wi, lavi mwen vwéman ni lakontanman, èk pa dé apwésyé mwen ka apwésyé Jéhova pou sa.

• MWEN FÈT AN LANNÉ: 1973

• MWEN FÈT AN PÉYI: AUSTRIA

• AVAN: MWEN TÉ KA PAYÉ

LAVI MWEN AN TAN PASÉ:

Mwen té lévé an Brauna an ti vil an Austria. An vil sala moun té wich, èk la pa té ni kwim. Fanmi mwen té katolik èk yo té lévé mwen an wilizyon sala.

Lè mwen té an jenn tibway an bagay té fèt ki té chanjé lavi mwen. An lanné 1984, lè mwen té apipwé 11 lanné, mwen chonjé mwen té ka jwé foutbòl épi yonn an sé jan mwen-an. Èk menm apwémidi sala, i mò adan an mové aksidan. Lè mwen tann i mò, sa vwéman soukwé mwen. Pou plizyè lanné apwé aksidan-an, mwen té ka katjilé kisa ki ka wivé nou lè nou mò.

Lè mwen kité lékòl, mwen té ka twavay kon an élèktrisyen. Osi, mwen té ni labitid-la ka payé pou an chay lajan. Magwé mwen té ka payé, m’a té ni pyès dèt. Èk mwen té ka pasé an chay tan ka jwé spò èk mwen té enmen kouté mizik yo ka kwiyé “heavy metal” èk “punk rock”. An plis di sa, mwen té kontan alé dansé èk an fèt. Mwen té kontan plézi latè-a èk mwen té ka viv an vyé lavi. Wi, mwen té kwè kalité lavi sala té kay ban mwen tjè kontan, mé an bagay té ka vwéman mantjé an lavi mwen.

MANNYÈ BIB-LA CHANJÉ LAVI MWEN:

An lanné 1995, an gwan nonm ki té Témwen Jéhova konyen asou lapòt mwen èk i ofè mwen an liv ki té ka diskité wépons Bib-la pou kwèsyon-an, Kisa ki ka wivé nou lé nou mò? Paski lanmò jan mwen-an té téwib èk i té ka afèkté mwen toujou, mwen pwan liv-la. M’a té annik li chapit-la ki té ka palé konsèné lanmò selman, mé mwen li tout liv-la!

Sa mwen té li an liv sala wéponn sé kwèsyon-an mwen té ni konsèné lanmò èk lòt bagay. Ou wè, paski mwen té lévé kon an Katolik, adowasyon mwen té bazé sèlman asou Jézi. Kanmenm, létid Bib mwen té édé mwen pou vansé pwé Jéhova, Papa Jézi. Mwen té vwéman entonnèn pou konnèt Jèhova mélé épi nou èk i vlé nou ni an bon wilasyon épi’y. (Mafyou 7:7-11). Mwen apwann Jéhova sé an Dyé ki ni santiman. Osi, mwen apwann i ka toujou tjenn pawòl li. Konsa, sa vwéman pousé mwen pou ègzanminé sé pwofèsi-a ki an Bib-la sitou mannyè-a yo akonpli. Sa mwen té apwann fòtifyé lafwa mwen an Bondyé.

Mwen wéyalizé sé Témwen Jéhova sèlman ki vwéman vlé édé moun konpwann sa Bib-la ka enstwi. Konsa, sa pousé mwen pou fè pli wichach. Mwen té ka konpawé sé lévanjil-la ki an sé piblikasyon sé Témwen-an épi Bib Katolik mwen. Pli mwen té étidyé, sé pli mwen té wéyalizé mwen té twapé lavéwité-a.

Létid Bib mwen té enstwi mwen ki, Jéhova vlé mwen viv lavi mwen an ling épi sé pwensip li-a. Éfèsòs 4:22-24 té édé mwen pou wè mwen té ni pou fè chanjman an lavi mwen. La i di, “mété dèyè do zòt vyé kawaktè zòt-la, paski vyé mannyè sala zòt té ka viv avan-an té ka détwi lavi zòt ... épi zòt sipozé mété an kawaktè ki nèf, épi kawaktè sala Bondyé menm ki fèʼy pou zòt sa viv kon li menm ka viv-la.” Sé vèwsé sala pousé mwen pou doubout kouwi vyé lavi, èk doubout payé paski labitid sala té ka ankouwajé mwen pou kouwi dèyè wichès latè-a èk i té ka sipòté vowasité. (1 Kòrint 6: 9,10) Osi, mwen té sav pou kontiné fè sé chanjman sala mwen té ni pou doubout asosiyé épi sé jan mwen-an èk fè jan épi moun ki té kay édé mwen fè sa ki dwèt.

