Nou ka pwan bon pwokosyon pou tjenn Mémoriyal lanmò Jézi ében sa moun ka kwiyé Dènyé Wipa Senyè-a mannyè-a Bib-la di pou fè’y. (1 Kòrint 11:20) Mé mannyè-a an chay lòt wilizyon ka fè’y, pa ka dakò épi sa Bib-la di.

 Wézon-an nou ka tjenn Dènyé Wipa Senyè-a sé pou chonjé Jézi èk pou moutwé apwésiyasyon nou pou sakwifis-la i fè ban nou. (Mafyou 20:28; 1 Kòrint 11:24) Sélébwasyon sala sé pa an bagay moun ka fè pou ni favè Bondyé ében pou jwenn pawdonnasyon pou péché yo. Okontwè, Bib-la ka moutwé sèl mannyè Bondyé kay pawdonnen péché nou, sé si nou ni lafwa an Jézi.—Ronm 3:25; 1 Jan 2:1, 2.

 Jézi té konmandé sé disip li-a pou tjenn Dènyé Wipa Senyè-a. Mé i pa té di yo fwanchman, ki otan souvan pou fè’y. (Louk 22:19) Adan moun kwè ou sipozé tjenn li toulé mwa. Èk la ni lòt moun ki kwè ou sipozé tjenn li toulé simenn, toulé jou, ében konmen fwa pa jou. Apa di sa, la ni lòt moun ki kwè yo sipozé tjenn li népòt lè yo vlé. Kanmenm, la ni yonn dé bagay nou sipozé chonjé lè’y vini pou Dènyé Wipa Senyè-a.

 Jézi té ni pwèmyé Wipa Senyè-a asou menm dat-la sé Jwif-la té ka tjenn Fèt Délivwans-lan. Èk i mò pli ta menm jou sala. (Mafyou 26:1, 2) Bon, sa pa té fèt pa aksidan. Poutji nou di sa? Sé paski Bib-la konpawé sakwifis Jézi épi ti mouton-an yo té ka tjwé pou Fèt Délivwans-lan. (1 Kòrint 5:7, 8) Yo té ka tjenn Fèt Délivwans-lan yon fwa pa lanné. (Ègzodòs 12:1-6; Livitikòs 23:5) Kon sa, sé Kwityen-an an pwèmyé syèk-la té ka tjenn Mémoriyal lanmò Jézi yon fwa pa lanné, a èk Témwen Jéhova ka swiv menm mòd sala.

 Ègzanp-lan Jézi kité-a pa ka sèlman fè nou sav ki otan souvan pou tjenn Mémoriyal-la. Mé i ka osi fè nou sav ki dat èk ki lè pou tjenn li. Jézi té tjenn pwèmyé Wipa Senyè-a apwé sòlèy kouché li 14 Nizan, lanné 33 An Lépòk Nou. (Mafyou 26:18-20, 26) Kon sa, menm kon sé Kwityen-an an pwèmyé syèk-la, nou ka kontiné tjenn Mémoriayl-la chak lanné asou menm dat sala. b

 Magwé li 14 Nizan, lanné 33 An Lépòk Nou, sété an Vandwédi, sa pa vlé di annivèwsè lanmò Jézi kay tonbé asou an Vandwédi chak lanné. Pou nou konnèt ki dat li 14 Nizan ka tonbé asou chak lanné, nou pa ka sèvi mòd-la moun ka sèvi apwézan mé nou ka sèvi menm mòd-la yo té ka sèvi an tan Jézi. c

 Pwèmyé fwa-a Jézi té tjenn wipa sala, i té sèvi lèstan pen san lèlven-an èk lèstan diven wouj-la yo té sèvi pou fété Fèt Délivwans-lan. (Mafyou 26:26-28) Kon sa, menm kon Jézi té fè nou ka sèvi pen ki pa ni lèlven ében népòt lòt bagay andidan’y. Èk, nou ka sèvi diven wouj tou pi. Pou wézon sala, nou pa ka sèvi ji di wézen, diven ki dousi, ében pyès diven ki ni zépis.

