Mwen té fèt an Paddington, yon pawès an London, Langlitè. An chay moun ka viv an vil sala. Mwen té ka wèsté épi manman mwen èk twa pli gwan sésé mwen. Papa mwen pa té toujou la pou nou paski i té ka bwè an chay wonm.

Dépi mwen té an tifi, manman mwen té ka moutwé mwen pou pwédyé touléswè. Mwen té ni an ti Bib ki té ni sé Samz-lan sèlman adan’y, èk mwen té fè mizik épi yo pou mwen chanté. Mwen chonjé kéchòy mwen té li adan an liv ki té wèsté an lidé mwen. I di: “Yon jou, la pa kay ni an denmen.” Sé pawòl sala té anpéché mwen dòmi lé swè, paski mwen té ka katjilé konsèné tan ki ka vini. Mwen mandé kò mwen: ‘Ès lavi sala sé tout?’ ‘Pou ki wézon mwen asou latè-a?’ Mwen pa té vlé mò!

Mwen té vlé konnèt pli konsèné tjenbwa èk maji nwè. Konsa, mwen épi sé jan mwen-an té ka éséyé palé épi moun ki mò, nou té ka alé an senmityè-a èk nou té ka gadé pòtwé ki té ni pou fè épi tjenbwa. Pou nou, sé bagay sala té byen entéwésan èk yo té bon anmizman, mé an menm di tan, yo té ka fè nou pè.

Lè mwen té 10 lanné, mwen koumansé wébèlé. Mwen koumansé fimen tabak èk byen vit mwen té vini an èslav pou li. Pli ta, mwen koumansé fimen zèb. Lè mwen té 11 lanné, mwen koumansé bwè wonm. Èk magwé m’a té enmen gou-a, mwen té enmen mannyè-a i té ka fè mwen sou. An plis di sa, mwen té enmen kouté mizik èk dansé. Konsa, népòt lè mwen té jwenn on ti chans, mwen té ka alé an fèt. Lé swè, mwen té ka mawon kay manman mwen èk déviwé douvan jou. Li denmen mwen té ka las, konsa, souvan mwen té ka mawon lékòl. Èk lè mwen alé lékòl, mwen té ka bwè wonm tou.

Dényè lanné-a mwen fè lékòl, mwen pa té fè byen. Lè manman mwen vin konnèt sa, i té tèlman faché paski i pa té sav tout sé mové bagay-la mwen té ka fè. Konsa, nou babyé an chay, èk mwen kité kay-la. Mwen té ay viv épi an nonm mwen té ka sòti épi, non’y sé Tony èk i té an Rasta. Tony té ka vann dwòg èk lòt bagay ki té kont lwa-a. Èk tout moun té konnèt li kon an moun ki té byen vyolan. Pa twò lontan apwé sa, mwen vin ansent, èk mwen té annèk 16 lanné lè mwen akouché gason nou.

Gouvèdman-an té ban mwen an ti chanm adan an kay pou jenn manman ki pa mayé. Lè mwen té ka wèsté la, sa sété pwèmyé fwa-a mwen jwenn Témwen Jéhova. Dé madanm Témwen Jéhova té ka vizité sé jenn manman-an wéglé. Èk yon jou, mwen antwé an konvézasyon yo paski mwen té vlé démanti sé Témwen-an. Alò, mwen té mandé yo kwèsyon apwé kwèsyon. Mé yo pa té vini faché, yo westé dous èk yo sèvi Bib-la pou wéponn chak kwèsyon mwen té ni. Yo té tèlman janti, èk mannyè-a yo té palé épi mwen vwéman touché tjè mwen. Konsa, mwen té dakò pou étidyé Bib-la épi yo.

Dépi mwen té toupiti, mwen té pè mò. Mé lè mwen apwann sa Jézi té enstwi konsèné wèzéwèksyon-an, sa chanjé lavi mwen. (Jan 5:28, 29) An plis di sa, mwen vin apwann Bondyé mélé épi mwen. (1 Pita 5:7) Èk yonn an sé lévanjil-la ki vwéman touché tjè mwen sé Jérémaya 29:11. I di: “Jéhova di, ‘Mwen konnèt sa mwen ni an lidé mwen pou mwen fè bay zòt. Sé pa kalamité mwen vlé mennen asou zòt, mé mwen vlé ba zòt lapé, épi èspwa pou denmen.’ ” Vèwsé sala té ban mwen konfyans-lan ki, mwen té sa viv pou tout tan adan an pawadi asou latè-a.—Samz 37:29.

