Pli nou apwann konsèné kawaktè on moun, sé pli nou ka vini konnèt ki kalité moun i vwéman yé. Èvèk pli nou konnèt on moun, sé pli nou sa vini bon jan épi moun-lan. Ében lè’y vini pou Bondyé, sé menm bagay-la. Alò, pli nou apwann konsèné sé bèl kawaktè-a Bondyé ni-an, sé pli nou kay vini konnèt ki moun i vwéman yé. Èk pli nou konnèt li, sé pli nou kay vlé vansé pwé’y. Mé, anpanmi tout sé bèl kawaktè-a Bondyé ni-an, la ni kat (4) ki vwéman èstòdinè: pouvwa’y, lasajès li, jistis li, épi lanmityé’y.

“Dyé Jéhova, Senyè-a Ki Pli Ho-a! Sé ou ki sèvi gwan pouvwa-a ou ni-an, èk fòs-la ki an bwa’w, pou fè syèl-la èk latè-a. La pa ni anyen ki twò èstòdinè pou ou.”—JÉRÉMAYA 32:17.

Sé bagay-la Bondyé fè-a ka moutwé i ni an chay pouvwa. Pou ègzanp, lè sòlèy cho ka fann tè èk ou doubout dèwò, kisa ou ka santi asou lapo’w? Ou ka santi chalè sòlèy-la, kouman! Wi, sòlèy-la ni an chay pouvwa. Ében, sé Jéhova ki fè sòlèy-la. Konsa chalè sòlèy-la sé yon bagay ki ka moutwé kalité pouvwa-a Jéhova ni pou kwéyé. Mé ki kantité pouvwa sòlèy-la ni? Djòs imajiné: chalè-a an mitan sòlèy-la ka miziwé apipwé venn sèt milyon (­27,000,000) dégwé Fahrenheit, ében kenz milyon (15,000,000) dégwé Celsius. Èvèk kantité fòs-la sòlèy-la ka ladjé chak sèkon, sé menm kantité fòs-la plizyè san milyon bonm ka ladjé si yo pété.

Mé, magwé i tèlman gwo èk i ni tèlman pouvwa, sòlèy-la sé on piti étwal lè’w konpawé’y épi plizyè milyon an sé étwal-la ki an inivès-la. Anfen, siyantis ka kwè yonn an sé pli gwo étwal-la sé UY Scuti, èk étwal sala apipwé yon mil sèt san (1,700) fwa pli gwo pasé sòlèy-la. Yo di, UY Scuti tèlman gwo, si ou mété’y an plas sòlèy-la, i té kay kouvè tout latè-a, èvèk i té kay wivé lwen asé pou kouvè jis plannèt-la yo ka kwiyé Jupiter. Lè nou katjilé asou sa, pitèt sa ka édé nou pou konpwann pli mèyè sa pwofèt Jérémaya té ka palé konsèné lè’y té di, Jéhova sèvi gwan pouvwa’y pou fè syèl-la, latè-a, èk tout sa ki adan yo.

Ki bennéfis nou ka twapé an pouvwa Bondyé? Lavi lézòm ka dépan asou sé bagay-la Bondyé ja fè-a. Bagay tèl kon sòlèy-la èk tout sé bèl bagay-la ki asou latè-a. An plis di sa, Bondyé ka sèvi pouvwa’y pou édé chak moun adan an mannyè pèsonnèl. Pouki nou sa di sa? Èben, an pwèmyé syèk-la, Bondyé té bay Jézi pouvwa pou fè gwo miwak pou édé an chay moun. Yon wakont-la an Bib-la di: “Moun ki té avèg ka wè, sa ki té enfim ka maché, sa ki té ni maladi lapo ka djéwi, sa ki té soud ka tann, sa ki té mò ka wésisité.” (Mafyou 11:5) Mé, ki mannyè Bondyé ka sèvi pouvwa’y pou édé moun jòdi jou? Bib-la di: ‘[Bondyé] ka ba moun ki las fòs.’ Èk i di ankò: ‘Moun ki mété èspwa yo an Jéhova kay twapé fòs yo ankò.’ (Izaya 40:29, 31) Wi, “tout pouvwa-a menm sé an Bondyé i yé.” Èvèk yon mannyè Bondyé ka sèvi pouvwa’y pou édé nou adan an mannyè pèsonnèl sé sa, i ka bay chak di nou pouvwa-a nou bizwen, pou nou tjenbé fò anba népòt difikilté nou pé èspéyansé an lavi nou. (2 Kòrint 4:7) Ès sa pa ka fè’w anvi vansé pli pwé Dyé sala ki ni tèlman lanmityé, èk ki ka sèvi gwan pouvwa-a i ni-an pou édé nou épi pwoblenm nou?

