Wi, Denmou-an wéyal. I sé yon nanj ki té vini méchan, épi i wébélé kont Bondyé. Èvèk Bib-la ka moutwé sé li, mové nanj sala, “ki ka kondwi latè-a.” (Jan 14:30; Èfésòs 6:11, 12) Bib-la ka osi sèvi diféwan non, èk sèten èkspwèsyon pou dékwi Denmou-an. Èvèk sa ka édé nou pou konpwann ki moun Denmou-an vwéman yé, èk pou wè sé mové kawaktè-a i ni-an. Pou ègzanp Bib-la ka kwiyé’y:

•   Satan. Sa vlé di, i ka “opozé.”—Jòb 1:6.

•   Denmou. Sa vlé di, i ka “sali non lézòt.”—Wévélasyon 12:9.

•   Sèpan. Sa vlé di, i sé yon “Kwennad.”—2 Kòrint 11:3.

•   Mantè.—Jan 8:44.

Denmou-an sé pa senpléman on mové bagay andidan lézòm ki ka pousé yo pou fè sa ki pa bon

 Adan moun ka kwè, Satan Denmou-an sé pa anyen pasé movèzté-a nou ni andidan nou. Kanmenm, Bib-la ka di nou konsèné on konvézasyon ant Bondyé épi Satan. Mé Bondyé pawfé, èk i pa ni pyès movèzté andidan’y. Konsa lè Bib-la di, Bondyé té ni on konvézasyon épi Satan, sa pa sa vlé di Bondyé té ka palé épi on mové bagay ki andidan li menm, Bondyé. (Ditonronnonmi 32:4; Jòb 2:1-6) Osi, Satan té tanté Jézi. Mé Jézi pa ni pyès péché non plis, konsa i pa ni pyès movèzté andidan’y. (Mafyou 4:8-10; 1 Jan 3:5) Alò, Bib-la ka moutwé a klè, Denmou-an wéyal. Èvèk Denmou-an sé pa senpléman yon fòs ki ka pousé moun pou fè sa ki pa bon.

 An chay moun pa ka kwè Denmou-an wéyal. Mé sa pa sipozé sipwi nou, paski Bib-la ka moutwé, Denmou-an ka kwennen moun pou fè yo fè sa i vlé. (2 Tèsalonnika 2:9, 10) Èvèk yonn an sé bagay-la i pli kontan sèvi pou kwennen an pil moun sé sa, i ka fè yo kwè i pa ka ègzisté.—2 Kòrint 4:4.

  Sa moun ka di: Lisifè sé an lòt non pou Denmou-an.

 Lavéwité-a: Sèten Bib ka sèvi mo pawòl-la “Lisifè” an Izaya 14:12. Mé, an langaj Hibrou, mo pawòl-la yo twadwi pou “Lisifè,” sé on mo pawòl ki vlé di ‘yonn-la ki ka kléwé.’ Kanmenm, Izaya 14:12 sé yon pwofèsi. Èk si nou li adan sé vèwsé-a ki avan èk apwé vèwsé sala, nou kay wè, pwofèsi sala té ka palé konsèné sé wa-a ki té ka kondwi an vil Babilonn. Bondyé té di, i té kay abésé sé wa sala paski yo té ni twòp lògèy. (Izaya 14:4, 13-20) Alò, èkspwèsyon-an, ‘yonn-la ki ka kléwé,’ sé on èkspwèsyon yo té sèvi pou motjé sé wa-a an Babilonn, apwé yo pèdi pouvwa yo.

  Sa moun ka di: Satan ka twavay kon yon “avoka” bay Bondyé.

 Lavéwité-a: Denmou-an sé lèlmi Bondyé, pa sèvant li. Anfen, Satan Denmou-an ka opozé tout moun ki ka sèvi Bondyé, èk i ka manti asou yo.​—1 Pita 5:8; Wévélasyon 12:10.