Jézi sové lézòm ki fidèl lè’y té bay lavi’y kon yon sakwifis. (Mafyou 20:28) Anfen, an 1 Jan 4:​14 Bib-la di, Bondyé “voyé Gasonʼy pou sové latè-a.” Osi an Twavay 4:​12 Bib-la di: “Sé li yonn ki sa sové moun. Bondyé pa bay non pyès lòt moun an latè-a ki sa sové nou.”

 Hibrou 2:9 di Jézi té ‘mò pou tout moun’ ki ka moutwé yo ni lafwa an li. (Jan 3:​16) An Twavay 3:​15 nou apwann, apwé Jézi mò, Bondyé wésisité’y kon yon lèspwi èk Jézi viwé mouté an syèl. Apa di sa, Bib-la édé nou wè, kon Jézi an syèl atjwèlman, i sa sové tout moun paski i ka viv pou tout tan, èk i kay sa plédé épi Bondyé pou lapéti yo.​—Hibrou 7:​25.

Pouki nou bizwen Jézi plédé pou nou?

 Ében, nou tout sé péchè. (Ronm 3:​23) Kon sa, péché ka mété an bawad ant nou épi Bondyé, èk péché ka mennen lanmò. (Ronm 6:​23) Kanmenm, Jézi la kon yon avoka pou moun ki moutwé yo ni lafwa an sakwifis-la i té fè-a. (1 Jan 2:1) Jézi ka plédé pou yo lè’y mandé Bondyé pou kouté lapwiyè yo. Jézi ka osi plédé pou yo lè’y mandé Bondyé pou sèvi valè sakwifis li pou pawdonnen péché yo. (Mafyou 1:​21; Ronm 8:​34) Bondyé ka fè sa Jézi mandé’y fè-a, paski sa ka dakò épi volonté Bondyé. Jan 3:​17 di Bondyé té voyé Jézi asou latè “pouʼy té sa sové” jan latè.

Ès nou annèk ni pou kwè an Jézi pou nou sa sové?

 Non, sa pa asé. Magwé nou sipozé kwè an Jézi pou nou sa sové, la ni lòt bagay nou ni pou fè ankò. (Twavay 16:30, 31) An Jémz 2:​26 Bib-la di: “Kò an moun ka mò lè lèspwi-a kitéʼy. Sé menm mannyè-a lafwa-a ou ni-an ka mò si ou di ou ni lafwa an Bondyé mé ou pa ka fè bon bagay.” Alò, pou nou sa sové, sé pou nou:

•   Vini konnèt Jézi èvèk Papa’y Jéhova.​—Jan 17:3.

•   Dévlopé lafwa an yo.​—Jan 12:44; 14:1.

•   Fè sa yo di nou pou fè pou moutwé nou ni lafwa an yo. (Louk 6:​46; 1 Jan 2:​17) Pouki? Paski an Mafyou 7:​21, Jézi té byen di sé pa tout moun ki kwiyé’y Senyè ki kay sové, mé sé sèlman moun-nan ki ‘fè  sa Papa’y ki an syèl vléʼy fè,’ ki kay sové.

•   Kontiné moutwé nou ni lafwa, magwé difikilté. Jézi fè sa klè an Mafyou 24:13 koté’y di: “Moun-an ki tjenbé fò pou jis an bout-la kay sové.”