Michèl sé an non pou Jézi, avan èk apwé lavi’y asou latè-a. Adan wilizyon ka di “Sen Michèl.” a Bib-la ka di nou, Michèl té ni on chikann épi Denmou-an konsèné kadav Moziz. Èk Bib-la ka osi di, Michèl té édé yon nanj pou délivwé konmisyon Bondyé bay pwofèt Dannyèl. (Dannyèl 10:13, 21; Joud 9) Michèl ka défann dwa-a Jéhova ni pou kondwi, èk i ka goumen kont lèlmi Bondyé. Konsa i méwité pou ni non-an Michèl, paskè non sala vlé di, “Ki Moun Ki Menm Kon Bondyé?”​—Dannyèl 12:1; Wévélasyon 12:7.

 Bon, annou konsidiwé yonndé wézon pouki nou sa di sé Jézi ki Michèl, chèf sé nanj-lan.

•   Michèl sé “chèf sé nanj-lan.” (Joud 9) Tit-la “chèf sé nanj-lan,” ka pawèt an sèlman dé (2) vèwsé an Bib-la. Èk toulédé sé vèwsé sala ka palé konsèné yon nanj. Konsa, sé yon sèl nanj ki ni tit sala. Yonn an sé vèwsé-a ki ka mansyonnen tit sala sé 1 Tèsalonnika 4:16. Vèwsé sala ka di, “Senyè-a [Jézi Kwi] kay désann sòti an syèl-la épi an gwo vwa ki ka konmandé, [èk] nou kay tann vwa chèf nanj-lan.” Wi, Jézi ni vwa “chèf nanj-lan,” paskè sé li menm ki Michèl, chèf sé nanj-lan.

•   Michèl sé konmandè-a pou an gwo lawmé nanj. Silon Wévélasyon 12:7, “[Michèl] épi nanj li goumen kont gwo sèpan-an,” sa vlé di Satan. Osi, Michèl ni an chay lotowité an syèl. Anfen Bib-la ka di, Michèl sé ‘yonn an sé pwens-la ki ni pli gwo pozisyon.’ Èvèk Bib-la ka di ankò, Michèl sé ‘gwan pwens-la.’ (Dannyèl 10:13, 21; 12:1) Kon David E. Aune, yon nonm gwo endikasyon, ki té étidyé Tèstanman Nèf-la di, sé tit sala ka idantifyé Michèl kon “konmandè-a pou an gwo lawmé nanj.”

   Bib-la ka mansyonnen sèlman yon lòt moun ki ni lotowité asou on lawmé nanj. I di: “Senyè Jézi Kwi kay pawèt an syèl-la an mitan gwo flanm difé èk sé nanj li-a ki ni pouvwa-a.” (2 Tèsalonnika 1:​7, 8; Mafyou 16:27) Osi, apwé Jézi wésisité, i alé an syèl. Èk apwézan i ka kondwi “anho tout nanj, tout lotowité épi tout pouvwa.” (1 Pita 3:​21, 22) Konsa, i pa ka fè pyès sans pou Bondyé apwenté Jézi épi Michèl kon dé (2) konmandè alakous épi yonn a lòt, anho sé nanj-lan. I pli wézonnab pou kwè, sé dé (2) non-an, Jézi épi Michèl, ka palé konsèné menm moun-lan.

•   Michèl ‘kay doubout’ diwan ‘an tan ki ni an chay twakasman. An tan ki p’òkò janmen ègzisté dépi moun asou latè-a.’ (Dannyèl 12:1) Byen souvan an liv Dannyèl, yo ka sèvi èkspwèsyon-an “doubout,” lè yo ka palé konsèné on wa ki pwan aksyon pou fè an bagay spésyal, ében pou fè an bagay ki enpòtan. (Dannyèl 11:​2-4, 21) Jézi Kwi, moun-lan Bib-la ka kwiyé “Pawòl Bondyé-a,” kay pwan aksyon adan an mannyè spésyal kon “Wa tout wa,” pou détwi tout lèlmi Bondyé, èk pwotéjé pèp Bondyé. (Wévélasyon 19:11-​16) Jézi kay pwan aksyon sala diwan tan-an ki kay “pli mové pasé pyès lézòt tan ki ja janmen ni, dépi an koumansman latè-a.”​—Mafyou 24:21, 42.