Dépi mwen té tou piti mwen enmen nati. Byen souvan, fanmi mwen té ka vizité sé lafowé-a èk sé bèl létan-an ki an Finland, péyi-a ko nou té ka wèsté. Mwen osi enmen zannimo an chay. Lè mwen té manmay, mwen té vlé anbwasé tout chat èk chyen mwen té wè! Mé lè mwen vini pli gwan, sa distwé mwen an pil lè mwen wè mannyè moun ka abizé zannimo. Apwé an tan, mwen antwé adan yon ògannizasyon ki ka défann dwa zannimo. La, mwen té jwenn épi moun ki mélé épi zannimo menm kon mwen.

Nou té ka fè fòs kò nou ka goumen pou dwa zannimo. Pa ègzanp, nou té ka pasé bay moun enfòmasyon. Osi, nou té ka ògannizé èk potèsté kont biznis ki ka vann bagay ki fèt épi pwèl ében lapo zannimo. Apa di sa, nou té ka potèsté kont plas koté moun ka sèvi zannimo pou tès wimèd ki nèf. Nou té jis fòmé yon ògannizasyon nèf pou pwotéjé zannimo. Èk paski nou pa té ka kité anyen anpéché nou pwotéjé sé zannimo-a, nou té ka toujou twapé kò nou douvan sé lotowité-a. Yo té awété mwen plizyè fwa èk yo té pòté mwen lodyans.

Sé pa zannimo sèlman mwen té mélé épi, lòt pwòblenm an latè-a té ka anbété mwen osi. Apwé an tan, mwen koumansé twavay épi plizyè lòt ògannizasyon. Anpami yo sété ògannizasyon tèl kon sa yo kwiyé Amnesty International èvèk Greenpeace. Mwen té ka sèvi tout kouway mwen pou sipòté aktivité yo té ka ni. Mwen té ka goumen pou dwa lé pòv, dwa moun ki ka mò fen, èk dwa maléwé.

Kanmenm, kon tan pasé, mwen vin wéyalizé mʼa sa chanjé bagay an latè-a. Menm si sé ògannizasyon sala té sa wanjé yonn dé ti pwòblenm, i sanm sé gwo pwòblenm-lan té ka vini pli mové jou pa jou. Sé konmsi movèzté té ka manjé latè-a, èk pyèsonn pa té mélé. Mwen té santi dé bwa mwen té kasé.

Paski mwen pa té sa fè anyen pou chanjé sitiwasyon-an, sa té fè mwen twis. Kon sa, mwen koumansé mété lidé mwen asou Bondyé épi asou Bib-la. Mwen té ka étidyé Bib-la épi Témwen Jéhova avan, èk mwen té vwéman apwésyé mannyè yo té twété mwen. Kanmenm, mwen pʼòkò té pawé pou chanjé mòd lavi mwen. Mé kou sala, bagay té diféwan.

Alò mwen koumansé li Bib mwen. Sa mwen té li an Bib-la soulajé mwen an pil. Sé konmsi bobo mwen té djéwi. Mwen té li plizyè vèwsé an Bib-la ki di nou sipozé twété zannimo byen. Pa ègzanp, Pwovèb 12:10 di: ‘bon moun ka gadé apwé zannimo yo.ʼ (Good News Translation) Apa di sa, mwen vin konpwann sé pa Bondyé ki ka annékòz sé pwòblenm-lan ki an latè-a. Okontwè, bagay ka vini pli mové paski majòwité moun pa ka fè sa Bondyé di. Sa vwéman touché tjè mwen lè mwen apwann mannyè Jéhova enmen nou èk i ka pwan pasyans épi nou.—Sam 103:8-14

Owon menm tan sala, mwen té plen an fòm pou mandé Témwen Jéhova voyé yon liv ban mwen. Tit liv la sété: Sa Nou Sa Apwann An Bib-la. Pa djè tan apwé, dé Témwen Jéhova, yon misyé èk madanm li, vizité mwen lakay mwen èk yo ofè mwen on Létid Bib. Mwen té aksèpté. Mwen té osi koumansé atandé mitin an Lasal Wéyòm-lan. An wézon di sa, lavéwité-a koumansé touché tjè mwen plis toujou.

Gwanmèsi sa mwen apwann an Bib-la, mwen té sa fè an pil chanjman an lavi mwen. Mwen doubout fimen èk mwen doubout bwè an chay. Mwen chanjé mannyè mwen té ka abiyé èk mwen doubout di vyé mo sal. Osi, mwen koumansé pòté moun ki an lotowité wèspé. (Ronm 13:1) An plis di sa, mwen doubout kouwi vyé lavi sal-la mwen té ka kouwi-a.

Chanjman-an ki té pli difisil pou mwen fè, sété pou doubout sipòté sé ògannizasyon-an ki ka défann dwa moun èk dwa zannimo. Èk i pwan an chay tan pou mwen fè sa. Anfen, mwen té ka santi, si mwen té kité sé ògannizasyon sala, sé konmsi mwen té ka twayi yo. Kanmenm, mwen vin wéyalizé, sé Wéyòm Bondyé sèlman ki sa wanjé sé pwòblenm-lan ki an latè-a. Alò, mwen désidé pou sèvi tout kouway mwen pou sipòté Wéyòm sala, èk édé lòt moun apwann mannyè yo sa sipòtéʼy tou.—Mafyou 6:33.

Lè mwen té ka éséyé chanjé bagay an latè-a, mwen té kwè la té ni dé gwoup moun tousèl; bon moun èk mové moun. Èvèk mwen té pawé pou goumen kont sé moun-nan mwen té kwè ki mové. Mé gwanmèsi Pawòl Bondyé, mʼa hayi moun ankò. Pito sa, mwen ka éséyé enmen tout kalité moun. (Mafyou 5:44) Yon mannyè mwen ka moutwé mwen enmen moun, sé lè mwen patajé bon nouvèl-la konsèné Wéyòm Bondyé épi yo. Mwen kontan wè mannyè twavay sala ka édé moun ni djèwté èk viv an lapé. Mwen osi kontan wè mannyè i ka bay yo bon èspwa.

Atjwèlman mwen ni lapé an lidé mwen, paski mwen apwann kité tout bagay an lanmen Jéhova. Sé li ki fè nou, kon sa, mwen asiwé i pa kay janmen kité moun maltwété zannimo èk lézòm pou tout tan. Mwen osi sav, i pa kay kité moun détwi bèl latè nou-an. Okontwè, i kay sèvi Wéyòm li pou wanjé tout donmaj-la moun ja fè. (Izaya 11:​1-9) Pa dé kontan mwen kontan mwen vin konnèt sé lavéwité sala. Èk, mwen kontan mwen sa édé lòt moun mété lafwa an yo osi. Apwézan mwen pa ka santi sé mwen ki ni pou chanjé latè-a.