Péché sé népòt aksyon, santiman, ében katjil, ki pa an ling épi pwensip Bondyé. Alò, lè nou dézobéyi lwa Bondyé, ében nou fè sa ki pa dwèt an zyé’y, nou ka péché. (1 Jan 3:4; 5:​17) Osi, silon Bib-la, si on moun konnèt bon bagay-la i ni pou fè-a mé i pa ka fèʼy, moun sala ka péché.​—Jémz 4:​17.

 An sé pwèmyé langaj-la yo té ékwi Bib-la, mo pawòl-la yo sèvi pou péché sé on mo ki vlé di, “pou mantjé mak-la.” Pou ègzanp silon Jij 20:16, la té ni on gwoup sòlda an nasyon Izwayèl ki té sa sèvi katapòl tèlman byen, yo té sa voyé on wòch dèyè yon bwanch chivé, èk “yo pa té kay mantjé’y.” Lè yo twadwi vèwsé sala, si yo té twadwi èkspwèsyon-an pou “yo pa té kay mantjé’y” mo pou mo, i té kay li, “yo pa té kay péché.” Alò, mak-la nou vlé wivé-a, sé pou viv an ling épi pwensip Bondyé ki pawfé. Lè nou mantjé mak sala, sa vlé di lè nou fè, di, ében katjilé asou bagay ki pa bon an zyé Bondyé, sa sé péché.

 Sé Bondyé ki Kwéyatè-a. Konsa i ni tout dwa pou di lézòm kisa yo sipozé fè, èk kisa yo pa sipozé fè. (Wévélasyon 4:​11) Èvèk chak di nou kay ni pou wéponn tèt nou douvan Bondyé.​—Ronm 14:12.

Ès i posib pou nou pa janmen péché?

 Non. Anfen, Bib-la di, “tout moun ja péché, épi pyèsonn pa bon asé pou fè Bondyé aksèptéʼy.” (Ronm 3:​23; 1 Wa 8:​46; Ékléziyastis 7:​20; 1 Jan 1:8) Mé pou ki wézon nou sa di, tout moun ja péché?

 Ében Adanm épi Èv, dé (2) pwèmyé moun-lan Bondyé té mété asou latè-a, pa té ni pyès péché an koumansman-an. Sa sété paski Bondyé té fè yo pawfé, èk i té fè yo an imaj li. (Jennésis 1:​27) Mé lè yo dézobéyi Bondyé, yo pa té pawfé ankò. A lè sala yo vini péchè. (Jennésis 3:​5, 6, 17-​19) Èvèk lè yo fè manmay, sé manmay-la éwityé péché èk défo hòd yo. (Ronm 5:​12) Kon Wa David té di, “Mwen ni péché an tjè mwen dépi lè mwen fèt.”​—Sam 51:5.

Ès la ni péché ki pli gwav pasé lézòt?

 Wi. Pou ègzanp Bib-la di, moun péyi Sòdonm an tan lontan ‘té méchan èk yo té ka fè péché ki gwav.’ Èk Bib-la di ankò, sé péché-a moun péyi Sòdonm té ka fè-a té ‘gwav anpil.’ (Jennésis 13:13; 18:20) Alò, annou konsidiwé twa bagay ki sa édé nou konnèt kisa ki ka fè on péché gwav.

1.   Péché ki sèwyé. Bib-la di nou pa sipozé fè bagay tèl kon, imowalité sèksyouwal, adowé fo dyé, vòlè, ében bwè twòp. Bib-la osi di, nou pa sipozé bwitalizé moun pou pwan sa ki sa yo, nou pa sipozé tjwé moun, èk nou pa sipozé fè tjenbwa. Tout sé bagay sala sé péché ki gwav, èk nou pa sipozé fè yo. (1 Kòrint 6:​9-​11; Wévélasyon 21:8) Mé Bib-la ka moutwé, la ni on gwo diféwans ant, sé péché sala, épi lòt péché nou fè san katjilé, tèl kon lè nou di ében fè on bagay ki blésé tjè on moun. (Pwovèb 12:18; Èfésòs 4:​31, 32) Kanmenm, Bib-la ka ankouwajé nou pou pa minimizé pyès péché, paskè ti péché sa fè nou tonbé an péché ki pli gwav.​—Mafyou 5:​27, 28.

2.   Wézon-an moun-lan fè péché-a. La ni péché moun ka fè paski yo pa konnèt kisa Bondyé vlé nou fè. (Twav. 17:30; 1 Timòfi 1:​13) Èk magwé Bib-la pa ka fè èskiz pou sé péché sala, i ka moutwé, la ni on diféwans ant kalité péché sala, épi lòt péché moun ka fè lè yo kasé lwa Bondyé èspwé. (Limowo 15:30, 31) Paskè, on moun ki ka péché èspwé, sé on moun ki ni on ‘tjè ki méchan.’​—Jérémaya 16:12.

3.   Konmen fwa moun-lan fè péché-a. Bib-la ka osi moutwé, la ni on diféwans ant on péché ki fèt yon sèl fwa, èk on péché ki fèt plizyè fwa. (1 Jan 3:​4-8) Kon lévanjil-la di, si on moun kontiné “péché èspwé apwé” i ja apwann pou fè sa ki dwèt, Bondyé kay détwi moun sala.​—Hibrou 10:26, 27.

 Moun ki fè péché ki gwav pé santi akwèdi yo ka pòté on chay ki byen lou. Pou ègzanp, apwé Wa David té fè péché ki gwav, mi sé sa i ékwi: ‘Péché mwen mouté pli ho pasé tèt mwen. Yo menm kon on chay ki lou, yo twòp pou mwen pòté.’ (Sam 38:4) Mé, Bib-la ka ban nou on bèl èspwa. I di: ‘Sé pou moun-nan ki méchan-an kité chimen-an i ka swiv-la. Èk sé pou moun-nan ki ka fè sa ki mové-a tiwé sé vyé katjil-la ki an lidé’y-la. Sé pou’y viwé jwenn Jéhova, Bondyé nou, ki kay ni mizèwikòd asou’y èk ki kay pawdonnen’y konplètman.’​—Izaya 55:7.