Ki Moun Ki Ka Alé An Syèl?
Wépons Bib-la Ka Bay
Bondyé chwazi on ti gwoup Kwityen fidèl pou alé an syèl. Apwé sé Kwityen-an ki an ti gwoup sala mò, Bondyé ka wésisité yo pou yo sa alé viv an syèl. (1 Pita 1:3, 4) Mé, apwé Bondyé chwazi yo, i byen enpòtan pou yo kontiné wèsté fidèl, épi pou yo kontiné ni bon kondwit kon Kwityen. Si yo pa fè sa, yo pa kay wisouvwè sé bèl pwivilaj-la Bondyé ka tjenn an syèl ba yo-a.—Èfésòs 5:5; Filipay 3:12-14.
Kisa sé moun-lan ki ka alé an syèl kay fè la?
Sé moun-lan ki ka alé an syèl kay kondwi épi Jézi kon wa èk pwèt pou yon mil (1,000) lanné. (Wévélasyon 5:9, 10; 20:6) Yo kay fòmé “syèl nèf-la,” sa vlé di gouvèdman-an an syèl. Èk yo kay kondwi on sosyété moun ki ka viv dwèt asou latè-a, ében “latè nèf-la.” Kon wa épi pwèt, sé moun-lan ki ka alé an syèl kay édé moun asou latè-a pou viv adan on sosyété ki jis èk dwèt. Wi, yo kay édé yo viv menm mannyè-a Bondyé té vlé lézòm viv, dépi an koumansman-an.—Izaya 65:17; 2 Pita 3:13.
Konmen moun ki kay wésisité pou alé viv an syèl?
Bib-la ka moutwé, yon san kawant kat mil (144,000) moun kay wésisité pou alé viv an syèl. (Wévélasyon 7:4) Ki koté nou twapé limowo sala? Ében Wévélasyon 14:1-3, ka ban nou détay konsèné yon vizyon zapòt Jan té wè. I té wè “Ti Mouton Bondyé-a . . . doubout asou Mòn Zayonn, [èk] i té ni yon san kawant kat mil (144,000) moun épi’y.” An vizyon sala, “Ti Mouton Bondyé-a” ka wépwézanté Jézi, apwé i wésisité. (Jan 1:29; 1 Pita 1:19) Èvèk “Mon Zayonn” ka wépwézanté pozisyon enpòtan-an Bondyé bay Jézi, épi san kawant kat mil (144,000) moun-lan ki kay kondwi épi’y an syèl-la.—Sam 2:6; Hibrou 12:22.
Bib-la ka kwiyé sé moun-lan Bondyé “kwiyé” èk “chwazi” pou kondwi épi Jézi an Wéyòm-lan, on “ti twipo.” (Wévélasyon 17:14; Louk 12:32 NWT) Sa ka moutwé, kantité moun ki kay an syèl sé on piti limowo, lè’w konpawé yo épi kantité mouton Jézi ni.—Jan 10:16.
Sa moun ka di konsèné ki moun ki kay an syèl
Sa moun ka di: Tout moun ki bon kay an syèl.
Lavéwité-a: Bondyé pwonmèt, i kay bay pwèskè tout moun ki bon, lavi étonnèl asou latè-a.—Sam 37:11, 29, 34.
Lè Jézi té asou latè, i té di: “Pyès moun pa janmen mouté an syèl.” (Jan 3:13) Alò, Jézi té ka moutwé a klè, bon moun tèl kon Abrahanm, Moziz, Jòb èk David ki té mò avan i vini asou latè-a, pa té alé an syèl. (Twav. 2:29, 34) Pito sa, yo té ni èspwa pou wésisité èk pou viv asou latè-a.—Jòb 14:13-15.
Bib-la ka kwiyé wézèwèksyon-an pou moun ki kay viv an syèl “pwèmyé wézèwèksyon-an.” (Wévélasyon 20:6) Sa ka moutwé, la kay ni on lòt, èben on dézyenm wézèwèksyon. Èk moun ki wésisité an dézyenm wézèwèksyon sala kay viv asou latè-a.
Bib-la ka moutwé, anba kondwit Wéyòm Bondyé, “la pa kay ni lanmò ankò.” (Wévélasyon 21:3, 4) Pwonmèt sala oblijé akonpli asou latè-a, paski la pa té janmen ni lanmò an syèl.
Sa moun ka di: Chak moun sa désidé pou kò yo si yo kay viv an syèl èben asou latè-a.
