Lè Tèmwen Jéhova ka étidyé Bib-la, yo pa ka senpliman sèvi yon sèl Bib. Mé yo ka gadé plizyè lòt diféwan Bib. Kanmenm, si yo ni Bib-la, New World Translation of the Holy Scriptures an langaj yo, yo simyé sèvi’y. Pouki? Paski (1) i ka sèvi non Bondyé, (2) i aplon èk (3) i pli ézé pou li èk konpwann.

•   New World Translation-la ka sèvi non Bondyé. Adan moun ki pwodwi Bib-la, pa té bay Bondyé lonnè-a i méwité-a, paski yo pa té mété non’y koté-a i sipozé yé-a. Pou ègzanp, an yon Bib yo té twadwi, yo nonmé non tout sé moun-lan ki té édé pwodwi Bib sala. Èk sa té plis pasé 70 non. Mé an menm Bib sala, pa menm yon fwa yo mété non moun-lan ki té wèskonsab pou Bib-la, Jéhova.

   Kanmenm, lè yo té ékwi Bib-la, non Bondyé té ka pawèt konmen mil fwa. Konsa, an New World Translation-la, yo mété non Bondyé tout koté i té sipozé yé an Bib-la. Èk yo pa té mété pa menm yon non, an non sé moun-lan ki té édé pwodwi’y.

•   New World Translation-la aplon. Lè i vini pou konmisyon ki an Bib-la, sé pa tout twadiksyon ki aplon. Pou ègzanp, yon twadiksyon an Mafyou 7:​13 ka di: “Antwé an bayè-a ki étwèt-la, paski bayè-a ki ka mennenʼw lanfè-a gwan épi chimen-an ézé.” Lè yo té ékwi lévanjil sala an langaj Gwik, yo té sèvi on mo pawòl ki vlé di “distwiksyon” èk pa “lanfè”. Pitèt sé moun-lan ki té twadwi vèwsé sala té kwè moun ki méchan kay bwilé an difé lanfè pou tout tan. Konsa, yo té sèvi mo pawòl-la “lanfè”. Mé sé pa sa Bib-la ka di. Konsa, mi sé sa i ka di nou an New World Translation-la: ‘Antwé an bayè-a ki étwèt-la, paski bayè-a ki ka mennenʼw chimen distwiksyon gwan épi chimen-an ézé.’ Wi, twadiksyon New World Translation-la byen aplon.

•   New World Translation-la ézé pou li èk ézé pou konpwann. Yon bon twadiksyon Bib sé yonn ki aplon, ézé pou li, èk ézé pou konpwann. Annou konsidiwé yon ègzanp. An Filipay 1:8, si nou twadwi èspwèsyon zapòt Pòl té sèvi an lévanjil sala mo pou mo, i ka di: “Mwen anvi zòt tout an boyo Jézi Kwi.” Mé jòdi jou, moun pa ka konpwann sa. Alò, Bib New World Translation-la ka twadwi lévanjil sala adan on mannyè ki pli ézé pou konpwann. An New World Translation-la lévanjil sala ka di: ‘Épi Bondyé menm sav sé pa dé anvi mwen anvi wè zòt tout. Èk afèksyon-an mwen ni pou zòt-la ka sòti ofon tjè mwen, menm kon afèksyon-an Jézi Kwi ni pou zòt-la.’

 Wi, Bib New World Translation-la ka sèvi non Bondyé, i aplon, i ézé pou li épi konpwann. An plis di sa, la ni on lòt bagay ki ka fè Bib sala diféwan: On moun pa ni pou péyé pou twapé yonn. Konsa, milyon di moun owon latè-a sa li èben kouté Bib-la an langaj yo menm, èben adan on langaj yo sa konpwann. Èk yo sa fè sa menm si yo pa ni lajan pou achté yonn.