I pa té ézé pou fè sé chanjman sala. Mé mwen koumansé atandé mitin èpi sé Témwen-an an Lasal Wéyòm-lan èk mwen koumansé fè jan épi sé fwè èk sè-a an kongwigasyon-an. Osi, mwen kontiné fè tan pou étidyé Bib-la pa kò mwen. Sé démach sala té édé mwen pou chanjé kalité mizik-la mwen té ka kouté, pou chanjé sé bagay-la mwen té vlé fè épi lavi mwen èk osi, pou chanjé lapawans mwen. An lanné 1995, mwen té batizé kon yon Témwen Jéhova.

MANNYÈ MWEN TWAPÉ BENNÉFIS:

Apwézan, mwen ni an diféwan katjil konsèné lajan èk wichès latè-a. Mwen wéyalizé nou bizwen lajan èk lòt bagay pou viv mé sa pa vlé di yo sé pli enpòtan bagay-la an lavi. Avan mwen té ka vini faché vit mé apwézan mwen vini pli dous. Osi, m’a ka twakasé lidé mwen konsèné sa ki kay fèt an tan pou vini ankò.

Pa dé kontan mwen kontan mwen anpami moun oliwon latè-a ki ka sèvi Jéhova ansanm. La ni fwè èk sè ki ka débat èpi an chay pwòblenm mé yo ka kontiné wèsté fidèl pou Jéhova. Mwen si tèlman kontan mwen ka sèvi tout tan mwen èk kouway mwen pou adowé Jéhova èk pou fè bon bay lézòt pito mwen plè kò mwen.

• MWEN FÈT AN LANNÉ: 1963

• MWEN FÈT AN PÉYI: LANGLITÈ 

• AVAN: MWEN TÉ DÉZAPWENTÉ ÉPI LAVI

LAVI MWEN AN TAN PASÉ:

Mwen té fèt an Langlitè mé lè mwen té 7 lanné fanmi mwen kité Langlitè èk nou alé Australia. Nou té ka wèsté bò lanmé-a adan an vil yo ka kwiyé Queensland. Fanmi mwen pa té ni an chay bagay mé nou té toujou ni sa nou té bizwen.

Magwé sa, m’a té ni tjè kontan, mwen té dézapwenté épi lavi. Papa mwen té toujou sou, i pa té ka fè tan pou mwen èk i té ka maltwété manman mwen. Konsa, mwen pa té ni an bon wilasyon épi’y. Apwé plizyè lanné, mwen té apwann i té soufè an chay lè’y té an sòlda an Malaya. Sa té édé mwen konpwann pouki i té ka twété nou kon sa.

Lè mwen té an lékòl sèkondè mwen koumansé bwé wonm wéglé. Èk lè mwen té 16 lanné mwen kité lékòl pou mwen sa vini an sòlda an lawmé-a. A lè sala, mwen koumansé bwé pli wonm èk sèvi diféwan dwòg. Pou di’w lavéwité-a, mwen té vini an èslav pou wonm èk tabak.

Lè mwen té apipwé 20 lanné, mwen té koumansé katjilé konsèné Bondyé. Mwen té mandé kò mwen: ‘Si la ni an Dyé, pouki i ka pèwmité moun pou soufè èk mò?’ M’a té kwè la té ni an Dyé. Anfen, mwen té ka jis ékwi powenm pou blamé Bondyé pou tout sé mové bagay-la ki té ka fèt asou latè-a.

Mwen kité lawmé-a lè mwen té 23 lanné. Apwé sa, mwen té twavay an diféwan plas. Mwen té jis alé lòt pèyi pou yon lanné. Magwé sa, mwen té ka toujou santi an bagay té ka mantjé an lavi mwen. Mwen té dékouwajé an chay, anyen pa té ka fè mwen kontan. M’a té ni gou pou fè anyen. Lavi mwen pa té ka fè sans. M’a té mélé si mwen té ni an kay, si mwen té ni an bon twavay èben si mwen té ka fè an pil lajan. Sèl bagay ki té ka “soulajé” mwen sé lè mwen té ka bwé wonm èk lè mwen té ka kouté mizik.

