Bib-la pa ka enstwi, Bondyé té fè an ti manmay an menm mannyè-a lézòm ka fè manmay. Mé byen souvan, Bib-la ka kwiyé Jézi “Gason Bondyé.” (Jan 1:49) Èkspwèsyon-an “Gason Bondyé,” ka moutwé, sé Bondyé ki Kwéyatè-a. Sé li ki Sous tout lavi. Konsa sa vlé di sé li ki bay Jézi lavi osi.—Sam 36:9; Wévélasyon 4:11.

 An plis di sa, Bib-la ka kwiyé sé nanj-lan, ‘sé gason Dyé vwé-a.’ (Jòb 1:6) Èvèk, Bib-la ka osi di, pwèmyé nonm-lan, Adanm, sété on “gason Bondyé.” (Louk 3:38) Kanmenm, Bib-la ka moutwé, anpanmi tout sé gason-an Bondyé ni-an, sé Jézi ki pli enpòtan. Sa sé paski, sé Jézi ki pwèmyé kwéyasyon Bondyé, èvèk sé li yonn Bondyé kwéyé diwèktiman.

•  Ès Jézi té ka viv an syèl-la avan i fèt asou latè-a?

•  Kisa Jézi té ka fè an syèl avan i té vini asou latè-a?

 Wi. Avan Jézi té fèt kon on nonm asou latè-a, i sété an lèspwi ki té ka viv an syèl-la. Jézi menm té di: “Mwen désann sòti an syèl.”—Jan 6:38; 8:23.

 Bondyé té fè Jézi avan i té fè tout lòt bagay. Mi sé sa Bib-la ka di konsèné Jézi:

•   “Sé li ki pwèmyé Gason Bondyé, épi i èkzisté avan tout lòt bagay ki janmen fèt.”—Kòlòsé 1:15.

•   Sé li “Bondyé sèvi pou fè tout bagay.”—Wévélasyon 3:14.

 Anfen, pwofèsi-a an Mayka 5:2 té di, ‘moun-lan ki té la dépi an tan ansyen, dépi tan lontan,’ té kay sòti an vil Bèfléyenm Èfrafa. Èk sé Jézi ki akonpli pwofèsi sala.—Mafyou 2:4-6.

 Jézi té ni an gwo pozisyon an syèl-la avan i vini asou latè-a. Yon fwa, lè’y té ka pwédyé, Jézi palé konsèné pozisyon-an i té ni an syèl-la lè’y di: “Papa, onnowé mwen . . . menm mannyè ou té onnowé mwen lè mwen té épiʼw, avan latè-a té fèt.”—Jan 17:5.

 Jézi té édé Papa’y pou kwéyé tout lòt bagay. Kon ‘yon moun ki té ka twavay byen,’ Jézi twavay ansanm épi Bondyé pou fè tout bagay. (Pwovèb 8:30) Anfen, an Kòlòsé 1:16, Bib-la di, “Bondyé annékòz Jézi pou fè tout bagay ki janmen fèt, ni tout bagay ki èkzisté an syèl, ni tout bagay ki an latè-a.”

 Wi, Bondyé sèvi Jézi pou kwéyé tout lòt bagay. Sa vlé di, Jézi édé Jéhova pou fè inivès-la, èk pou fè tout sé nanj-lan osi. (Wévélasyon 5:11) Adan an sans, nou sa di, Jéhova épi Jézi twavay ansanm pou kwéyé tout bagay, menm mannyè-a yon atizan épi yon mason ka twavay ansanm pou fè on kay. Atizan-an ka fè plan-an, épi mason-an ka sèvi plan sala pou fè kay-la.

 Jézi sété Pawòl-la. Lè Bib-la ka palé konsèné lavi Jézi avan i té vini asou latè-a, i ka kwiyé Jézi “Pawòl-la.” (Jan 1:1) Sa vlé di, Bondyé té ka sèvi Gason’y Jézi, pou bay sé nanj-lan enfòmasyon, épi enstwiksyon.

 I sanm, Jéhova té ka osi sèvi Jézi pou bay moun asou latè-a konmisyon’y. Pou ègzanp, lè Jéhova té ka ba Adanm épi Èv enstwiksyon an jaden Édenn, pitèt i té sèvi Jézi kon Pawòl-la pou fè sa. (Jennésis 2:16, 17) Osi, pitèt Jézi sété nanj-lan ki té ka djidé jan Izwayèl an savann sèk-la. Èk pitèt, vwa nanj-lan jan Izwayèl té sipozé kouté byen-an, sété vwa Jézi.—Ègzodòs 23:20-23. a