Ladjè Anmagèddon sé dènyé ladjè-a ant gouvèdman lézòm épi Bondyé. Sé gouvèdman sala épi sé moun-lan ki ka sipòté yo-a ka opozé Bondyé épi yo ka wifizé pou aksèpté kondwit li. (Sam 2:2) Konsa an ladjè Anmagèdonn, Bondyé kay mennen an bout pou tout gouvèdman lézòm.—Dannyèl 2:44.

 An liv Wévélasyon 16:16, sa sé sèl koté-a ou kay twapé mo pawòl-la “Anmagèdonn” an Bib-la. Pwofèsi-a an Wévélasyon osi moutwé, “plas-la yo ka kwiyé Anmagèdonn-an an langaj sé Jwif-la,” sé la “tout sé wa latè-a” kay ‘asanblé adan an sèl plas pou fè ladjè asou gwan jou Bondyé.’—Wévélasyon 16:14.

 Ki moun ki kay goumen an ladjè Anmagèdonn? Alò sé Jézi Kwi ki kay pwan douvan an ladjè sala. Èvèk i kay djidé lawmé’y kon yo ka goumen an ladjè Anmagèdonn kont sé lèlmi Bondyé-a. (Wévélasyon 19:11-16, 19-21) Wi, Jézi kay détwi tout moun ki pa ka wèspèkté Bondyé.—Izikèl 39:7.

 Ès ladjè Anmagèdonn kay pwan kou adan an sèl plas? Mé non, ladjè Anmagèdonn pa kay pwan kou adan yon sèl plas. Ladjè Anmagèdonn kay goumen an tout latè-a, sòti adan yon bout pou wivé an lòt.—Jérémaya 25:32-34; Izikèl 39:17-20.

 Adan Bib pé sèvi mo pawòl-la “Anmagèdonn”, èk adan ka sèvi mo pawòl-la “Hamagèdonn.” Toulé dé mo pawòl-la vlé di “Montany Mégèdo”. Mégèdo sété an vil ki té an péyi Izwayèl. Listwa ka moutwé, jan Izwayèl té ganyen an chay ladjè an plas sala, épi adan sé ladjè sala osi ékwi an Bib-la. (Jij 5:19, 20; 2 Wa 9:27; 23:29) Kanmenm, jòdi jou nou pa sa di Anmagèdonn sé menm plas-la yo té kwiyé Mégèdo an péyi Izwayèl. Nou sa di sa paski plas sala pa ni pyès gwo montany la, épi pa menm Savann Jèzwiyèl ki ajouté épi plas sala ki asé gwan pou tjenbé tout lèlmi Bondyé. Alò, Anmagèdonn sé pa an plas. Pito, i sé an sitiwasyon koté sé nasyon-an owon latè-a kay mété tèt yo ansanm pou doubout kont kondwit Bondyé.

 Ki mannyè bagay kay yé diwan ladjè Anmagèdonn? Nou pa sav ki mannyè Jéhova kay sèvi pouvwa’y diwan ladjè Anmagèdonn. Kanmenm, nou sav an tan pasé Jéhova ja sèvi bagay tèl kon; boul laglas, twanblanntè, gwo lapli, difé èk souf, zéklè, èk maladi pou akonpli divwa’y. (Jòb 38:22, 23; Izikèl 38:19, 22; Habakòk 3:10, 11; Zèkaraya 14:12) Bib-la osi di diwan ladjè Anmagèdonn, Bondyé kay mété konfizyon an tèt sé lèlmi’y-lan, épi adan di yo kay tjwé yonn a lòt. Konsa, tout lèlmi’y kay ni pou konnèt sé Jéhova ki ka goumen kont yo.—Izikèl 38:21, 23; Zèkaraya 14:13.

 Èskè ladjè Anmagèdonn kay détwi latè-a? Ladjè Anmagèdonn pa kay détwi latè-a, paski lévanjil-la di ‘latè-a ka wèsté la pou tout tan.’ (Sam 37:29; 96:10; Ékléziyastis 1:4) Kanmenm, lè Bib-la sèvi mo pawòl-la “latè-a” i pa vlé di plannèt-la sèlman. Délè mo pawòl-la “latè-a” ka palé konsèné moun ki méchan. (1 Jan 2:​15-​17) Konsa lè Bib-la sèvi èspwèsyon-an “bout latè-a”, i ka palé konsèné bout moun ki méchan.​—Mafyou 24:3, King James Version.

 Mé diwan ladjè Anmagèdonn tout moun asou latè-a pa kay détwi. Sa sé paski, liv Wévélasyon di “an gwan poplilas moun” kay chapé ladjè Anmagèdonn.​—Wévélasyon 7:​9, 14; Sam 37:34.

 Ki jou ladjè Anmagèdonn kay pwan kou? Lè Jézi té ka diskité ‘gwan twibilasyon-an’ ében “gwo soufwans-lan” ki kay bout an ladjè Anmagèdonn, i di: “Pyèsonn pa konnèt ki jou ében ki nèditan tan-an kay bout, pa menm nanj ni Gason Bondyé menm. Sé Bondyé Papa-a yonn ki konnèt lè-a.” (Mafyou 24:21, 36) Kanmenm, Bib-la ka moutwé, ladjè Anmagèdonn kay pwan kou diwan kondwit Jézi, ki koumansé an lanné mil nèf san katòz (1914).—Mafyou 24:37-​39.