Lavéwité-a: Sé Bondyé ki ka désidé ki moun ki kay wisouvwè “pwi-a,” ében lavi étonnèl an syèl. (Filipay 3:14) Konsa, menm si on moun vlé alé an syèl, sa pa vlé di Bondyé kay chwazi yo.—Mafyou 20:20-23.
Sa moun ka di: Sé moun-lan ki kay wisouvwè lavi étonnèl asou latè-a sé moun ki pa bon asé pou alé an syèl. Konsa, èspwa-a pou viv asou latè-a pou tout tan sé pa anyen spésyal.
Lavéwité-a: Bondyé ka kwiyé sé moun-lan ki kay wisouvwè lavi étonnèl asou latè-a, “pèp mwen,” “sé moun-lan mwen chwazi-a,” èk “ich Jéhova benni.” (Izaya 65:21-23) Sé moun sala kay ni bèl pwivilaj-la pou akonpli sa Jéhova té vlé pou lézòm dépi an koumansman-an—lavi pawfé pou tout tan an pawadi asou latè-a.—Jennésis 1:28; Sam 115:16; Izaya 45:18.
Sa moun ka di: San kawant kat mil-la (144,000) ki mansyonnen an liv Wévélasyon, sé on senbòl ki ka wépwézanté an gwo gwoup moun ki pa ni limowo.
Lavéwité-a: Wi, liv Wévélasyon ni an chay limowo ki senbòl. Mé, sé pa tout limowo an liv sala ki senbòl. Pou ègzanp, Wévélasyon 21:14 ka palé konsèné “non douz [12] zapòt Ti Mouton Bondyé-a.” Alò, annou konsidiwé pwèv ki ka édé nou pou wè, limowo-a san kawant kat mil (144,000) sé pa yon senbòl.
Wévélasyon chapit 7 ka palé konsèné dé (2) diféwan gwoup moun Bondyé kay délivwé. Pwèmyéman, Wévélasyon 7:4 ka di, limowo moun ki té stanpé, èben ki té ni èspwa pou viv an syèl, sé yon san kawant kat mil (144,000). Èk yonndé vèwsé apwé ka palé konsèné, an dézyenm gwoup moun. Mé, gwoup sala diféwan hòd pwèmyé gwoup-la paski, Wévélasyon 7:9, 10 ka kwiyé yo, “an gwan popilas moun, pyèsonn pa té sa konté.” Si limowo-a san kawant kat mil (144,000) sété yon senbòl ki ka wépwézanté on gwo gwoup moun ki pa ni limowo, la pa té kay ni pyès diféwans ant gwoup sala épi gwan popilas-la pyèsonn pa té sa konté-a. a
Anplis di sa, Wévélasyon 14:4 ka dékwi san kawant ka mil-la (144,000) kon, “pwèmyé konpanni moun yo té mété asou koté kon an kado bay Bondyé èk Ti Mouton-an.” (Wévélasyon 14:4) Èspwèsyon-an “pwèmyé konpanni” ka palé konsèné on ti gwoup, ki ka wépwézanté an pli gwo gwoup. Èk sa ka byen dékwi, ti gwoup Kwityen-an ki kay twavay ansanm épi Jézi Kwi an syèl, pou kondwi gwan popilas-la pyèsonn pa sa konté-a asou latè-a.—Wévélasyon 5:10.
a Konsèné san kawant kat mil-la (144,000) ki mansyonnen an Wévélasyon 7:4, Pwofèsè Robert L. Thomas té di: “Limowo sala sé on limowo ki ègzak. Èk i diféwan hòd limowo-a ki an Wévélasyon 7:9, paski limowo-a an Wévélasyon 7:9 sé yon limowo pyèsonn pa sa konté. Konsa, si nou pwan limowo-a, san kawant kat mil (144,000) sala kon yon senbòl, nou ni pou pwan tout limowo an liv Wévélasyon kon senbòl.”—Wévélasyon 1-7: An Exegetical Commentary, paj 474.
Ou Pé Osi Enmen
ESSENTIAL BIBLE TEACHINGS
Ki Sa Wéyòm Bondyé Yé?
Lè Jézi té asou latè, I palé di Wéyòm Bondyé pli pasé tout lòt sijé. Pou plizyè syèk, disip Jézi ja pwédyé pou Wéyòm sala vini.
LÉSISYON LABIB
Apwann Sa Bib-la Ka Di Épi Èd Yon Moun
Apwann sa Bib-la ka di épi èd yon moun, sanʼw péyé anyen.