MEDDE KI KIYU PINY!

Mwaka 2022 Opong ki Pekki Mapol—Gin Ango ma Baibul Waco?

TUKI

I mwaka 2022, wabedo ka winyo lok angeya i kom lweny, can lim, ki peko ma poto atura. Baibul keken aye tito tyen lok mumiyo jami magi tye ka timme.

Tyen lok mumiyo jami maraco otimme i mwaka 2022

Jami mutimme i mwaka mukato-ni moko ni watye ka kwo i kare ma Baibul lwongo ni “kare me agikki.” (2 Temceo 3:1) Kare meno ocakke i mwaka 1914. Nen kong jami mogo mutimme cokcok-ki ma rwatte ki gin ma Baibul otito wacon ni bitimme i kare man:

‘Lweny.’—Matayo 24:6.

“Mwaka 2022 Obedo Mwaka ma Lweny Odwogo i Ulaya.” a

Nen pwony ma wiye tye ni “Russia Ooto Lweny i kom Ukraine.”

“Kec bene bipoto i lobo.”—Matayo 24:7.

“I Mwaka 2022, Kec Oneko Dano Mapol Adada.” b

Nen pwony ma wiye tye ni “Lweny ma i Ukraine Tye ka Medo Can Cam i Wi Lobo Ducu.”

“Two gemo.”—Luka 21:11.

“Two mogo calo polio, gwok-i-guda, ki dong two Korona pud tye ka medde ki tero dano marac, dok onyuto ka maleng ni two ma kobo oyotoyot kelo adwogi maraco adada dok wape ki kero me jukone.” c

Nen pwony ma wiye tye ni “Dano Milion 6 Dong Guto Woko ki Two Korona.”

“Gin ma miyo lworo mako dano.”—Luka 21:11.

“Lyeto, two pa piny, mac ma wango bunga madongo, ki aluka. Wiwa bipo i kom mwaka 2022 macalo mwaka ma piny olokke adada ci macalo adwogine obalo jami mapol, oneko dano alip ki alip, dok omiyo dano milion mapol guringo woko ki ka ma peko tye iye.” d

Nen pwony ma wiye tye ni “Lyeto Tye ka Medde Matek i Wi Lobo Ducu.”

“Arubaruba.”—Luka 21:9.

“I mwaka 2022, dano mapol gubedo ka jemo i kom gamente pien can lim tye ka medde dok kero pa cente odok piny.” e

Nen pwony ma wiye tye ni “Medde pa Wel Jami i Wi Lobo Ducu.”

Gin ango ma bitimme i mwaka manyen?

Pe tye ngat mo ma ngeyo jami ma bitimme i mwaka 2023. Ento gin ma wangeyo aye ni cokcok-ki, Ker pa Lubanga, nyo gamente me polo bikelo alokaloka madongo i wi lobo. (Daniel 2:44) Gamente meno bikwanyo jami ma miyo dano deno can dok bineno ni miti pa Lubanga otimme i lobo.—Matayo 6:9, 10.

Wacuko cwinyi ni ilub tam ma Yecu Kricito omiyo kun ‘imedde ki kiyu piny’ me neno kit ma jami ma tye ka timme i lobo cobo kwede lok pa lunebi me Baibul. (Marako 13:37) Kubbe kwedwa me pwonyo kit ma Baibul twero konyi kwede i kare-ni ki kit ma twero miyo boti kacel ki jo me gangi gen pi anyim mamwonya.

a AP News, “2022 Was Year the Horror of War Returned to Europe,” by Jill Lawless, December 8, 2022.

b World Food Programme, “A Global Food Crises.”

c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.

d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.

e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.