“Ou ja fè tèlman gwan twavay, Bondyé Senyè, sé ou èk tout lasajès ou ki fè yo tout.”—SAMZ 104:24.

Nou sa wè lasajès Bondyé a klè an kwéyasyon. Alò, pli nou apwann konsèné sé bagay-la Bondyé ja fè-a, sé pli lasajès li ka kité nou bouch gwan ouvè. Èk la ni an chay bagay nou sa apwann hòd lasajès Bondyé ki an kwéyasyon. Anfen, la ni an kalté bagay yo ka kwiyé bio­mimetics, ében biomimicry. Sa vlé di, siyantis ka étidyé sé bagay-la Jéhova ja fè-a, yo ka kòpi yo, èk yo ka sèvi sa yo apwann pou fè an chay bagay yo ka fè pli mèyè. Ki yo ka fè ti bagay ki senp tèl kon lakòl, èben bagay ki pli konpliké tèl kon yon aviyon, yo ka sèvi sa yo apwann an kwéyasyon pou fè’y pli mèyè.

Mé pli bèl ègzanp an kwéyasyon ki ka moutwé lasajès Bondyé sé mannyè-a i fè lézòm. Annou konsidiwé mannyè-a on ti bébé ka pwofité an bouden manman’y, pou yon ègzanp. Lavi on ti bébé ka koumansé épi yon ti “cell” mouman-an on madanm vini ansent. A lè sala ti “cell-la” tèlman piti ou pa sa menm wè’y. Mé, i ni tout enfòmasyon-an ki nésésè pou ti bébé-a dévlopé. Pwèmyéman, ti cell-la ka divizé, èk i ka vini plizyè lòt ti “cell” ki ka sanm yonn a lòt. Èk lè lè-a wivé, sé “cell” sala ka chanjé èk yo ka vini plizyè san diféwan kalité “cell” tèl kon, “cell” pou san, èk “cell” pou zo. Touswit apwé sa, bagay tèl kon, tjè ti bébé-a, fwisi mòl li, sèvèl li, èk lòt bagay kon sa ka dévlopé, èk yo ka koumansé twavay. I ka pwan djòs nèf (9) mwa pou pwèmyé ti “cell-la” dévlopé èk fòmé on ti bébé ki ka fèt épi plizyè milyon “cell.” Wi, i ka pwan lasajès ki èstòdinè pou mété an bagay kon sa an plas. Anfen, lasajès-la nou ka wè an mannyè-a on ti bébé ka dévlopé, ka pousé an chay moun pou dakò épi yonn sé moun-lan ki ékwi sé Samz-lan, lè’y di Bondyé: “Mwen ka glowifyéʼw èk wèspé lè mwen wè ki otan bèl ou fè mwen.”​—Sam 139:14.

Ki bennéfis nou ka twapé an lasajès Bondyé? Kwéyatè nou konnèt sa nou bizwen pou nou sa ni tjè kontan an lavi nou. Èvèk i ni an chay nòlaj épi lakonpwann, konsa i ka ban nou bon konsèy an Pawòl li, Bib-la. Pou ègzanp, i ka ankouwajé nou pou kontiné “pawdonnen . . . yonn a lòt.” (Kòlòsé 3:​13) Ès ou pa ka dakò, sa sé bon konsèy? Mé wi! Anfen, la ni dòktè ki ja òbzòvé, lè on moun ka pawdonnen lézòt, moun sala pé dòmi pli byen, i pé ni mwens pwoblenm épi prèchò’y, èk i osi pé ni mwens chans pou dévlopé dipwèsyon èk lòt pwoblenm santé. Wi, Bondyé menm kon an bon jan ki savan, ki ka otjipé nou byen épi an chay lanmityé, èk i ka toujou ban nou bon konsèy pou édé nou an lavi nou. (2 Timòfi 3:​16, 17) Ès ou pa té kay kontan pou ni on jan kon sa?

