IMAJINÉ SA: Imajiné ou ka vizité an plas ko yo ka moutwé bagay moun té ka sèvi an tan lontan. Paski sé bagay sala ja la pou an chay tan, majòwité di yo ni tou, yo ja pèd koulè, èk yo ja izé. Adan di yo ka jis mantjé gwo mòso. Kanmenm, ou wè yonn ki an bon kondisyon toubonnman; tout ti détay li byen klè. Alò, ou mandé moun-nan ki ka djidéʼw: “Sala pli nèf pasé sé lézòt-la? Yo ja wanjéʼy?” I wéponn: “Non, sala pli vyé pasé majòwité sé lézòt-la èk i pa té janmen bizwen wanjé.” Kon sa ou mandéʼy: “Yo té séwéʼy an koté pou anyen pa afèktéʼy?” Moun-nan wéponn: “Non. Anfen, i ja pwan an chay sòlèy èk lapli. Apa di sa, an pil moun ja éséyé donmajéʼy.” Ou pitèt sipwi lè ou tann sa èk ou di an lidéʼw: ‘Ki sa bagay sala fèt épi on?ʼ

Adan an mannyè, Bib-la menm kon bagay sala ki la dépi tan lontan ki an bon kondisyon toujou. Sé pa ni jòdi ni yè Bib-la owon, èk i la pli lontan pasé majòwité liv. Bon, la ni lòt liv ki la dépi lontan. Mé, menm kon sé bagay-la moun té ka sèvi an tan lontan, majòwité sé liv sala ja twapé donmajé. Pa ègzanp, sa sé liv sala ka di asou sijé siyans kont sa moun ja apwann èk pouvé an tan jòdi. Osi, sa yo ka di pou sèvi kon wimèd, ka pli tjwé santé moun. Apa di sa, i difisil pou li an chay di yo, paski swé yo ka mantjé fèyèt ében yo byen donmajé.

Mé, Bib-la diféwan konplètman. Moun koumansé ékwi Bib-la pli pasé twa mil senk san (3,500) lanné pasé, èk i la jis toujou. Kon tan pasé, moun kontiné fè fòs kò yo pou détwi Bib-la. Pa ègzanp, yo éséyé bwilé Bib-la, yo ékwi lwa pou anpéché moun niʼy, èk yo fè tout sa yo pé pou fè moun kwè i pa enpòtan. Magwé tout sa, yo pa té sa détwi Bib-la, èk jòdi, nou sa li tout ti détay ki andidanʼy. La ni an lòt bagay konsèné Bib-la ki vwéman wimakab. Konsèy Bib-la twòp pli avansé pasé an chay konsèy moun ka ofè an tan jòdi, èk i ni pli valè.—Gadé sèksyon-an ki ni tit-la, “Outdated or Ahead of Its Time?”

Kanmenm, ou pé ka katjilé: ‘Ès sé pwensip-la ki an Bib-la sa vwéman édé nou jòdi?ʼ Pou twouvé wépons-lan, mandé kòʼw: ‘Ki mové pwòblenm lézòm ka lité épi jòdi? Kilès an sé pwòblenm sala ki ka fè moun pli pè?ʼ Ès ou kay di sé ladjè, kwim, kòwòpsyon, ében mannyè lézòm ja gaté nati? Annou pwan an monman pou konsidiwé déotwa pwensip an Bib-la ki ka touché asou sa. Padan nou ka fè sa, mandé kòʼw kwèsyon sala: ‘Si moun swiv sé pwensip sala, ès lavi pa té kay twòp pli mèyè?

VIV AN LAPÉ

Mafyou 5:9 di: “Pa dé bon i bon pou moun ki ka twavay pou fè moun viv an lapé èk yonn èk lòt, paski Bondyé kay di, ‘Ou sé ich mwen.ʼ” Ronm 12:18 di: “Fè sa ou pé pou ou sa viv an lapé épi tout moun.”

NI KONPASYON ÈK PAWDONNEN YONN A LÒT

Mafyou 5:7 di: “Pa dé bon i bon pou moun ki ni konpasyon asou lézòt moun, paski Bondyé kay ni konpasyon asou yo tou.” Kòlòsé 3:13 di: “Pa di zòt pa sa sipòté yonn a lòt. Sé pou zòt pawdonnen lè zòt ni anyen kont yonn a lòt. Pawdonnen yonn a lòt menm kon Senyè-a pawdonnen zòt.”

LILYON ANPAMI TOUT WAS

Twavay 17:26 di: “Bondyé fè tout was moun sòti adan yon sèl nonm épi i fè yo viv asou tout latè-a.” Twavay 10:34, 35 di: “Bondyé pa ni pwéféwans pou pyèsonn. I ka aksèpté népòt moun ki ka adowéʼy épi ka fè sa ki dwèt. I pa mélé ki nasyon i sòti.”

GADÉ APWÉ LATÈ-A

Jennésis 2:15 di: ‘Dyé Jéhova pwan nonm-lan épi i météʼy an jaden Édenn pou twavay jaden-an èk pou otjipéʼy.ʼ Wévélasyon 11:18 di: Bondyé kay “détwi sé moun-an ki ka détwi latè sala!”

