Ès Wéyòm Bondyé An Tjè’w?
Wépons Bib-la Ka Bay
Non, Wéyòm Bondyé sé pa senpliman on bagay ki andidan tjè moun ki Kwityen. a Bib-la ka édé nou wè ègzaktiman ki koté Wéyòm Bondyé yé lè’y kwiyé’y, ‘wéyòm di syèl.’ (Mafyou 4:17, King James Version) Alò, annou konsidiwé sa Bib-la ka di pou moutwé, Wéyòm Bondyé sé an gouvèdman wéyal ki ka kondwi hòd syèl.
Wéyòm Bondyé ni kondwitè, i ni moun anba kondwit li, i ni lwa, èk i ni lotowité pou fè asiwé divwa Bondyé fèt an syèl épi asou latè-a.—Mafyou 6:10; Wévélasyon 5:10.
Gouvèdman Bondyé, èben Wéyòm li, kay kondwi ‘tout pèp, tout nasyon, èk tout gwoup moun ki ka palé diféwan langaj’ asou latè-a. (Dannyèl 7:13, 14) Èk sé pa moun ki mété gouvèdman Bondyé an pouvwa. Sé Bondyé menm ki établi gouvèdman’y, èk sé li menm ki ba’y lotowité pou kondwi.—Sam 2:4-6; Izaya 9:7.
Jézi té di sé zapòt fidèl li-a, yo té “kay asid pou kondwi [épi’y]” an Wéyòm di syèl-la.—Louk 22:28, 30.
Wéyòm Bondyé kay détwi tout lèlmi’y.—Sam 2:1, 2, 8, 9; 110:1, 2; 1 Kòrint 15:25, 26.
Konsa, Bib-la pa ka di, Wéyòm Bondyé ka kondwi an tjè nou. Kanmenm, Bib-la ka moutwé, “konmisyon” Wéyòm-lan, èben “Bon nouvèl-la” ki an Bib-la, sa touché tjè nou. Anfen, sé sa i sipozé fè.—Mafyou 13:19; 24:14.
Kisa èkspwèsyon-an ‘wéyòm Bondyé andidan zòt’ vlé di?
Sèten twadiksyon Bib, tèl kon Bib King James Version, ka sèvi èkspwèsyon-an, ‘wéyòm Bondyé andidan zòt,’ an Louk 17:21. Èk sé pou wézon sala, adan moun ka kwè Wéyòm Bondyé sé yon bagay ki andidan tjè nou. Mé, pou nou byen konpwann sa Jézi té ka di an Louk 17:21, nou ni pou konsidiwé yonndé vèwsé avan, èk apwé vèwsé sala.
Wéyòm Bondyé pa té andidan tjè sé moun méchan-an ki té hayi Jézi èk ki té vlé tjwé’y-la
Pou ègzanp, silon sa nou li an Louk 17:20, sé Fawizyen-an té mandé Jézi on kèstyon. Konsa, an Louk 17:21 Jézi té ka palé bay sé Fawizyen-an. I té ka wéponn kèstyon-an yo té mandé’y-la. Bon, sé Fawizyen-an sété yon gwoup chèf wilizyèz an pwèmyé syèk-la. Èvèk yo té hayi Jézi tèlman, yo jis fè konplo pou tjwé’y. (Mafyou 12:14; Louk 17:20) Konsa, ès ou vwéman kwè, Wéyòm Bondyé sété on bagay ki té andidan tjè sé nonm méchan sala? Janmen! Anfen, Jézi té di yo a klè: “Andidan [tjè zòt] plen péché épi ipokwizi.”—Mafyou 23:27, 28.
Mé, la ni lòt twadiksyon Bib ki twadwi pawòl Jézi an Louk 17:21 kòrèk, èk adan an mannyè ki pli klè. Èvèk sa ka édé nou konpwann kisa Jézi té ka di an vèwsé sala. Pou ègzanp, Louk 17:21 an Bib Contemporary English Version ka di: ‘Wéyòm Bondyé la épi zòt.’ (Sé nou ki mété mo pawòl-la, épi an Italics.) Èvèk an Bib New World Translation vèwsé sala ka di, ‘Wéyòm Bondyé anpami zòt.’ Mé, pou ki wézon Jézi té sa di sé Fawizyen-an, Wéyòm Bondyé té “épi,” ében “anpanmi” yo? Ében Jézi té sa di sa paski, Bondyé té ja chwazi li Jézi, pou kondwi kon Wa an Wéyòm-lan, èk i té ka doubout la douvan sé Fawizyen-an.—Louk 1:32, 33.
a An chay wilizyon ka enstwi, Wéyòm Bondyé sé on bagay ki andidan tjè an moun. Pou ègzanp, liv-la The Catholic Encyclopedia ka di: “Wéyòm Bondyé vlé di . . . Bondyé ka kondwi an tjè nou.” Èk, Pope Benedict li sèz (XVI) ka fè menm pwen sala an Jesus of Nazareth, on liv i ékwi, lè’y di: “Wéyòm Bondyé ka vini lè on moun aksèpté [Jézi] épi tout tjè’y.”
Ou Pé Osi Enmen
ESSENTIAL BIBLE TEACHINGS
Ki Sa Wéyòm Bondyé Yé?
Lè Jézi té asou latè, I palé di Wéyòm Bondyé pli pasé tout lòt sijé. Pou plizyè syèk, disip Jézi ja pwédyé pou Wéyòm sala vini.
LÉSISYON LABIB
Apwann Sa Bib-la Ka Di Épi Èd Yon Moun
Apwann sa Bib-la ka di épi èd yon moun, sanʼw péyé anyen.