Mwen té fèt adan an vilaj an Saxony, an yon péyi yo té ka kwiyé German Democratic Republic (GDR). Fanmi mwen té ka viv byen èk pawan mwen lévé mwen épi bon mès. German Democratic Republic sété an péyi konminis. Kon sa, majòwité moun an Saxony, pa té antéwésé an wilizyon. Èk pou mwen menm, la pa té ni an Bondyé. Pouki ki wézon? Ében, pou pwèmyé dizwit lanné lavi mwen, sé moun ki pa kwè an Bondyé èk moun ki konminis ki té ka enfliyansé lavi mwen.

Mé pou ki sa mwen té antéwésé an mouvman konminis? Paski mwen té kwè tout moun égal èk yo té kwè sa tou. Apa di sa, mwen té kwè, moun té sipozé sépawé tout byen adan an mannyè ki jis. Lè sala, adan moun pa té kay twò wich èk lézòt pa té kay twò pòv. Alò, mwen jété kò mwen adan yon ògannizasyon konminis pou jenn moun. Lè mwen té katòzan, mwen té ka pasé an chay tan asou an pwojé. Nou té ka pwan papyé yo té ja sèvi èk nou té ka fèʼy vini nèf ankò. Pas sé moun-nan an vil Aue té apwésyé éfò mwen si tèlman, sé ofisyé-a pwézanté mwen épi an ti kado. Magwé mwen té jenn toujou, mwen té konnèt an chay gwo pitja an politik. Mwen té asiwé sa mwen té ka fiksé asou-a té dwèt èk mwen té kay ni an bon lavi an tan ki ka vini.

Mé toubonnman kon sa, tout bagay chanjé. An lanné 1989, yo kwazé masonn-nan ki té ka sépawé vil Berlin. Menm tan sala, konminis fini an tout sé péyi-a an Iwòp. Bagay koumansé fèt yonn apwé lòt; sa kité mwen bouch gwan ouvè. Mwen vin apwann yo té ka fè moun an chay pasdwa an GDR. Pa ègzanp, yo té ka pasé moun ki pa té ka sipòté mouvman konminis anba pyé yo. Mʼa té sa konpwann sa. Ki mannyè sa pé fèt? Ès nou, jan konminis, pa té kwè tout moun égal? I sanm tout sé lidé-a jan konminis té ka pousé sété an kwayans san fondasyon. Alò, mwen koumansé vin pè.

Kon sa, mwen doubout fiksé asou mouvman konminis. Pito sa, mwen koumansé apwann mizik èk mwen té ka pentiwé pòtwé tou. Apwé mwen fini lékòl mizik, mwen té ni èspwa pou atandé gwo lékòl èk fè yon mizisyen ki sa pentiwé osi. Kon tan pasé, mwen jété tout sé bon mès-la mwen té apwann lè mwen té piti. Sa ki té pli enpòtan pou mwen apwézan sété bon tan èk kouwi fanm. Kanmenm mizik, pentiwé, èk vyé lavi pa té soulajé mwen. Anfen, jis sé pòtwé-a mwen té ka pentiwé-a ki té ka moutwé mwen antjèt. Kon sa mwen té vlé sav: Ki sa ki kay fèt denmen? Èk, pouki nou ka viv?

Alafen, lè mwen twouvé sé wépons-lan mwen té ka chaché-a, pa dé sipwi mwen té sipwi. Yon jou lè mwen té lékòl, mwen asid ka palé épi an gwoup étidyan. Nou té ka palé asou sa ki kay fèt an tan ki ka vini. Mandy, a yon Témwen Jéhova, té la. Swè sala, Mandy ban mwen an bon tjò konsèy. I di mwen: “Andreas, si ou vlé wépons pou kwèsyonʼw konsèné lavi èk sa ki kay fèt denmen, pwan an ti tan èk byen ègzanminé Bib-la.”

