Ki Lapawans Jézi Té Ni?
Wépons Bib-la Ka Bay
Pyèsonn pa sav ègzaktiman ki lapawans Jézi té ni, paski Bib-la pa ka ban nou pyès détay konsèné lapawans li. Sa ka moutwé nou, sé pa lapawans Jézi ki té enpòtan. Kanmenm, sèten bagay an Bib-la sa édé nou pou ni an ti lidé konsèné sa Jézi té ka sanm.
Fidji’y: Manman Jézi sété on Jwif. Konsa san dout, Jézi pwan bò manman’y èk i té ka sanm sé Jwif-la, paski i sété on Jwif. (Hibrou 7:14) Èk i pa sanm fidji Jézi té tèlman diféwan épi fidji lòt moun non plis. Paskè asou yon lokazyon, Jézi kité Galili an sigwé épi i voyajé pou wivé Jérouzalèm, èvèk pyèsonn pa té wikonnèt sé li ki té la. (Jan 7:10, 11) Osi, i pa sanm lapawans Jézi té diféwan épi lapawans sé disip li-a ki té pli pwé’y-la, paskè chonjé, lè Jida té vini épi gany moun-lan pou awété Jézi, i té ni pou bo Jézi pou fè yo konnèt kilès ki té Jézi.—Mafyou 26:47-49.
Londjè chivé’y: I pa sanm chivé Jézi té lonng, paskè Bib-la di, “lè an nonm ni lonng chivé sa ka kwazé lonnéʼy.”—1 Kòrint 11:14.
Bab li: Jézi té ni bab, paskè i té ka viv anba lwa sé Jwif-la. Èvèk silon lwa-a, nonm pa té ni dwa pou ‘koupé bout bab yo.’ (Livitikòs 19:27; Galécha 4:4) An plis di sa, adan an pwofèsi ki té ka palé konsèné mannyè Jézi té kay soufè, Bib-la ka mansyonnen bab Jézi.—Izaya 50:6.
Kò’y: Tout mannyè nou gadé’y, i sanm Jézi té vayan èk i té fò. Pou ègzanp, i té ka voyajé plizyè lyé a pyé, pou pwéché Bon Nouvèl-la. (Mafyou 9:35) Osi, asou dé (2) lokazyon, Jézi kouwi dèyè sé wivandèz-la ki té ka vann machandiz yo an tanp-lan. Èk i maté tab-la koté yo té ka chanjé lajan-an. Asou yonn sé lokazyon sala, i fè on fwèt épi déotwa mòso kòd, épi i kouwi dèyè sé mouton-an èk sé bèf-la yo té ka vann an tanp-lan. (Louk 19:45, 46; Jan 2:14, 15) Liv-la, McClintock and Strong’s Cyclopedia di: “Tout sa nou li an lévanjil-la ka moutwé, [Jézi] té byen fò èk i té vayan.”—Vòlim IV, paj 884.
Èspwèsyon fidji’y: Jézi ni an chay lanmityé èk konpasyon pou moun. Konsa san dout, èspwèsyon-an asou fidji’y té ka moutwé sa. (Mafyou 11:28, 29) Tout kalité moun té ka alé oti Jézi pou’y édé yo èk soulajé yo. (Louk 5:12, 13; 7:37, 38) Anfen, jis ti manmay ki té ka santi konfòtab épi Jézi.—Mafyou 19:13-15; Mak 9:35-37.
Sa moun ka di konsèné lapawans Jézi
Sa moun ka di: Adan moun ka di, Jézi sété désandan moun Afwik. Yo ka kwè sa paski, liv Wévélasyon ka di, chivé Jézi té “blan kon koton,” èk “dé pyéʼy té ka kléwé menm kon tjwiv.”—Wévélasyon 1:14, 15, The New Jerusalem Bible.
