Mi Sa Bib-la Ka Di

 Lè an moun ka batizé yo ka fouyé moun-lan anba dlo-a. a Èk Bib-la ni plizyè ègzanp batenm koté moun té batizé an dlo. (Twavay 2:41) Anpami sé batenm sala sété batenm Jézi, èk i té batizé an Lawivyè Jouden-an. (Mafyou 3:13, 16) Èk osi, lévanjil-la di, lè an nonm ki sòti péyi Ifiyopiya wè “on koté ki té ni dlo” i mandé Filip pou batizé’y.—Twavay 8:36-40.

 Wi, Jézi té enstwi sé disip li-a ki, yo oblijé batizé. (Mafyou 28:19, 20) Èk zapòt Pita té enstwi menm bagay-la osi.—1 Pita 3:21.

An atik sala nou kay diskité:

•  Kisa ki batenm?

•  Ès Bib-la ka di nou sipozé batizé tibébé?

•  Kisa i vlé di pou batizé an non Papa-a, an non Gason-an, épi an non lèspwi Bondyé?

•  Ès i sé yon péché pou batizé ankò?

•  Lòt batenm Bib-la ka palé konsèné

•  Sa moun ka di konsèné batenm

 Kisa ki batenm?

 Lè on moun batizé, i ka moutwé tout moun i ja wépanti hòd péché’y, èk i ja pwonmèt Bondyé i kay sèvi lavi’y pou fè népòt sa Bondyé vlé. Sa vlé di moun-lan kay obéyi Bondyé èk Jézi an tout sa i ka fè. Èk i ka mété kò’y asou chimen-an pou’y sa twapé lavi étonnèl.

 Osi, lè on moun batizé an dlo sa ka wépwézanté chanjman-an moun-lan ja fè an lavi’y. An ki mannyè? Ében, Bib-la konpawé batenm épi lè yo ka téwé an moun. (Ronm 6:4; Kòlòsé 2:12) Èk sa sé paski, lè moun-lan alé anba dlo-a sa ka moutwé moun-lan téwé lavi-a i té ka viv avan-an. Épi lè moun-lan sòti anba dlo-a i ka koumansé viv lavi’y bay Bondyé.

 Ès Bib-la ka di nou sipozé batizé tibébé?

 Non. Bib-la pa ka enstwi nou sipozé batizé tibébé.

 Anfen, Bib-la ka enstwi la ni sèten bagay on moun ni pou fè, pou’y sa kwalifyé pou batizé. Pou ègzanp, moun-lan ni pou konpwann sa Bib-la ka enstwi asou sèten bagay, épi lavi’y sipozé annòd épi sa Bib-la ka enstwi. Osi moun-lan ni pou wépanti hòd péché’y, èk i ni pou pwonmèt Bondyé an lapwiyè i kay fè volonté’y pou lèwèstan lavi’y. (Twavay 2:38, 41; 8:12) Alò, on tibébé pa sa fè sé bagay sala. Èk sa sé wézon-an nou pa sipozé batizé tibébé.

 Kisa i vlé di pou batizé an non Papa-a, an non Gason-an, épi an non lèspwi Bondyé?

 Jézi té di sé disip li-a: “Pwéché bay sé moun-an pou yo sa vini disip mwen, épi batizé yo an non Papa-a, an non Gason-an épi an non Lèspwi Bondyé, épi enstwi yo pou obéyi tout sé bagay-la mwen ja konmandé’w-la.” (Mafyou 28:19, 20) Kisa èspwèsyon-an “an non Papa-a, an non Gason-an, épi an non Lèspwi Bondyé” vlé di? Ében sa vlé di, moun-lan ki ka batizé-a ka konpwann èk i ka aksèpté lotowité èk pozisyon Papa-a èk Gason-an. Osi, i ka konpwann èk aksèpté mannyè Bondyé ka sèvi lisentèspwi’y pou akonpli divwa’y. Pou ègzanp, zapòt Pita té di on nonm ki té enfim dépi i té fèt: “An non Jézi Kwi nonm Nazawèt-la, lévé maché!” (Twavay 3:6) Wi, lè Pita té di, “an non Jézi Kwi”, sa ka moutwé Pita té ka konpwann èk aksèpté lotowité-a Jézi ni. Èk Pita té konnèt sé vwéman Jézi ki té djéwi nonm-lan.