Magwé mwen té an dé lidé, mwen désidé pou gadé sa Bib-la té ni pou di. Mandy di mwen pou li Dannyèl chapit 2, èk sa mwen li-a sipwi mwen toubonnman. Pwofèsi sala ka dékwi diféwan gouvèdman ki té ni an pil pouvwa dépi an tan lontan pou wivé an tan nou. Mandy osi moutwé mwen lòt pwofèsi an Bib-la ki ni pou fè épi tan ki ka vini. Alafen, mwen té ka twouvé wépons pou sé kwèsyon mwen-an! Mé, sa lévé lòt kwèsyon an lidé mwen. Ki moun ki ékwi sé pwofèsi sala? Èk ki moun ki té sa vwéman bay tout sé ti détay sala andavans? I sanm la ni an Bondyé ­pou vwé?

Mandy édé mwen fè konnésans épi Horst èk Angelika, an misyé èk madanm li ki Témwen Jéhova. Yo édé mwen konpwann Bib-la pli byen. Adan an ti monman, mwen vin wéyalizé Témwen Jéhova sé sèl ògannizasyon ki ka toujou sèvi non Bondyé èk fè moun konnèt non sala sé Jéhova. (Sam 83:18; Mafyou 6:​9) Mwen apwann Bondyé ka ofè lézòm chans-lan pou viv pou tout tan asou latè an pawadi. Sam 37:9 di: ‘Sé moun-an ki mété konfyans yo an Jéhova kay éwityé tè-a i té pwonmèt yo-a.ʼ Mwen té si tèlman kontan pou apwann tout moun ki éséyé viv an ling épi wèg Bondyé sa viv asou latè an pawadi pou tout tan.

Magwé sa, mwen té ni pou lité wèd pou swiv pwensip ki an Bib-la. Paski mwen té ka fè byen kon yon mizisyen, sa fè mwen ni an vyé lògèy. Kon sa mwen té ni pou apwann abésé kò mwen. Mwen osi té ni pou kité vyé lavi-a mwen té ka kouwi-a. Mwen ka wimèsyé Jéhova pou pasyans li èk konpasyonʼy. Mwen tèlman kontan i ka konpwann sitiwasyon tout moun ki ka fè fòs kò yo pou swiv pwensip ki an Bib-la!

Pou pwèmyé dizwit lanné lavi mwen, sé moun ki pa kwè la ni an Bondyé èk moun ki konminis ki té ka djidé lavi mwen. Mé dépi apwé sa, sé Bib-la ki ka kontiné chanjé lavi mwen. Sa mwen apwann tiwé pèwèz-la mwen té ni-an èk osi ban mwen an wézon pou viv. An lanné 1993, mwen pwan batenm kon yon Témwen Jéhova, èk an lanné 2000 mwen mayé Tabitha, yon sè ki byen zélé. Nou ka pasé tout tan nou pé pou édé lézòt konnèt sa ki an Bib-la. An chay moun nou ka jwenn épi ka kwè menm sa mwen té ka kwè avan. Sa ka ban mwen an chay satisfaksyon lè mwen édé yo vini konnèt Jéhova.

Lè mwen koumansé étidyé épi Témwen Jéhova, pa ti faché pawan mwen té faché. Kanmenm, dépi apwé sa, yo ja wè sé bon chanjman-an Bib-la ja édé mwen fè. Apwézan, mwen kontan tèlman paski yo ka li Bib-la èk yo ka atandé mitin Témwen Jéhova.

Mwen èk Tabitha ni an bon mawiyaj paski nou ka fè fòs kò nou pou swiv konsèy Bib-la pou moun ki mayé. Pa ègzanp, lè nou swiv konsèy Bib-la konsèné fidèlité an mawiyaj, sa ka fè mawiyaj nou vini pli fò.​—Hibrou 13:4.

Apwézan mʼa pè ankò èk mʼa ka twakasé kò mwen asou sa ki kay fèt denmen. Mwen ka santi mwen adan an fanmi koté mwen ni fwè èk sè owon latè-a; yon fanmi ki vwéman ni lapé èk lilyon. An fanmi sala nou tout égal, la pa ni pyès pwéféwans. Sa sé an bagay mwen té toujou kwè adan, èk sé kalité lavi sala mwen té toujou vlé. ▪