HAYI VOWASITÉ ÈK PA KOUWI VYÉ LAVI

Louk 12:15 di: “Pwan gad pou tout kalité vowasité. Londjè épi valè lavi yon nonm pa ka dépan anlè ki mizi wichès i ni, menm si i ni an chay.” Èfésòs 5:3 di: “Mé fònikasyon ében pyès lòt malpwòpté kon sa, ében anvyèj— pa kité sé bagay sala mansyonnen anpami zòt, paski sa sé pa bagay pou ich Bondyé antanmé.”

VIV ONNÈT ÈK TWAVAY WÈD

Hibrou 13:18 di: “Nou vlé fè bon an tout bagay.” Èfésòs 4:28 di: “Nonm-lan ki ka toujou vòlè-a sipozé doubout vòlè épi koumansé twavay pou lajanʼy.”

ÉDÉ MOUN KI BIZWEN SIPÒ

1 Tèsalonnika 5:14 di: “Ankouwajé sé moun-an ki pè-a, èvèk édé sé moun-an ki pʼòkò konnèt bagay ki bon èk bagay ki pa bon pou fè, épi sé pouʼw ni pasyans épi tout moun.” Jémz 1:27 di: “Édé manmay ki pa ni manman èk papa èk sé madanm-lan mawi yo ja mò-a lè yo ka soufè.”

Ès Bib-la ka annèk ban nou an badjo pwensip? Non, Bib-la ka di nou sa nou sipozé fè èk mannyè nou sipozé fèʼy. Si pli moun té ka swiv sé pwensip-la nou fin mansyonnen-an, ou pa kwè nou té kay ni mwens pwòblenm an latè-a? Alò nou sa vwéman di, sé pwensip-la ki an Bib-la byen enpòtan èk nou sa swiv yo jòdi! Mé  ou pé mandé: ‘Ki mannyè sé pwensip sala sa édé mwen apwézan?ʼ

An Louk 7:35 Jézi di: “Lavi tout sa ki chwazi pou swiv Bondyé ka moutwé ki Bondyé savan.” Ki sa sa vlé di? Ében senpliman, sa an moun fè ka moutwé si i ni lasajès. Ès ou dakò épi sa? Alò mandé kòʼw: ‘Si konsèy Bib-la sa vwéman édé mwen, ès mwen pa sipozé wè bon wézilta lè mwen swiv konsèy li? Ki mannyè sé pwensip sala sa édé mwen épi pwòblenm mwen?ʼ Annou konsidiwé yon ègzanp.

Delphine a sé an madanm ki té toujou ni bagay pou fè èk i té satisfè épi diwèksyon-an laviʼy té ka pwan. Mé sibitman, twaka lévé an laviʼy yonn apwé lòt. Jenn fiʼy-la mò; mawiyaj li tonbé an dlo; èk i té ni byen pé lajan pouʼy viv. Delphine di: “Lè mwen pèdi fi mwen, mawi mwen, èk kay mwen, mʼa té sa konpwann sa ki té ka fèt. Mwen té santi mʼa vo anyen. Mwen pa té ni kouway èk mʼa té ni pyès wézon pou kontiné viv.”

Pou pwèmyé fwa an laviʼy, Delphine wéyalizé sa ki ékwi an Sam 90:10 sé pawòl ki vwé. Vèwsé sala di: “Swasant dis (70) lanné sé tout nou ni pou viv. Si nou ni bon santé, nou kay wivé katwiven (80), mé sé épi an pil twaka èk mizè. Talè lavi nou ka bout èk nou ka fini nèt.”

Ki sa ki édé Delphine diwan tan difisil sala? Konsèy Bib-la. Mannyè Bib-la édéʼy vwéman wimakab! Bib-la ja édé an chay lòt moun osi. Mé, menm kon Delphine, yo té ni pou swiv konsèy Bib-la. Bon chonjé, an koumansman-an nou té palé di an bagay ki té la dépi tan lontan èk ki an bon kondisyon toujou. Apwézan sé moun sala ka gadé Bib-la menm kon bagay sala. Bib-la pa kon liv lontan ki pa an sèvis ankò. Pouki? Ès i posib sa ki ékwi an Bib-la sé pa pawòl ki sòti an bouch moun mé sé pawòl Bondyé?—1 Tèsalonnika 2:13.

Pitèt ou kay dakò lavi kout èk i plen twaka épi mizè. Alò, lè pwòblenm pawé pou chayéʼw alé, ki koté ou ka alé pou twapé konsolasyon, sipò, èk bon konsèy?

Mi twa mannyè Bib-la sa vwéman édéʼw. I sa moutwéʼw mannyè pou:

1. évité pwòblenm lè sa posib.

2. wanjé pwòblenm lè yo lévé.

3. tjenbé fò lè ou pa sa fè diféwan ében ou pa sa chanjé sitiwasyon-an.