Non. Bib-la pa ka di lajan sé on mové bagay, èk i pa ka di ‘lajan sé pwèmyé pa-a pou tout kalité movèsté.’ Wi, an chay moun ka di sa, mé sa Bib-la ka vwéman di sé sa: “Lè on moun enmen lajan, sa sé pwèmyé [pa-a] pou tout kalité movèzté.”—1 Timòfi 6:10.

•  Kisa Bib-la ka di konsèné lajan?

•  Poutji Bib-la ka di, nou pa sipozé enmen lajan?

•  Ki bennéfis nou sa twapé si nou apliké konsèy Bib-la konsèné lajan?

•  Lévanjil konsèné lajan

 Bib-la di lè nou byen sèvi lajan i ‘sé an pwotèksyon’. (Ékléziyastis 7:12) Osi, Bib-la ka aplodi moun ki enmen bay lézòt bagay, tèl kon lajan.—Pwovèb 11:25

 Mé an menm di tan, Bib-la ka di, pa fè lajan pli enpòtan bagay-la an lavi nou. Pou ègzanp, an Hibrou 13:5 i di nou: “Pwan pokosyon pou pa enmen lajan twòp. Sé pou zòt kontanté èk sa zòt ni.” Alò, sa vlé di, nou ni pou byen sèvi lajan. Anfen, pito nou kouwi dèyè lajan, nou sipozé satisfè épi sé bagay-la nou vwéman bizwen, tèl kon had, manjé, èk an plas pou wété.—1 Timòfi 6:8.

 Moun ki anvyèj ében vowas pa kay twapé lavi étonnèl. (Èfésòs 5:5) Yon wézon sé sa, lè on moun vowas, ‘i menm kon lè on moun ka adowé fo dyé’. (Kòlòsé 3:5) Osi on moun ki vowas, pa ka swiv pwensip Bib, konsa i ka fè népòt bagay pou twapé sa i vlé. Anfen, i pé fè kwim tèl kon, mennasé moun pou twapé lajan, vòlè, bòbòl, tjébé moun pa fòs èk mandé lajan pou ladjé moun-lan, ében jis tjwé moun. Èk sa sé wézon-an pouki Pwovèb 28:20 di: ‘Yon moun ki ka kouwi dèyè wichès pa kay wèsté inosan.’

 Menm si lanmityé pou lajan pa ka toujou fè an moun fè mové bagay, i sa mennen lòt mové wézilta. Pouki nou ka di sa? Ében, sa sé paski Bib-la di, “moun ki vlé vini wich [ka] tonbé adan tantasyon épi yo [ka] alé pwi kò yo andidan zatwap épi an chay lòt bagay ki kouyon.”—1 Timòfi 6:9.

 Si nou pa kité lanmityé pou lajan fè nou fè bagay pou déplè Jéhova nou kay ni wèspé pou kò nou, osi Jéhova kay benni nou, èk i kay otjipé nou. Wi, Jéhova di moun ki ka éséyé pou plè’y: “Mwen pa kay janmen kité zòt, mwen pa kay janmen tounen do mwen anlè zòt.” (Hibrou 13:5, 6) An plis di sa, i ban nou asiwans sala: ‘An moun ki fidèl kay twapé an pil bennédiksyon.’—Pwovèb 28:20.