Non. Moun kòpi Bib-la pou plizyè lanné asou bagay ki pa té ka diwé. Magwé sa, lè nou konpawé manniskwit a Bib ki té ékwi an tan lontan épi yonn a lòt, nou sa wè konmisyon Bib-la pa janmen chanjé.

 Yo ja twouvé plizyè mil manniskwit Bib. Adan sé manniskwit sala té ni lèwè. Konsa, sa ka moutwé sé moun-nan ki té kòpi Bib-la té fè lèwè an sa yo té ékwi. Mé pwèskè tout sé lèwè-a sé bagay ki senp, èk yo pa chanjé konmisyon Bib-la. Kanmenm, yo té osi twouvé yonn dé gwo lèwè. Mé, i sanm adan moun té fè sé lèwè sala èspwé, paski yo té vlé chanjé konmisyon-an ki an Bib-la. Annou konsidiwé dé (2) ègzanp:

1.   An 1 Jan 5:7, la ni twadiksyon Bib ki ékwi dépi an tan lontan ki ka di: “An syèl, la ni Papa-a, Pawòl-la, èk Lèspwi Sen-an; èk sé twa sala sé yonn.” Kanmenm, la ni manniskwit yo twouvé ki ka moutwé sé pawòl sala pa té la pwèmyé fwa-a yo ékwi Bib-la. Kon sa, sé pli ta moun mété sé pawòl sala an Bib-la. b Alò, twadiksyon Bib an tan jòdi ki aplon, pa ni sé pawòl sala.

2.   Non Bondyé ka pawèt plizyè mil fwa an manniskwit Bib ki ékwi dépi an tan lontan. Mé la ni plizyè twadiksyon Bib, koté yo tiwé non Bondyé èk yo wiplaséʼy épi tit tèl kon “Senyè” ében “Dyé.”

 Yo ja twouvé plizyè manniskwit Bib. Kon sa apwézan, i pli ézé pou yo sav si la ni lèwè an Bib-la. c Alò, lè yo konpawé sé manniskwit sala, kisa yo òbzòvé? Ès nou sa asiwé tout sa ki ékwi an Bib-la nou ni jòdi jou aplon?

•   William Henry Green, yon nonm ki ka étidyé manniskwit Bib, té palé asou sé liv Bib-la ki té ékwi an langaj Hibrou, ében sa yo ka kwiyé “Vyé Tèstanman-an”. I té di: “Nou sa di épi konfyans, anpami tout liv lontan moun ja kòpi, Bib-la sé sèl liv-la ki pa chanjé.”

•   Frederick F. Bruce an nonm ki ka étidyé manniskwit Bib, té palé asou sé liv Bib-la ki té ékwi an langaj Gwik, ében sa yo ka kwiyé “Tèstanman Nèf-la”. I té di: “La ni twòp pli èvidans pou moutwé sa ki ékwi an Tèstanman Nèf-la aplon pasé la ni èvidans pou lòt liv ki té ékwi an tan lontan. Mé pyèsonn pa janmen tjèsyonnen si sa ki ékwi an sé lòt liv sala aplon.”

•   Mi sa Misyé Frederic Kenyon, an nonm moun byen konnèt ki ka étidyé manniskwit Bib té di: On moun “sa tjenbé Bib-la an lanmenʼy, èk di épi konfyans, sa sé vwéman Pawòl Bondyé. Pawòl sala ja pasé an yon jennéwasyon apwé an lòt pou plizyè syèk, san moun chanjé konmisyon-an ki ékwi andidanʼy.”

•   Ni sé Jwif-la ni sé Kwityen-an ki té kòpi Bib-la té kòpi sé wakont-la konsèné gwo lèwè pèp Bondyé té fè. d (Limowo 20:12; 2 Sanmyèl 11:2-4; Galécha 2:11-14) Épi, yo kòpi sé pa-a an Bib-la ki ka kondanné nasyon sé Jwif-la pou lapéti dézobéyisans yo. Èk, yo osi kòpi sé vèwsé-a ki ka moutwé sèten dòktwin moun ka swiv, sé konmandman nonm fè, èk yo pa dwèt. (Hozéya 4:2; Malakay 2:8, 9; Mafyou 23:8, 9; 1 Jan 5:21) Sé moun-nan ki té kòpi Bib-la, té ékwi sé wakont sala ègzaktiman mannyè yo té ékwi an sé manniskwit-la. Sa ka moutwé nou sa konfyé sé moun-nan ki kòpi Bib-la. Èk, i ka osi moutwé yo té ni an chay wèspé pou Pawòl sen Bondyé.

•   Sé Bondyé ki annékòz nonm pou ékwi lévanjil-la. Kon sa, ès ou pa kwè Bondyé té kay fè asiwé konmisyon-an ki an Bib-la pa janmen chanjé? e (Izaya 40:8; 1 Pita 1:24, 25) Chonjé, Bondyé vlé tout moun twapé bennéfis an Bib-la, ni moun ki té ka viv an tan lontan ni moun ki ka viv jòdi jou. (1 Kòrint 10:11) Anfen, an Ronm 15:4 Bib-la ka di nou: “[Tout] sé bagay-la ki té ékwi an lévanjil avan-an té ékwi pou enstwi nou. Paski i ka ankouwajé nou épi moutwé nou mannyè pou tjenbé fò kon sa nou pé ni èspwa.”

•   Jézi épi sé disip li-a té ka sèvi sé lévanjil-la ki té ékwi an langaj Hibrou èk yo té asiwé sé lévanjil sala té aplon.—Louk 4:16-21; Twavay 17:1-3.