Non, latè-a pa kay janmen détwi. I pa kay bwilé an difé, èvèk Bondyé pa kay fè an lòt latè pou wiplasé latè sala nonpli, paski silon Bib-la, Bondyé fè latè-a pou moun sa wèsté asou’y pou tout tan. Mi yonndé lévanjil ki ka moutwé sa:

•   “Sé moun-an ki dwèt-la kay éwityé tè-a Bondyé té pwonmèt yo-a, èk yo kay viv adanʼy pou tout tan.”​—Sam 37:29.

•   “[Bondyé] mété latè-a doubout fò asou fondasyonʼy, èk anyen pa sa janmen soukwéʼy.”​—Sam 104:5.

•   ‘Latè-a ka wèsté la pou tout tan.’​—Ékléziyastis 1:4.

•   ‘Moun-lan ki fè latè-a èk ki byen établi’y-la, pa té fè latè-a pou anyen. I té fè’y pou moun wèsté asou’y.’​—Izaya 45:18.

 Bondyé pa kay kité lézòm fini détwi latè-a épi ladjè, malpwòpté, ében pyès lòt bagay. Pito sa, i pwonmèt pou “détwi sé moun-an ki ka détwi latè sala.” (Wévélasyon 11:18) Ki mannyè Bondyé kay fè sa?

 Ében, gouvèdman lézòm ja moutwé yo pa sa pwotéjé latè-a. Konsa, Bondyé kay sèvi Wéyòm li ki an syèl, pou wiplasé tout gouvèdman lézòm. (Dannyèl 2:​44; Mafyou 6:​9, 10) Sé Jézi Kwi Gason Bondyé, ki kay kondwi an Wéyòm sala. (Izaya 9:​6, 7) Lè Jézi té asou latè-a, i fè miwak ki té ka moutwé i ni pouvwa-a pou kondwi bagay an nati tèl kon, van-an. (Mak 4:​35-​41) Kon Wa an Wéyòm Bondyé, Jézi ni tout pouvwa pou kontwolé latè-a épi tout sa ki adan’y. Èk i kay sèvi pouvwa sala pou fè latè-a vini nèf, menm kon’y té yé an koumansman-an, an jaden Édenn.​—Mafyou 19:28; Louk 23:43.

 Non, Bib-la pa ka di sa pyès. Mé la ni moun ki ka kwè Bib-la ka di sa. Èk wézon-an yo ka kwè sa, sé paski yo ka malkonpwann sa Bib-la ka di an 2 Pita 3:7. Vèwsé sala ka di: “Bondyé ka . . . pwézèvé latè épi syèl sala ou ka wè-a, pou i sa détwi yo épi difé.” Mé annou konsidiwé dé (2) pwen enpòtan ki sa édé nou konpwann kisa vèwsé sala vlé di:

1.   Bib-la ka sèvi sé mò pawòl-la “syèl,” “latè,” épi “difé” pou palé konsèné plizyè diféwan bagay. Pou ègzanp, Jennésis 11:1 ka di: ‘Tout latè-a té ka palé yon sèl langaj.’ Mé, mo pawòl-la “latè-a” an vèwsé sala ka wépwézanté lézòm.

2.   Sé vèwsé-a ki avan èk apwé 2 Pita 3:7 ka édé nou pou konpwann kisa sé mo pawòl-la syèl, latè, épi difé an vèwsé 7 vlé di. Pou ègzanp, vèwsé 5 èk 6 ka palé konsèné délij-la ki té fèt an tan Nowa. Èk vèwsé 6 ka di, dlo délij-la té détwi latè-a. Mé vwéman, anyen pa té wivé “latè-a,” ében plannèt-la. Sé moun méchan ki té détwi an délij-la. (Jennésis 6:​11) Èk nou sa di, délij-la an tan Nowa té osi détwi an kalité “syèl.” Syèl sala ka wépwézanté sé moun-lan ki té ka kondwi asou latè a lè sala. Wi, sé sèlman moun méchan ki té détwi an délij-la an tan Nowa. Anyen pa té wivé plannèt nou, latè-a. Nou sav sa paski, Nowa épi fanmi’y kontiné viv asou latè-a, apwé délij-la.​—Jennésis 8:​15-​18.

 Konsa, lè 2 Pita 3:7 di, Bondyé kay détwi latè èk syèl épi “difé,” sa vlé di i kay détwi tout moun ki méchan, menm kon’y té détwi lé méchan an délij-la an tan Nowa. Bondyé pa kay détwi latè-a. Bondyé pwonmèt, i kay fè on syèl épi on latè nèf, “koté moun toupatou kay viv mannyè Bondyé vlé yo viv-la.” (2 Pita 3:​13) Mé “syèl nèf” sala sé Wéyòm Bondyé, èvèk “latè nèf” sala sé lézòm, ében nou sa di on sosyété moun ki ka viv dwèt asou latè-a. Wéyòm Bondyé kay kondwi latè-a épi tout moun ki ka viv asou’y. Èvèk, anba kondwit Wéyòm Bondyé latè-a kay vini on pawadi, èk la kay ni lapé alabondans.​—Wévélasyon 21:​1-4.