 Adan wilizyon ka sèvi pen ki ni lèlven. Mé byen souvan an Bib-la, lèlven ka wépwézanté péché ében an bagay ki pa bon. (Louk 12:1; 1 Kòrint 5:6-8; Galécha 5:7-9) Kon sa, sé sèlman pen ki pa ni lèlven ében népòt lòt bagay andidan’y ki sa vwéman wépwézanté kò Jézi ki té san péché. (1 Pita 2:22) Adan wilizyon ka osi sèvi ji di wézen pito yo sèvi diven tou pi. Bib-la pa ka sipòté sa nonplis. Sé wilizyon sala ka fè sa paski yo kwè Kwityen pa sipozé bwè. Mé Bib-la pa di sa pyès.—1 Timòfi 5:23.

 Non! Magwé an pil moun kwè sa, pen-an èk diven-an yo ka sèvi diwan Mémoriyal-la ka sèlman wépwézanté kò èk san Jézi Kwi. Poutji nou di sa? Ében ann’ gadé yonn dé wézon Bib-la bay.

•   Pwèmyéman, si Jézi té konmandé sé disip li-a pou bwè san’y, sé konmsi i té ka mandé yo pou dézobéyi lwa Bondyé asou san. (Jennésis 9:4; Twavay 15:28, 29) Mé nou sav Jézi pa té kay janmen mandé pyèsonn pou fè anyen ki té kont lwa Bondyé.—Jan 8:28, 29.

•   Dézyenman, an Mafyou 26:28 Jézi té di sé disip-la: “San mwen kay koulé.” Jézi té di yo sa padan yo té ka bwè diven-an. Kon sa, sé pa san Jézi menm yo té ka bwè, paski Jézi p’òkò té mò, san’y p’òkò té koulé.

•   Twazyenman, Jézi Kwi ofè kò’y kon yon sakwifis, èk i pa kay ofè kò’y ankò. (Hibrou 9:25, 26) Alò, si pen-an èk diven-an ka tounen lachè èk san Jézi diwan Dènyé Wipa Senyè-a, sa kay vlé di, chak fwa sé moun-nan manjé pen-an èk bwè diven-an yo ka wépété sakwifis-la.

 Moun ki kwè pen-an èk diven-an ka tounen lachè èk san Jézi ka bazé dòktwin sala asou mannyè moun twadwi sèten vèwsé an Bib-la. Pa ègzanp, an plizyè twadiksyon Bib Mafyou 26:28 di: “Sa sé san mwen.” Kanmenm, ou sa osi twadwi sé pawòl sala adan an lòt mannyè tèl kon: “Sa ka wépwézanté san mwen.” d Byen souvan, lè Jézi té ka enstwi sé disip li-a i té ka konpawé yon bagay épi an lòt. Sé menm bagay-la i fè an ka sala.—Mafyou 13:34, 35.

 Lè Témwen Jéhova ka tjenn Dènyé Wipa Senyè-a, sé pa tout moun ki ka manjé pen-an èk bwè diven-an. Anfen, sé byen pé di nou ki ka fè sa. Poutji?

 San Jézi ki té koulé-a établi “yon agwéman nèf.” Agwéman sala wiplasé agwéman-an Jéhova té fè épi nasyon Izwayèl an tan lontan. (Hibrou 8:10-13) Sé moun-nan Jéhova fè agwéman nèf-la épi-a, sé yo ki ka manjé pen-an èk bwè diven-an diwan Mémoriyal-la. Alò, sé pa tout Kwityen ki ka fè sa, mé sé sèlman Kwityen “Bondyé kwiyé” adan an mannyè spésyal. (Hibrou 9:15; Louk 22:20) Sé moun sala kay kondwi épi Jézi Kwi an syèl, èk Bib-la di sé yon san kawaant kat mil (144,000) moun tousèl ki kay wisivwè lonnè sala.—Louk 22:28-30; Wévélasyon 5:9, 10; 14:1, 3.

 Sé moun sala Bondyé kwiyé pou kondwi épi Jézi ka fòmé an ti twipo. Mé, majòwité di nou kay anpami an gwan popilas ki kay viv pou tout tan asou latè. (Louk 12:32; Wévélasyon 7:9, 10) Sé moun-nan ki ni èspwa pou viv asou latè pa ka manjé pen-an ében bwè diven-an diwan Mémoriyal-la. Mé poutji yo ka atandé? Ében yo ka atandé pou moutwé yo apwésyé sakwifis-la Jézi té fè pou tout lézòm.—1 Jan 2:2.