“Diwan jennès mwen, yonn an sé bagay-la ki té pli difisil pou mwen aji épi sété sa; mwen té entéwésé an jenn gason menm kon mwen. Mwen té kwè, lè mwen vini pli gwan, santiman sala èk dézi sala té kay pasé, mé mwen ka lité épi yo toujou.”​—David, 23.

 David sé an Kwityen èk i vlé plè Bondyé. Mé ès ou kwè David sa plè Bondyé si sé nonm i entéwésé adan? Ki mannyè Bondyé ka santi lè nonm ka kouché épi nonm ében fanm ka kouché épi fanm?

•  Kisa Bib-la ka di?

•  Ès sa vlé di . . . ?

•  Mé si  . . . ?

 Moun ki ni diféwan kilti ni diféwan katjil konsèné homosèksyouwalité. Mé Kwityen pa ka swiv kilti lézòm. Anfen, Bib-la di, yo pa “kon moun ki ka kité népòt bagay yo tann chayé yo kon van ka chayé fèy sèk.” (Èfésòs 4:​14) Wi, Kwityen ki vwé pa ka kité sa moun di èk kwè enflouwansé yo. Pito sa, yo ka kité sé pwensip-la ki an Bib-la djidé katjil yo konsèné homosèksyouwalité èk népòt lòt bagay.

 Sé pwensip-la ki an Bib-la konsèné nonm ka kouché épi nonm ében fanm ka kouché épi fanm byen klè. Mi sa Bib-la ka di:

•  ‘Ou pa dwé ni wilasyon sèksyouwal épi an nonm menm kon ou ka ni wilasyon sèksyouwal épi an fanm.’​—Livitikòs 18:22.

•  “Épi pou wézon sala Bondyé ja abandonnen yo adan menm vyé konmès-la ki an tjè yo-a, . . . [èk] pou menm wézon sala Bondyé abandonnen yo adan vyé dézi honté yo-a. Sé madanm-lan menm, yo gaté mannyè Bondyé té mété pou yo fè zafè yo-a, épi yo ka kouché épi yonn a lòt adan an mannyè ki pa natiwèl.”​—Ronm 1:​24, 26.

•  “Pa kwennen kò zòt; moun ki ka viv vyé lavi, ében sa ki ka adowé fo bondyé, ében sa ki ka fè adiltè, ében sa ki ka kouché épi nonm kon yo, ében sa ki ka vòlè, ében sa ki vowas, ében sa ki toujou sou, ében sa ki ka sali non lézòt, ében sa ki ka bwitalizé moun pou pwan bagay yo—pyès sé kalité moun sala pa kay ni dwa pou kondwi épi Bondyé.”​—1 Kòrint 6:​9, 10.

 Vwéman, tout moun ni pou obéyi pwensip Bondyé, ki yo ni dézi sèksyouwal pou moun ki menm sèks èvèk yo, èben ki yo ni dézi sèksyouwal pou moun ki pa ni menm sèks èvèk yo. Lavéwité-a sé, nou tout enpawfè, konsa, délè nou ni dézi-a pou fè sa ki pa bon. Mé si nou vlé plè Bondyé, nou ni pou fè éfò pou kontwolé dézi-a pou fè sa ki pa bon.​—Kòlòsé 3:5.

 Ès sa vlé di Bib-la ka ankouwajé nou pou hayi mal manman èk zanmiyèz?

 Non. Anfen, Bib-la pa ka ankouwajé nou pou hayi pyèsonn. Okontwè, Bib-la ka di nou pou “viv an lapé èk tout moun,” menm si yo ka viv lavi yo adan an mannyè ki ka plè Bondyé opa. (Hibrou 12:14) Konsa, i pa bon pou malpalé moun èben maltwété moun paski yo sé mal manman èk zanmiyèz.

 Ès sa vlé di Kwityen pa sipozé wèspèkté lwa gouvèdman ki ka pèwmité nonm mayé nonm èben fanm mayé fanm?

 Bib-la ka moutwé wèg Bondyé lè’y vini pou mawiyaj. Bondyé fè mawiyaj pou yon nonm èk yon fanm sèlman. (Mafyou 19:​4-6) Mé lè’y vini pou sé lwa-a konsèné mawiyaj ant nonm èk nonm èben ant fanm èk fanm, sé gouvèdman-an ka kité pòlitik djidé yo, yo pa ka swiv wèg Bondyé. (Jan 18:36) Kanmenm, Kwityen ki vwé pa ka pwan pa an zafè pòlitik. Konsa, lè’y vini pou sé lwa-a konsèné mawiyaj ant nonm èk nonm èben ant fanm èk fanm, Kwityen pa ka sipòté yo ni yo pa ka opozé yo.

 Mé si an moun sé on mal manman èben on zanmiyèz, ès moun sala sa chanjé?

 Mé wi! Anfen, an pwèmyé syèk-la avan adan sé Kwityen-an apwann lavéwité-a, yo té mal manman èk zanmiyèz. Mé lè yo apwann lavéwité-a yo fè chanjman, yo doubout kouwi sé vyé lavi sala. Sé pou wézon sala, Bib-la di: “Adan zòt té kon sa.”​—1 Kòrint 6:​11.

 Ès sa vlé di sé moun-lan ki té mal manman èben zanmiyèz pa té janmen ni dézi-a pou witounen an lavi sala ankò? Non. Bib-la di: “Zòt ja mété an lavi ki nèf. I sé Bondyé ki fè zòt nèf kon sa. Sé Bondyé ki fè zòt, épi pli an pli i ka fè zòt vini kon li menm pou zòt sa vini konnèt li pli.” (Kòlòsé 3:​10) Lévanjil sala ka moutwé nou ni pou kontiné fè chanjman.

 Mé si an moun vwéman vlé sèvi Bondyé èk i ni dézi-a pou kouché épi moun menm sèks épi’y toujou, kisa i sipozé fè?

 Paski nou enpawfè, nou tout ni dézi ki pa bon. Mé lè sé dézi sala vini an tjè nou, nou sa désidé pou widjèkté’y opa. Kisa an moun sa fè, si i vlé widjèkté tout sé vyé dézi sala? Mi sa Bib-la di: “Kité Lèspwi Bondyé kondwi laviʼw épi ou pa kay fè tout sé bagay-la kò-a vlé fè-a.”​—Galécha 5:​16.

 Ou wè, Bib-la pa ka di yon moun pa kay ni dézi-a pou fè sa ki pa bon. Mé Bib-la ka di, yon moun sa kontwolé kò’y. Pou édé’y fè sa, i ni pou étidyé Bib-la wéglé èk pwédyé souvan. Wi, lè’y fè sa, i sa vwéman wézisté dézi-a pou fè sa ki pa bon.

 David, nou té mansyonnen an koumansman atik sala, té di i té sa wézisté dézi-a pou fè sa ki pa bon. I di sa ki té édé’y, sé lè’y palé épi pawan’y konsèné mannyè i té ka santi. David osi di, “Sé konmsi an gwo chay té sòti asou zépòl mwen, èk mwen kwè si mwen té palé épi yo lè mwen té pli jenn, pitèt mwen té kay enjwi jennès mwen.”

 Nou asiwé nou kay toujou ni tjè kontan si nou swiv wèg Jéhova. Sam 19:8, 11 di: “Lwa Bondyé Senyè-a bon. Tout moun ki obéyi’y ka ni tjè kontan èk lè [yo] obéyi yo, [yo] ka wisivwè bon bagay.”