Mwen té fèt an Santo Domingo, Dominican Republic. Pawan mwen té ni kat ich èk sé mwen ki té dènyé. Pawan mwen té byen endiké èk yo té vlé ich yo ni an bon endikasyon tou. Èvèk yo té vlé lévé nou anpami moun ki bon èk onnèt. Kat lanné avan mwen té fèt, pawan mwen té jwenn épi sé misyonè Mormon-lan. Pawan mwen té kontan wè mannyè sé jenn nonm-lan té byen abiyé, èk mannyè yo té ni bon mèss, konsa, yo désidé pou antwé an wilizyon sala.

Lè mwen té ka lévé mwen té kontan sé anmizman-an an légliz-la. Osi, mwen té apwésyé mannyè légliz-la té fiksé asou fanmi-an èk mannyè yo té ka ankouwajé fanmi pou viv an lavi ki nèt. Pa dé kontan mwen té kontan mwen sété an Morman. Alò, mwen désidé pou vini an misyonè Mormon.

Lè mwen té (18) dizwit lanné, fanmi mwen alé wèsté Lanméwik pou mwen sa atandé an bon inivèsité. Yon lanné apwé, tantant mwen épi mawi’y, ki sé Témwen Jéhova vizité nou an Florida. Yo envité nou pou atandé an konvansyon épi yo. Sa ki té vwéman touché tjè mwen an konvansyon-an, sé lè mwen wè tout moun té ka sèvi Bib yo, èk yo té ka ékwi ti nòt. Konsa, lè mwen wè sa, mwen mandé tantant mwen pou an mòso papyé pou mwen ékwi osi.

Apwé konvansyon-an tantant mwen èk mawi’y di mwen paski mwen té vlé vini yon misyonè, yo té kay étidyé Bib-la épi mwen. Mwen té kontan sa paski an tan sala, mwen té pli okouwan épi liv Mormon-lan pasé Bib-la.

Tantant mwen èk mawi’y té ka étidyé Bib-la épi mwen asou tèléfon-lan. Yo té ka toujou ankouwajé mwen pou konpawé sa mwen té ka kwè adan épi sa Bib-la ka enstwi. Yo té vlé mwen fè asiwé pou kò mwen sa Bib-la ka enstwi sé lavéwité-a.

Mwen té aksèpté an chay bagay sé Mormon-lan té ka kwè adan, mé m’a té sav si sé bagay sala té ka dakò épi sa Bib-la ka di. Alò, tantant mwen voyé mwen yon magazin Awake! Témwen Jéhova té pibliyé an 8 Novanm, 1995. Magazin sala té ni déotwa atik asou wilizyon Mormon-lan. Sé atik sala fè mwen wéyalizé m’a té konnèt an chay enstwiksyon sé Mormon-lan. Konsa, sa té pousé mwen pou fè wichach asou wèbsayt Mormon-lan. Mwen té vlé fè asiwé si sa mwen té li an magazin-lan té vwé. Mwen té wè sa magazin-lan té di sété lavéwité-a. An plis disa, lè mwen té vizité museum Mormon an Utah sa ban mwen pli pwèv ki, sa magazin-lan té di-a té vwé.

Mwen té toujou kwè liv Mormon-lan èk Bib-la té ka dakò. Mé lè mwen koumansé fouyé Bib-la, mwen té wè sa wilizyon Mormon té ka enstwi pa té ka dakò épi sa Bib-la ka di. Pou egzanp, an Izikèl 18:4, Bib-la di lam-lan ka mò. Kanmenm, liv Morman-lan an Alma 42:2 di: “Lam-lan pa sa janmen mò.” 

An plis disa, sa ki té distwé mwen plis sé sa: wilizyon Mormon té ka enstwi èk ankouwajé lézòt pou sipòté Lanmèwik. Pou ègzanp, yo ka enstwi ki jaden Édenn té Lanméwik. Osi, sé chèf wilizyon-an di Bondyé kay sèvi gouvèdman Lanméwik pou kondwi tout latè-a. Èk lè Bondyé koumansé kondwi, i kay bazé pwensip li asou libèté èk dwa lézòm.”

Sa fè mwen katjilé konsèné kisa légliz Mormon-lan té ka enstwi ki kay wivé lòt péyi, sitou péyi-a mwen té fèt. Alò, lè an jenn Mormon ki té ka entwennen pou vini an misyonè kwiyé mwen asou téléfòn-lan, mwen lévé sijé sala. Mwen mandé’y fwanchman, ès i té kay goumen kont lòt Mormon si péyi’y èk péyi yo ka goumen? Lè i di mwen wi, mwen té wèsté bouch gwan ouvè! Konsa, sa pousé mwen pou fouyé pli fon an entwiksyon wilizyon mwen. Osi, mwen mandé sé moun-lan ki té ka pwan douvan an Légliz-la konsèné se bagay-lan mwen té ka apwann. Yo té di mwen sé wépons-lan pou sé kwèsyon mwen-an sété an mistè èk yon jou klèté-a kay vini pli bwiyan.

Mwen pa té kontan sa yo té di mwen pyès, alò, mwen désidé pou ègzanminé kò mwen èk wézon-an mwen té vlé vini on misyonè. Vwéman, mwen wéyalizé wézon-an mwen té vlé vini an misyonè sé paski mwen té vlé édé lézòt moun. Èk osi, mwen té vlé moun wèspèkté mwen. Mé pou di’w lavéwité-a, mwen pa té konnèt anyen konsèné Bondyé. Mwen té li Bib-la plizyè fwa avan, mé mwen pa té vwéman ni apwésiyasyon pou’y. Anfen, mwen pa té menm sav pou ki wézon nou asou latè-a.

Gwanmèsi létid Bib mwen épi Témwen Jéhova mwen té apwann an chay bagay. Pou ègzanp mwen apwann non Bondyé sé Jéhova, mwen apwann kisa ki ka wivé nou lè nou mò, èk mwen apwann mannyè Jézi ka akonpli divwa Bondyé. Mizi an mizi, mwen té ka vini apwann sé bèl bagay-la ki an Bib-la. Osi, mwen té kontan patajé sé lavéwité-a mwen té ka apwann épi lézòt moun. Mwen té ka toujou kwè an Bondye, mé apwézan mwen sa pwédyé ba li paski i sé pli bon jan mwen. Konsa, mwen té batizé kon an Témwen Jéhova li douz (12) Jwiyèt an lanné dé mil kat (2004). Èk sis mwa apwé, mwen koumansé piyonnè wéglé.

Pou senk lanné, mwen té wann sèvis an pwensipal òfis Témwen Jéhova an Brooklyn, New York. Mwen si tèlman kontan mwen té ni pwivilaj-la pou édé pwodwi Bib èk piblikasyon ki bazé asou Bib-la paski yo ka édé plizyè milyon moun owon latè-a. Èk jòdi-a, mwen ka kontiné édé lézòt moun apwann konsèné Bondyé. Pa dé kontan mwen kontan!