Lavéwité-a: Silon Wévélasyon 1:1 an Bib NWT, liv Wévélasyon ka sèvi senbòl pou wakonté enfòmasyon-an ki adan’y. Konsa, sa Wévélasyon 1:14, 15 ka di konsèné chivé Jézi épi pyé’y, sé senbòl pou dékwi sé kawaktè-a Jézi té kay ni apwé i wésisité. Sé vèwsé sala pa ka dékwi lapawans Jézi lè’y té asou latè-a. Alò, lè Wévélasyon 1:14 di chivé Jézi té “blan kon koton,” sa vlé di Jézi ni an chay lasajès. Wi, Jézi ja viv pou an pil tan. Konsa chivé blan-an ka wépwézanté lasajès-la Jézi ni a kòz di laj li. (Wévélasyon 3:14) Vèwsé sala pa ka palé konsèné koulè chivé Jézi, ében kalité chivé-a i té ni.
Liv Wévélasyon osi di, ‘dé pyé Jézi té ka kléwé menm kon tjwiv.’ (Wévélasyon 1:15) Èk i di ankò, ‘fidji Jézi té ka kléwé menm kon sòlèy midi.’ (Wévélasyon 1:16) Mé, la pa ni pyès was moun asou latè-a ki ni koulè sala. Konsa, sé vèwsé sala sé senbòl. Yo ka dékwi pozisyon-an Jézi té kay ni apwé i wésisité. Lévanjil-la ka moutwé, apwé Jézi wésisité, i sé moun-lan ki ka viv “an klèté-a pyèsonn pa sa vini pwé-a.”—1 Timòfi 6:16.
Sa moun ka di: Jézi té kwapon èk i té fèb.
Lavéwité-a: Jézi pa té pyès kwapon. Osi, i té fò èk vayan. Pou ègzanp, lè gany moun-lan té vini épi sab yo èk boutou yo pou awété Jézi, i pa té kouwi alé séwé. Pito sa, épi kouwaj, i idantifyé kò’y. (Jan 18:4-8) Osi, Jézi té ka twavay kon yon chapantyé. Konsa, i té oblijé fò pou’y té sa fè twavay li kon yon chapantyé, èk pou’y té sa sèvi sé kalité zouti-a chapantyé té ka sèvi an tan sala.—Mak 6:3.
Mé, si Jézi té fò èk i té vayan, pouki on moun té ni pou édé’y pòté poto soufwans-lan? Èvèk, pouki Jézi mò avan sé dé (2) nonm-lan ki té ka pann a koté’y? (Louk 23:26; Jan 19:31-33) Ében, avan yo tjwé Jézi, i té ja byen fèb paskè, swè-a avan i mò, i pa té dòmi pyès. Yon wézon pou sa sété paski i té twakasé an pil. (Louk 22:42-44) Osi diwan nwit sala, sé Jwif-la té maltwété’y. Èk li bonmaten-an, sé jan Ronm-lan té fè’y an chay kwiyoté. (Mafyou 26:67, 68; Jan 19:1-3) San dout, tout sé bagay sala annékòz Jézi pou mò pli vit.
Sa moun ka di: Jézi té sonm, èk fidji’y té toujou sèwyé.
Lavéwité-a: Jézi ni sé menm bèl kawaktè-a Papa’y, Jéhova ni. Èk Bib-la ka kwiyé Jéhova, ‘Bondyé-a ki ni tjè kontan-an.’ (1 Timòfi 1:11 NWT; Jan 14:9) Osi, Jézi té ka moutwé moun sa yo té ni pou fè pou yo té sa ni tjè kontan. (Mafyou 5:3-9; Louk 11:28) Konsa, la pa ni pyès dout ki, Jézi té ni tjè kontan. Èvèk asiwé, moun té sa wè sa asou fidji’y.
Ou Pé Osi Enmen
ESSENTIAL BIBLE TEACHINGS
Ki Mannyè Nou Sa Fè Asiwé Sa Ki An Bib-la Vwé?
Si Labib sé pawòl Bondyé I sipozé diféwan tout lòt liv.
KI MOUN NOU YÉ?
Mandé Pou On Moun Vizitéʼw
Diskité on kwèstyon ou ni asou Bib-la, èben apwann pli konsèné Tèmwen Jéhova.