•   “Papa-a” sé Dyé Jéhova. b Sé li ki ni tout lotowité, paski i sé Kwéyatè-a, Dyé Toupisan, èk Sous Lavi.—Jennésis 17:1; Wévélasyon 4:11.

•   “Gason-an” sé Jézi Kwi, èk i bay lavi’y pou sové nou. (Ronm 6:23) Alò nou pa sa twapé lavi étonnèl si nou pa konpwann èk aksèpté pozisyon Jézi, èk mannyè Jéhova ka sèvi’y pou akonpli divwa’y pou lézòm.—Jan 14:6; 20:31; Twavay 4:8-12.

•   “Lèspwi Bondyé” sé fòs-la ében pouvwa-a Bondyé ka sèvi pou akonpli divwa’y. c Bondyé ja sèvi lisentèspwi’y pou kwéyé bagay, pou bay lavi, pou bay sé pwòfèt li-a èk lòt moun konmisyon’y, èk pou ba yo pouvwa-a yo té bizwen pou fè divwa’y. (Jennésis 1:2; Jòb 33:4; Ronm 15:18, 19) Bondyé osi sèvi lisentèspwi’y pou bwennen tjè sé moun-lan pou yo té sa ékwi konmisyon’y an Bib-la.—2 Pita 1:21.

 Ès i sé yon péché pou batizé ankò?

 An chay moun ka chanjé wilizyon yo. Mé si yo té ja batizé, ès i sé yon péché pou batizé ankò? Ében adan moun pé wéponn wi, pou lapéti mannyè-a yo ka konpwann Èfésòs 4:5, koté i di: “La ni yon sèl Senyè, yon sèl lafwa, épi yon sèl batenm.” Mé kanmenm, vèwsé sala pa ka di an moun pa sa batizé ankò. Konsa, pouki nou ka di sa?

 Kontèks-la. Enfòmasyon-an owon Èfésòs 4:5 ka moutwé zapòt Pòl té ka palé konsèné mannyè Kwityen sipozé ni lilyon an sa yo ka kwè adan. (Èfésòs 4:1-3, 16) Kanmenm pou yo té ni lilyon sala, yo tout té ni pou swiv menm Senyè-a, Jézi Kwi; yo tout té sipozé ni menm lakopwann-la an sa Bib-la ka enstwi; èk yo tout té ni pou swiv sa Bib-la ka di konsèné batenm.

 Anfen, zapòt Pòl té jis ankouwajé adan moun ki té ja batizé pou batizé ankò. Èk sa sé paski, yo té batizé san yo té apwann sèten bagay Kwityen té sipozé konnèt.—Twavay 19:1-5.

 Sa on moun ni pou fè pou kwalifyé pou batenm. Pou Bondyé aksèpté batenm on moun, moun-lan ni pou apwann lavéwité-a ki an Bib-la. (1 Timòfi 2:3, 4) Si on moun té batizé san’y apwann lavéwité-a ki an Bib-la, Bondyé pa kay aksèpté batenm sala. (Jan 4:23, 24) Pitèt lè moun-lan batizé i té kwè i té ka plè Bondyé, mé i ‘pa té ni bon lakonpwann asou sa Bondyé vwéman vlé’y fè’. (Ronm 10:2) Alò, pou Bondyé aksèpté batenm moun sala, i té kay ni pou (1) apwann lavéwité-a ki an Bib-la, (2) apliké sa i apwann an lavi’y, (3) dèdiké lavi’y bay Bondyé, èk (4) batizé ankò. Alò adan on sitiwasyon konsa, i pa kay yon péché pou batizé ankò. Anfen, i kay nésésè pou fè sa pou plè Bondyé.

 Lòt batenm Bib-la ka palé konsèné

 Bib-la ka palé konsèné lòt batenm ki té diféwan épi batenm Kwityen. Annou konsidiwé déotwa ègzanp:

 Sé batenm-lan Jan Batis té fè. d Jan Batis té batizé Jwif èk moun hòd lòt nasyon ki té aksèpté wilizyon sé Jwif-la. Jan batizé yo pou moutwé yo té wépanti hòd sé péché-a yo té fè kont Lwa-a Bondyé té bay nasyon Izwayèl-la. Alò, batenm sala té ka pwépawé sé moun-lan pou idantifyé èk aksèpté Jézi, Mèsaya-a.—Louk 1:13-17; 3:2, 3; Twavay 19:4.