Mwen sa chonjé jou-a lè mwen té ni an gwo dézi pou twapé wépons-la pou kwèsyon-an, ‘pou ki wézon lézòm ka soufè?’ A lè sala, mwen té an Poland, mwen té ka vizité an pwizon an Auschwitz. Avan, mwen té li konsèné sé kwiyoté-a sé moun-la an pwizon sala té éspéyansé mé lè mwen wè’y épi dé zyè mwen, sa kwazé tjè mwen. Mwen pa té sa konpwann ki mannyè lézòm té sa maltwété yonn a lòt kon sa. Mwen ka chonjé sèl sa mwen té sa fè, sé maché an pwizyon-an épi dlò an zyè mwen, ka mandé, ‘Pouki?’

MANNYÈ BIB-LA CHANJÉ LAVI MWEN:

An lanné 1993, mwen viwé Austrailia èk mwen désidé pou li Bib-la pou twapé sé wépons-lan pou sé kwésyon-an mwen té ni. Touswit apwé, dé madanm Témwen Jéhova vizité mwen. Yo ban mwen on envitasyon pou atandé on konvasyon adan an savann yo té ka jwé foutbòl ki té pwé kay mwen. Mwen désidé pou alé.

Déotwa mwa avan, mwen té alé an savann sala pou wè foutbòl. Mwen té sa wè diféwans-lan. An konvasyon-an, sé Témwen-an té janti, yo té byen abiyé èk jik sé ich yo-a té ka konpòté kò yo byen. Mé, sa ki vwéman touché mwen sé sa mwen wè diwan déjinen. La té ni plizyè san Témwen ka manjé an savann-lan, mé lè yo viwé an chèz yo m’a té wè yon ti moso zòdi an savann-lan. An plis di sa, sé moun-lan té ka sanm yo té ni tjè kontan èk lapé. Sa sé ègzatikman sa mwen té vlé. Mwen pa té chonjé sé diskou-a, mé mwen pa kay janmen obliyé mannyè-a sé Témwen-an konpòté kò yo.

Swè sala, mwen chonjé kouzen mwen ki té li Bib-la èk ki té ègzanminé diféwan wilizyon. Plizyè lanné avan, i té di mwen Jézi di ou kay konnèt wilizyon ki vwé an sa yo ka fè. (Mafyou 7:15-20) Mwen té détèminé pou konnèt kisa ki té ka fè Témwen Jéhova si tèlman diféwan. Pou pwémyè fwa an lavi mwen, mwen té ni èspwa.

Simenn-lan apwé, sé Témwen-an ki té envité mwen pou konvasyon-an witounen lakay mwen. Yo ofè pou étidyé Bib-la épi mwen èk mwen dakò. Osi, mwen koumansé atandé sé mitin-lan épi yo.

Létid Bib mwen té édé mwen pou chanjé lopinyon mwen konsèné Bondyé. Mwen té apwann sé pa Bondyé ki ka fè moun soufè, èk sé pa li ki ka annèkoz mové bagay fèt. Anfen, tjè Bondyé ka kwazé lè moun ka fè mové bagay. (Jennésis 6:6; Samz 78:40, 41) Mwen té détèminé pou pa janmen fè anyen pou kwazé tjè Bondyé. Mwen té vlé fè tjè’y wéjwi. (Pwovèb 27:11) Konsa, mwen doubout bwè an chay wonm, mwen doubout sèvi tabak èk mwen doubout kouwi vyé lavi. An Mas lanné 1994, mwen té batizé kon on Témwen Jéhova.

MANNYÈ MWEN TWAPÉ BENNÉFIS:

Apwézan lavi mwen ni valè èk mwen vwéman ni tjè kontan. Mwen pa ka bwè wonm pou aji épi pwòblenm mwen ankò. Pito sa, mwen apwann pou voyé tout twaka mwen asou Jéhova.​—Samz 55:22.

Mwen ja mayé pou dis lanné. Mwen ni an bèl ti madanm, non’y sé Karen, èk mwen ni an fi ki joli, non’y sé Nella. Nou tout ka sèvi tan nou pou pwéché bon nouvèl-la, èk pa dé kontan nou kontan pou édé moun vin konnèt Dyé nou, Jéhova. Alafen, lavi mwen ni valè.