An Labib, yo twadwi mo pawòl Hibrou-a neʹphesh èk mo pawòl Gwik-la psy·kheʹ pou lam. Mo pawòl Hibrou-a vlé di “yon kwéyati ében yon bagay ki ka pwan lèspiwasyon.” Mo pawòl Gwik-la vlé di “yon kwéyati ében yon bagay ki vivan.” a Alò lam-lan sé pa an bagay andidan an moun, èk lam-lan pa ka kontiné viv apwé kò-a mò. Lam-lan sé moun-nan menm. Annou konsidiwé mannyè Labib ka moutwé lam-lan sé moun-nan menm.

•   An Jennésis 2:7, Labib fè nou konpwann, lè Bondyé té fè pwèmyé nonm-lan Adanm, Adanm té ‘vini yon moun ki vivan.’ Bondyé pa té mété an lam andidan Adanm, mé Adanm té vini an kwéyati ében an moun ki vivan.

•   Labib di lam-lan sa twavay, lam-lan sa vin fen, i sa manjé, i sa obéyi lwa, èk lam-lan sa jis touché an kadav. (Livitikòs 5:2; 7:​20; 23:30; Ditonronnonmi 12:20; Ronm 13:1) Sé pa on bagay andidan an moun ki ka fè sé aksyon sala, sé moun-nan menm ki ka fè’y.

Ès lam-lan sa mò?

 Wi, lam-lan sa mò. La ni plizyè vèwsé an Labib ki ka fè nou konpwann lam-lan sa mò. Annou gadé déotwa ègzanp:

•   ‘Lam-lan ki ka péché-a . . . kay mò.’​—Izikèl 18:​4, 20.

•   An nasyon Izwayèl an tan lontan, lè an moun té fè on péché ki té byen sèwiyé, ki pinisyon yo té ka ba li? Silon lwa-a, pli gwo pinisyon-an sété pou ‘tiwé lam-lan’ anpami pèp-la. (Ègzodòs 12:15, 19; Livitikòs 7:​20, 21, 27; 19:8) Ki sa sa vlé di? Sa vlé di, yo té ka ‘tjwé’ moun-nan.​—Ègzodòs 31:14.

•   Sèten vèwsé an Labib ka sèvi èspwésyon-an yon ‘lam ki mò’ pou palé di kadav an moun. (Livitikòs 21:11; Limowo 6:6) Bon, an pil twadiksyon Labib ka sèvi sé èspwésyon-an on “kadav” ében on “kò” an menm sé vèwsé sala. Kanmenm an Hibrou, langaj-la yo té pwèmyé ékwi Bib-la, yo ka sèvi mo pawòl-la neʹphesh, sa vlé di “lam.”

Mo pawòl-la “lam” sa osi vlé di “lavi”

 Labib ka osi sèvi menm mo pawòl-la “lam” pou palé di “lavi.” Pa ègzanp, an Jòb 33:22, Labib sèvi neʹphesh, mo pawòl Hibrou-a pou “lam” pou palé di “lavi.” Menm mannyè-a tou, Labib moutwé an moun sa mété lam li an wis ében pèd lam li. Sa senpliman vlé di, moun-nan sa mété lavi’y an wis ében pèd lavi’y.​—Ègzodòs 4:​19; Jij 9:​17; Filipay 2:​30.

 Mannyè Labib sèvi mo pawòl-la “lam” ka édé nou konpwann lòt vèwsé tèl kon sa ki di lam an moun ‘ka sòti’ ében lam an moun ‘ka kité’y.’ (Jennésis 35:18) Èspwésyon sala senpliman vlé di moun-nan ka mò. Mé, adan twadiksyon Labib ka pito sèvi èspwésyon-an ‘wann dènyé soupi.’

Ki mannyè moun fè vin kwè lam-lan pa ka mò?

 Wilizyon kwityen ki kwè lam-lan pa ka mò, pa apwann sa an Labib. Pito, yo anmasé sa anba lésisyon Gwik tan lontan. Yon liv yo ka kwiyé Encyclopædia Britannica di: “An Labib mo pawòl-la lam vlé di yon kwéyati ében an bagay ki ka pwan lèspiwasyon. Lam-lan sé pa an bagay ki envizib, ki ka viv a pa di kò-a. Wilizyon ki ka enstwi moun ni an lam andidan yo, anmasé kwéyans sala anba wilizyon Gwik tan lontan.”

 Bondyé pa vlé moun mélanjé lésisyon’y épi lésisyon lézòm; lésisyon lézòm tèl kon, lam-lan pa ka mò. Okontwè, mi sa Labib vèti an Kòlòsé 2:8: “Sé pou zòt asiwé ki pyèsonn pa fè zòt èslav épi kalité katjil-la moun ka fè-a ki ka kwennen-an épi ki pa vo anyen-an, sa ki ka dépan asou twadisyon nonm.”