Témwen Jéhova pa ka sélébwé jou nésans, paski nou sav sé sélébwasyon sala pa ka plè Bondyé. Magwé Bib-la pa di nou diwèktiman pou pa sélébwé jou nésans, i ka édé nou pou wézonnen asou déotwa bagay konsèné sélébwasyon sala, èk pou konpwann mannyè Bondyé ka santi konsèné’y. Alò, annou konsidiwé kat (4) an sé bagay sala, èk déotwa pwensip Bib ki ni pou fè épi sa.

1.   Sélébwasyon jou nésans koumansé an fo wilizyon. Silon liv-la Funk & Wagnalls Standard Dictionary of Folklore, Mythology, and Legend, sélébwasyon jou nésans koumansé paski moun té ka kwè asou jou nésans on moun, “vyé lèspwi té sa ataké moun-lan” èk “si’y té ni jan’y épi’y ka swété’y byen asou jou sala, sa té kay pwotéjé’y”. Osi, silon liv-la The Lore of Birthdays, an tan lontan i té enpòtan pou wéjistwé dat-la on moun fèt, pas a lè sala “yo té kay sa ba moun-lan on sin ‘horoscope’”. Èvèk sé sin sala bazé asou bagay ki ni pou fè épi “madjik èk sé sin étwal-la”. Liv sala osi di: “Sé bouji-a asou bonbon-an pou jou nésans-lan té ni pouvwa spésyal pou fè tout sa moun swété moun-lan asou jou nésans li, fèt vwé.”

    Chonjé, Bib-la ka kondanné bagay tèl kon, madjik, tjenbwa, moun ki ka éséyé konnèt sa ki kay fèt denmen, ében ‘lòt bagay kon sa’. (Ditonronnonmi 18:14; Galécha 5:19-21) Anfen, yonn an sé wézon-an Bondyé té kondanné vil Babilonn an tan lontan, sété paski sé moun-lan té ka toujou étidyé sé étwal-la pou éséyé konnèt sa ki kay fèt. (Izaya 47:11-15) Kanmenm, Témwen Jéhova pa ka toujou gadé ki koté tout lakoutim sòti, mé lè Bib-la ban nou diwèksyon ki klè asou on bagay, nou pa ka inyowé diwèksyon-an.

2.   Sé Kwityen-an an pwèmyé syèk-la pa té ka sélébwé jou nésans. Konsèné sé Kwityen-an an pwèmyé syèk-la, The World Book Encyclopedia di: “Yo té ka konsidiwé sélébwasyon jou nésans népòt moun kon on bagay ki sòti an fo wilizyon.” Osi Bib-la ka moutwé sé zapòt-la èk lòt moun Jézi té enstwi, kité on bon ègzanp pou tout Kwityen swiv.—2 Tèsalonnika 3:6.

3.   Sèl sélébwasyon Bib-la ka koumandé Kwityen pou tjenn sé sélébwasyon lanmò Jézi Kwi, pa sélébwasyon jou nésans. (Louk 22:17-20) Alò, sa pa ka sipwi nou, paski an Ékléziyastis 7:1 Bib-la di: ‘Jou-a on moun mò pli mèyè pasé jou-a i fèt.’ Anfen, diwan tan-an Jézi té asou latè-a, i té fè on bon non épi Bondyé. Konsa Jézi té moutwé a klè, jou-a i mò-a té pli enpòtan pasé jou-a i té fèt-la.—Hibrou 1:4.

4.   Bib-la pa janmen di sèvant Jéhova té ka sélébwé jou nésans. Sa sé pa on lèwè, paski Bib-la ka palé konsèné dé (2) jou nésans. Èvèk sé dé moun-lan ki té sélébwé jou nésans yo pa té ka adowé Jéhova. Osi, mové bagay té fèt an toulédé sélébwasyon sala.—Jennésis 40:20-22; Mak 6:21-29.

 Menm kon tout bon pawan, Témwen Jéhova ka moutwé zanfan yo yo enmen yo toulé jou. Pou ègzanp, yo ka ba zanfan yo kado èk yo ka enjwi pasé tan épi zanfan yo. Lévanjil-la an Mafyou 7:11 di nou ‘Bondyé ka bay ich li bon bagay’ konsa, pawan ki Témwen Jéhova ka swiv bèl ègzanp Bondyé. Alò, zanfan Témwen Jéhova pa ka santi yo ka mantjé anyen. Anfen, mi sé sa déotwa di yo di:

•   “Sa ki pli bon sé lè on moun sipwi’w épi on kado.”—Tammy, douz (12) lanné.

•   “Menm si mwen pa ka twapé kado asou jou nésans mwen, pawan mwen ka ganyen kado ban mwen asou lòt lokazyon. Mé mwen kontan’y kon sa, paski a lè sala yo ka sipwi mwen.”—Gregory, wonz (11) an.

•   “Konsa, ès ou kwè an dis (10) minit ou sa ni on fèt épi on bonbon épi an chanson? Awa. Sé pou’w vini lakay mwen pou wè kisa on fèt yé!”—Eric, sis (6) lanné.