“Bondyé Senyè-a enmen sa ki dwèt.”​—SAMZ 37:28.

Bondyé ka toujou fè sa ki dwèt. Anfen, “i enposib pou Dyé vwé-a fè méchansté, èk pou Dyé Toupisan-an fè sa ki mové!” (Jòb 34:10) Wi, Jéhova ka toujou jijé adan an mannyè ki onnèt. Kon yonn sé moun-lan ki ékwi Samz-lan té di Jéhova, “Ou ka jijé sé moun-an san pwéféwans.” (Sam 67:4) Osi, paski “Jéhova ka wè sa ki andidan tjè-a,” pyèsonn pa sa kwennen’y épi ipokwizi yo. I ni abilité-a pou konnèt lavéwité-a an népòt sitiwasyon, konsa, i sa jijé adan on mannyè ki dwèt. (1 Sanmyèl 16:7) An plis di sa, Bondyé konnèt konsèné tout enjistis èk kòwòpsyon ki ka fèt asou latè-a, épi i pwonmèt, touswit i kay ‘détwi [lé méchan] asou latè-a.’​—Pwovèb 2:22.

Kanmenm, Bondyé sé pa on jij ki wèd, èk i pa pwésé pou pini moun. Lè’y nésésè, i ka moutwé moun mizéwikòd. Bib-la ka di: “Bondyé Senyè-a ni mizéwikòd èk lagwas.” Wi, Bondyé ka jis moutwé moun ki méchan mizéwikòd, si yo wépanti épi tout tjè yo pou sé mové bagay-la yo té fè-a. Ès ou pa ka dakò, sa sé vwéman jistis?​—Sam 103:8; 2 Pita 3:9.

Ki bennéfis nou ka twapé an jistis Bondyé? Zapòt Pita té di: “Bondyé pa ni pwéféwans pou pyèsonn. I ka aksèpté népòt moun ki ka adowéʼy épi [ki] ka fè sa ki dwèt. I pa mélé ki nasyon [moun-lan] sòti.” (Twav. 10:34, 35) Wi, Bondyé pa ka moutwé pyès pwéféwans, èvèk sa sé on bagay ki ka pòté nou bennéfis, paskè dépi nou ka fè sa ki dwèt an zyé’y, nou sa asiwé i kay ban nou favè’y. I pa mélé ki was nou yé, ében ki péyi nou sòti. Èvèk i pa mélé si nou ni gwo endikasyon ében gwo pozisyon opa.

On lòt bagay sé sa, Bondyé vlé nou konpwann jistis li, èk i vlé nou twapé bennéfis andan’y osi. Sé pou wézon sala i bay chak di nou on konsyans. Bib-la ka moutwé, konsyans nou menm kon on lwa ki “ékwi an tjè” nou, ki ka “tèstifyé” konsèné aksyon nou. Èvèk i ka di nou si sa nou fè-a bon, ében si’y pa bon. (Ronm 2:​15) Ki bennéfis nou ni an sa? Ében si nou entwennen konsyans nou byen, i sa pousé nou pou widjèkté bagay ki pa bon, ében bagay ki pa jis. Osi, si nou fè on lèwè, on konsyans ki byen entwennen sa pousé nou pou wépanti, èk pou fè tout sa nou pé pou wanjé népòt donmaj aksyon nou annékòz. Alò, la pa ni pyès dout ki, lè nou byen konpwann jistis Bondyé, sa ka ankouwajé nou èk i ka édé nou pou vansé pli pwé Bondyé!

‘Bondyé sé lanmityé.’​—1 JAN 4:8 NWT.