Témwen Jéhova té vwéman moutwé yo enmen mwen. Pwèmyé fwa-a mwen té atandé yonn an sé mitin yo-a, mwen té ka santi lanmityé-a anpanmi yo. Yo té anbwasé mwen èk yo fè mwen santi konfòtab. (Jan 13:34, 35) Mannyè-a yo té twété mwen té diféwan épi mannyè-a sé moun-lan an lòt légliz-la té twété mwen. Sé Témwen-an té byen vini mwen magwé tout sa ki té ka fèt an lavi mwen. Yo té ni pasyans épi mwen, yo otjipé mwen, èk yo édé mwen. Mwen té santi akonmsi mwen té adan an gwo fanmi ki plen lanmityé èk ki kontan mwen an chay.

Sa mwen té apwann an Bib-la té édé mwen pou konpwann mwen té ni pou fè chanjman an lavi mwen si mwen té vlé plè Bondyé. I té byen wèd pou mwen doubout fimen tabak. Èk mwen wéyalizé sèten mizik mwen té ka kouté, té ka pousé mwen pou fimen pli zèb, konsa, mwen té ni pou chanjé mizik-la mwen té ka kouté. Apa di sa, mwen doubout alé an fèt paski sa té ka ankouwajé mwen pou bwè jis lè mwen sou. Osi, mwen fè jan épi moun ki té kay édé mwen pou viv an lavi ki té kay plè Bondyé.—Pwovèb 13:20.

Paditan mwen té ka fè chanjman an lavi mwen, Tony té ka étidyé Bib-la épi Témwen Jéhova osi. I té asiwé Témwen Jéhova té ni lavéwité-a paski yo té sèvi Bib-la pou wéponn sé kwèsyon’y-lan. I té fè an pil chanjman an lavi’y. I doubout asosiyé épi moun ki té vyolan, I doubout fè bagay ki té kont lwa-a èk I doubout fimen zèb. Nou té sav pou plè Jéhova, nou té ni pou mayé. Osi, nou té sav, lè nou mayé nou té kay lévé gason nou adan an fanmi ki solid. Konsa, an lanné 1982, nou mayé.

Mwen té ka chaché pou atik an Gad-la èk Awake! a konsèné moun ki té fè sé chanjman-an mwen té vlé fè an lavi mwen. Sé ègzanp yo-a té vwéman ankouwajé mwen! Yo té ban mwen kouway-la pou kontiné tjenbé fò. Èk mwen té mandé Jéhova plizyè fwa pou pa abandonnen mwen. An Jwiyèt lanné 1982, Tony èk mwen té batizé kon Témwen Jéhova.

Wilasyon mwen épi Jéhova vwéman sové lavi mwen. Lè Tony èk mwen té ni pwòblenm, nou té wè lanmen Jéhova an lavi nou. Nou té apwann pou mété konfyans nou an Jéhova èk pou ladjé tout twaka nou an lanmen’y. Èk nou té wè mannyè Jéhova té ka toujou édé fanmi nou.—Samz 55:22.

Pa dé kontan mwen té kontan pou édé gason nou èk fi nou konnèt Jéhova menm kon mwen konnèt li. Jòdi-a, i ka ban mwen an chay plézi pou wè sé ti ich mwen-an ka kontiné apwann pli konsèné Bondyé.

Apwézan, lè mwen kouché lé swè, mwen pa ka twakasé lidé mwen konsèné tan ki ka vini ében lanmò. Jòdi jou, mwen épi Tony byen anbawasé an sèvis Jéhova. Toulé simenn nou ka vizité diféwan kongwigasyon Témwen Jéhova pou ankouwajé sé fwè èk sè nou-an. Nou ka pwéché bon nouvèl-la épi yo. Èk nou ka édé moun pou mété lafwa yo an Jézi Kwi pou yo sa ni an bon lavi pou tout tan.