Imajiné an papa ka pwan an ti maché épi gasonʼy ki ni sétan. Papa-a di gason-an: “An chay an chay tan ki pasé, Bondyé fè latè-a èk tout sa ki asouʼy. I osi fè sòlèy-la, lalin-lan, èk sé étwal-la.” Tibway-la katjilé pou an ti monman èk i mandé papaʼy: “Papa, ki moun ki fè Bondyé?”

Papa-a wéponn: “Pyèsonn pa fè Bondyé. I té toujou la.” Pou apwézan, senp ti wépons sala asé pou ti gason-an. Kanmenm, kon tibway-la ka vini pli gwan, kwèsyon sala koumansé anbétéʼy ankò. I pa sa konpwann ki mannyè an moun pa té ni an koumansman. Jis inivès-la ki té ni an koumansman. Kon sa, i di an lidéʼy: ‘Ki koté Bondyé sòti?ʼ

Ki sa Bib-la ka di asou sa? Ében, Bib-la ka bay pwèskè menm wépons-lan papa-a té bay ti gasonʼy-lan. Mi sa pwofèt-la Moziz té ékwi an Sam 90:1, 2: “[Jéhova,] . . . dépi avan ou fè sé mòn-an, èk avan ou fè latè-a èk tout sa ki andidanʼy, ou té toujou Bondyé èk ou kay toujou Bondyé pou tout tan.” Osi, an Izaya 40:28 pwofèt Izaya té di: ‘Ès ou pa konnèt? Ès ou pʼòkò tann? Jéhova, Kwéyatè tout latè-a, sé an Dyé pou tout tanʼ! Apa di sa, Joud vèwsé 25 di Bondyé ka ègzisté “dépi avan tan koumansé.”

Sé vèwsé sala ka dakò épi mannyè zapòt Pòl dékwi Bondyé an 1 Timòfi 1:17. Pòl di Bondyé sé “wa pou tout tan.” Sa vlé di, Bondyé ka toujou ègzisté; I té toujou la an tan pasé èk i kay kontiné ègzisté an tan ki ka vini. (Wévélasyon 1:8) Alò, sa sé yon bagay ki ka moutwé a klè, sé li ki Toupisan-an.

Pou ki wézon sa otan difisil pou nou konpwann? Paski lavi nou byen kout lè nou konpawéʼy épi kantité tan Jéhova la; nou pa ka wè tan menm mannyè Jéhova ka wèʼy. Ou wè, paski Jéhova toujou la, yon jou menm kon yon mil lanné pou li. (2 Pita 3:8) Annou pwan yon ègzanp. Londjè lavi yon kwitjèt sé senkant (50) jou. Mé ès kwitjèt sala sa konpwann sa i vlé di pou an moun viv swasant dis (70) ében katwiven (80) lanné? Janmen! Kanmenm, Bib-la ka èspityé, nou menm kon kwitjèt, lè nou konpawé londjè lavi nou épi sa Gwan Kwéyatè nou. Jis abilité nou pou wézonnen ki byen pé lè nou konpawéʼy épi abilité kwéyatè nou pou wézonnen. (Izaya 40:22; 55:8, 9) Alò, sa pa sipozé sipwi nou si la ni sèten bagay konsèné Bondyé nou pa sa fini konpwann.

Magwé nou pa sa fini konpwann ki mannyè Bondyé toujou la, nou ka wè, sa ka fè sans. Si on lòt moun té fè Jéhova, sé moun sala ki té kay Kwéyatè-a. Mé, an Wévélasyon 4:11, Bib-la di sé Jéhova ki “fè tout bagay.” Apa di sa, nou sav la té ni an tan, inivès-la pa té ka ègzisté. (Jennésis 1:1, 2) Ki moun ki fèʼy? Ében, ès ou pa kay dakò Moun-nan ki fèʼy-la té ni pou la avan? Oblijé! Moun sala té osi la avan sèl Gasonʼy èk sé nanj-lan. (Jòb 38:4, 7; Kòlòsé 1:15) Alò, sa byen klè, Kwéyatè-a té la avan, èk i té la pa kòʼy. Pyèsonn pa té fèʼy; la pa té ni anyen ki té la avanʼy pou fèʼy.

Alò, tout sa ka moutwé la ni an Bondyé ki ka ègzisté dépi avan tan koumansé. Sé li yonn ki té sa fè inivès-la, mété lwa pou kontwoléʼy, èk bay tout bagay lavi.—Jòb 33:4.