Bib-la ka moutwé a klè, Bondyé ni pouvwa, i ni lasajès, épi i jis. Mé, Bib-la pa janmen di, Bondyé sé pouvwa, i sé lasajès, ében i sé jistis. Kanmenm, lè’y vini pou lanmityé, Bib-la ka di, Bondyé sé lanmityé. Pouki? Sé paski, magwé pouvwa Bondyé ka édé’y pou pwan aksyon, èk jistis li épi lasajès li ka djidé aksyon’y, sé lanmityé ki ka motivé Bondyé pou pwan aksyon. Wi, sé lanmityé-a Bondyé ni-an ki ka pousé’y pou fè tout sa’y ka fè.

Pou ègzanp, magwé Jéhova pa té bizwen pyèsonn, èk i pa té ka mantjé anyen, lanmityé-a i ni-an pousé’y pou fè kwéyati entélijan ni an syèl épi asou latè-a, pou yo sa enjwi lanmityé’y èk otjipasyon’y. Osi, Bondyé pwan plézi pou pwépawé latè-a èk pou fè’y vini an bèl plas bay lézòm. Anfen, i fè latè-a vini pli mèyè koté-a pou lézòm viv. Èvèk i ka kontiné pou moutwé lanmityé pou tout lézòm, paskè ‘i ka fè sòlèy li lévé anlè ni moun ki mové [èk] moun ki bon, èk i ka fè lapli tonbé asou [ni] moun ki ka fè sa ki bon, èk moun ki ka fè sa ki pa bon.’​—Mafyou 5:​45 NWT.

An plis di sa, “[Bondyé] bon èk i ni konpasyon.” (Jémz 5:​11) I ka moutwé afèksyon pou moun ki ka vwéman fè éfò pou konnèt li èk vansé pwé’y. Bondyé konnèt chak di yo, èk i ni konpasyon pou chak di yo. Anfen, Bib-la ka moutwé, “i ka gadé apwé’w.”​—1 Pita 5:7.

Ki bennéfis nou ka twapé an lanmityé Bondyé? Bondyé ka moutwé nou lanmityé an plizyè diféwan mannyè. Pou ègzanp, nou ka enjwi bèlté sòlèy-la kon’y ka kouché, nou ka santi plézi lè nou tann on ti bébé ka wi, nou ka santi byen konmifo lè on manm fanmi nou ében on moun nou enmen ka moutwé lanmityé pou nou. Jéhova ban nou tout sé bagay sala paski i enmen nou. Èk vwéman, nou pa oblijé ni sé bagay sala pou nou viv, mé yo ka ban nou an chay plézi èk yo ka édé nou pou enjwi lavi nou otan pli.

On lòt mannyè Bondyé ka moutwé lanmityé pou nou, sé bèl pwivilaj-la i ban nou pou apwoché’y an lapwiye. Anfen, mi on bèl ti ankouwajman nou ka jwenn an Bib-la: “Pa bay kòʼw twaka pou anyen, mé an tout lapwiyèʼw, mandé Bondyé sa ou bizwen-an, épi toujou wimèsyéʼy lè ou ka pwédyé.” Wi, kon on bon papa ki enmen zanfan’y, Bondyé vlé nou palé épi’y an lapwiyè, èk i vlé nou mandé’y pou édé nou épi tout bagay ki ka twakasé nou. Èvèk Bondyé si tèlman bon, i pwonmèt, si nou fè sa, i kay ban nou ‘lapé an tjè nou épi an lidé nou.’ Sa sé on kalité lapé ki byen spésyal. Anfen, “lapé sala si tèlman bon, pyèsonn pa sa fini konpwann li.”​—Filipay 4:​6, 7.

An atik sala, nou diskité kat (4) an sé kawaktè-a Bondyé ni-an ki vwéman èstòdinè: pouvwa’y, lasajès li, jistis li, épi lanmityé’y. Èk magwé nou pa diskité sé kat (4) kawaktè sala an détay, ès ti diskasyon sala édé’w pou konnèt kalité moun-lan Bondyé yé pli mèyè? Pou édé’w dévlopé pli lanmityé épi apwésiasyon pou Bondyé, nou ka ankouwajé’w pou apwann pli konsèné sa Bondyé ja fè, èk sa i kay fè an tan pou vini pou pòté’w bennéfis.