Lisentèspwi-a sé fòs Bondyé. Sa sé fòs-la Bondyé ka sèvi pou akonpli tout sa i vlé fè. (Mayka 3:8; Louk 1:35) Bondyé sa voyé lèspwiʼy ében fòs li népòt koté pou fè sa ki nésésè pou akonpli divwaʼy.—Sam 104:30; 139:7.

 An Bib-la, mo pawòl-la yo sèvi pou “lèspwi”, sé rouwak an langaj Hibrou, èk nima an langaj Gwik. Byen souvan, yo ka sèvi sé mo pawòl sala lè yo ka palé konsèné fòs Bondyé, ében lisentèspwiʼy. (Jennésis 1:2) Mé, Bib-la ka osi sèvi sé mo pawòl sala pou lòt bagay. Pou ègzanp:

•   Lisouf.​—Habakòk 2:​19; Wévélasyon 13:15.

•   Van.​—Jennésis 8:1; Jan 3:8.

•   Fòs-la ki ka tjenn lézòm èk zannimo vivan.​—Jòb 34:14, 15.

•   Atitid an moun, ében mannyè moun-lan ka katjilé èk wéyaji.​—Limowo 14:24.

•   Lèspwi; pou ègzanp Bondyé épi sé nanj-lan.​—1 Wa 22:21; Jan 4:​24.

 Tout sé bagay sala sé bagay lézòm pa sa wè, mé nou sav yo ka ègzisté paski nou sa wè sa yo ka fè. Yon liv an Annglé di lisentèspwi Bondyé “menm kon van, moun pa sa wèʼy, yo pa sa touchéʼy, èk i ni an chay pouvwa.”​—An Expository Dictionary of New Testament Words, by W. E. Vine.

 Bib-la ka osi kwiyé lisentèspwi Bondyé “lanmenʼy” ében “pouvwa Bondyé”. (Sam 8:3; 19:1; Louk 11:20; gadé Mafyou 12:28.) Menm kon an chapantyé ka sèvi lanmenʼy èk fòs li pou fè twavay li, Jéhova ja sèvi lisentèspwiʼy ében pouvwaʼy pou fè diféwan bagay, tèl kon:

•   Syèl-la èk latè-a.​—Sam 33:6; Izaya 66:​1, 2.

•   Bib-la.​—2 Pita 1:​20, 21.

•   Édé sèvant li an tan lontan pou fè miwak, èk pwéché zélé.​—Louk 4:​18; Twavay 1:8; 1 Kòrint 12:​4-​11.

•   Édé moun ki ka obéyiʼy pou dévlopé bèl kawaktè Kwityen.​—Galécha 5:​22, 23.

Lisentèspwi sé pa an moun

 Bib-la kwiyé lisentèspwi Bondyé ‘lanmenʼyʼ, ‘pouvwaʼyʼ, ében ‘lisouf liʼ. Konsa, sa ka moutwé a klè, lisentèspwi-a sé pa an moun. (Ègzodòs 15:​8, 10) Lanmen an chapantyé ka sèlman twavay anba diwèksyonʼy. An menm mannyè-a, lisentèspwi Bondyé ka sèlman twavay anba diwèksyon Jéhova. (Louk 11:13) Bib-la ka osi konpawé lisentèspwi Bondyé épi glo, èk i ka mansyonnenʼy épi lòt bagay tèl kon lafwa èk nòlaj. Tout sa ka moutwé a klè, lisentèspwi-a sé pa yon moun.​—Izaya 44:3; Twavay 6:5; 2 Kòrint 6:6.

 Osi, Bib-la di nou non Bondyé sé Jéhova, épi non Gasonʼy sé Jézi Kwi. Mé, la pa ni pyès koté an Bib-la nou sa twapé non lisentèspwi-a. (Izaya 42:8; Louk 1:​31) Èk lè Stivann, yon disip Jézi, té wè syèl adan an vizyon, i té wè dé (2) moun an syèl, pa twa (3) moun. Lévanjil-la an Twavay 7:55 di: “Stivann menm ki té anba kondwit Lèspwi Bondyé lévé zyéʼy an syèl épi i wè klèté Bondyé ki té ka kléwé kon sòlèy-la, épi i wè Jézi doubout an lonnè asou lanmen dwèt Bondyé.” Bondyé sèvi lisentèspwiʼy pou fè Stivann wè vizyon sala.

 Sa moun ka di: Silon 1 Jan 5:​7, 8 an Bib King James, “lisentèspwi-a” ében lèspwi sen-an sé an moun, èk i sé an pa an Twinité-a sa vlé di twa (3) dyé an yonn.

 Lavéwité-a: 1 Jan 5:7, 8 an Bib King James ka di: ‘An syèl, la ni Papa-a, Pawòl-la, épi Lèspwi Sen-an: èk sé twa sala sé yonn. Èvèk la ni twa ki ka bay témwenyaj an latè-a.ʼ Mé moun ki ka fè wichach vini konnèt, zapòt Jan pa té ékwi sé pawòl sala, konsa sé pawòl sala pa sipozé an Bib-la. Pwofèsè Bruce M. Metzger ékwi: “Nou asiwé sé pawòl sala fo èk yo pa sipozé an Tèstèman nèf-la.”​—A Textual Commentary on the Greek New Testament.

 Sa moun ka di: Bib-la ka palé konsèné lisentèspwi-a akwèdi i sé an moun, konsa, sa ka moutwé lisentèspwi-a sé an moun.

 Lavéwité-a: Sa vwé, Bib-la ka palé konsèné lisentèspwi-a akwèdi i sé yon moun, mé sa pa vlé di lisentèspwi-a sé vwéman yon moun. Bib-la ka osi palé konsèné lasajès, lanmò, èk péché akwèdi yo sé moun. (Pwovèb 1:​20; Ronm 5:​17, 21) Pou ègzanp, Bib-la di “lasajès Bondyé ka twavay”. Èk i osi di, péché sa kwennen, tjwé, èk lévé tout kalité vyé dézi.​—Mafyou 11:19; Louk 7:​35; Ronm 7:​8, 11.

 Sa moun ka di: Yo ka batizé moun an non lisentèspwi-a, konsa, sa vlé di lisentèspwi-a sé an moun.

 Lavéwité-a: Délè Bib-la ka sèvi mo pawòl-la ‘nonʼ pou palé konsèné pouvwa ében lotowité. (Ditonronnonmi 18:​5, 19-​22; Èsta 8:​10) An Annglé, yo ka fè menm bagay-la. Pou ègzanp, yo ka di “an non lwa-a”. Mé sa pa vlé di lwa-a sé an moun. Alò, lè an moun batizé “an non” lisentèspwi-a, sa vlé di moun-lan konpwann pouvwa-a lisentèspwi-a ni, èk mannyè Jéhova ka sèviʼy pou akonpli divwaʼy.​—Mafyou 28:19.

 Sa moun ka di: Zapòt Jézi èk disip li té ka kwè lisentèspwi-a sété an moun.

 Lavéwité-a: Bib-la pa ka di sa, èk listwa pa ka moutwé sa non plis. Encyclopædia Britannica di: “An lanné twa san katwiven yonn (381) an lépòk nou, an mitin-lan yo kwiyé Council of Constantinople, yo koumansé di lisentèspwi-a sé an moun.” Sa sété pli pasé dé san senkant (250) lanné apwé dènyé zapòt Jézi mò.