 Batenm Jézi menm. Batenm Jézi té diféwan hòd tout lòt batenm, paski Jézi té pawfé èk i pa té fè pyès péché. (1 Pita 2:21, 22) Konsa, i pa té ni pou wépanti hòd péché ében mandé Bondyé pou “an konsyans ki klè”. (1 Pita 3:21) Pito sa, lè Jézi batizé i té ka pwézanté kò’y pou fè volonté Bondyé kon Mèsaya-a, èk yonn an sé bagay-la i té ni pou fè sété pou bay lavi’y pou nou.—Hibrou 10:7-10.

 Batenm épi lèspwi Bondyé. Ni Jan Batis ni Jézi Kwi palé konsèné batenm épi lèspwi Bondyé. (Mafyou 3:11; Louk 3:16; Twavay 1:1-5) Èk batenm sala diféwan épi batenm-lan an non lèspwi Bondyé. (Mafyou 28:19) Koumannyè nou sav sa?

 Ében sa sé paski, sé annèk an ti gwoup anpami sé disip Jézi-a ki té batizé épi lèspwi Bondyé. Sé Bondyé ki té annonté sé disip sala épi lèspwi’y. Wi, Bondyé chwazi yo pou wann sèvis kon wa èk pwèt épi Jézi an syèl. Konsa ansanm épi Jézi yo kay kondwi latè-a. e (1 Pita 1:3, 4; Wévélasyon 5:9, 10) Mé ki moun yo kay kondwi? Ében, yo kay kondwi sé plizyè milyon disip Jézi-a ki kay viv pou tout tan an Pawadi asou latè-a.—Mafyou 5:5; Louk 23:43.

 Batenm an Jézi Kwi èk an lanmo’y. Kwityen ki batizé épi lèspwi Bondyé ‘batizé an Jézi Kwi’. (Ronm 6:3) Alò, batenm sala ni pou fè épi Jézi èk Kwityen ki annonté épi lèspwi Bondyé. Èk sé yo ki kay kondwi épi Jézi an syèl. Lè moun batizé an Jézi Kwi, yo ka vini manm an kongwigasyon’y. Anfen, Jézi sé Tèt-la èk yo sé kò-a.—1 Kòrint 12:12, 13, 27; Kòlòsé 1:18.

 Kwityen ki batizé épi lèspwi Bondyé osi “batizé an lanmò [Jézi].” (Ronm 6:3, 4) Alò yo ka swiv ègzanp Jézi lè yo obéyi Bondyé pito yo plè kò yo. Osi menm kon Jézi, yo sav yo pa kay viv pou tout tan asou latè-a. Konsa, batenm yo an lanmò Jézi kay fini lè yo mò épi yo alé an syèl.—Ronm 6:5; 1 Kòrint 15:42-44.

 Batenm épi difé. Jan Batis té di sé moun-lan ki té ka kouté’y-la: “I kay batizéʼw épi Lèspwi Bondyé épi difé. I ni bésin li an lanmenʼy épi i pawé pou vanné gwenn-an. Épi i kay mété sé gwenn-an i vanné-a an kay li, mé i kay bwilé sé pay-la adan an difé ki pa kay janmen tenn.” (Mafyou 3:11, 12) Ès ou wéyalizé la ni on diféwans ant batenm épi difé èk batenm épi lèspwi Bondyé? Konsa ki sa Jan Batis té vlé di an pawabòl sala?

 Ében sé gwenn-an ka wépwézanté moun ki ka kouté èk obéyi Jézi. Alò sé moun sala sa batizé épi lèspwi Bondyé. Mé kanmenm, pay-la ka wépwézanté moun ki pa ka kouté Jézi. Alò yo kay batizé épi difé; sa vlé di, Bondyé kay détwi yo pou tout tan.—Mafyou 3:7-12; Louk 3:16, 17.