Ka mwaka 2023 cakke, wan ducu wageno ni jami mabeco bitimme i kwowa ki pa jo me gangwa. Pingo watwero bedo ki gen?

 Baibul tye ki kwena maber ni pekki ma watye ka kato ki i iye i kare-ni tye pi tutunu dok cokcok-ki bigik woko. Ki lok ada, Baibul ‘gicoyo me pwonyowa, wek wabed ki gen pi lok me cuko cwiny ma wakwano i ginacoya.’—Jo Roma 15:4.

•   Me pwonyo lok mapol madok i kom cikke ma tye i Baibul, kwan pwony ma wiye tye ni “Gen me Ada pi Anyim Maber.”

 Gen ma tye i Baibul twero bedo calo “lajuk me mel.” (Jo Ibru 6:19) Gen meno twero miyo wacung matek. Twero konyowa me ciro pekkiwa i kare-ni, me bedo ki neno mupore, ki dong me nongo yomcwiny ma rii. Me labolle:

•   Nen kit ma gen ma Baibul miyo okonyo kwede laco mo ma onongo tye lamero. Nen vidio ma wiye tye ni Aol Woko ki Kit ma Onongo Akwo Kwede.

•   Nen kit ma gen ma Baibul miyo twero konyowa kwede ka warwenyo ngat mo ma wamaro i to. Nen vidio ma wiye tye ni Miyo Kwecwiny Bot Jo ma Gitye ka Kumu.

 Jo mapol gigeno ni jami mabeco twero timme, ento pe gitwero moko ka ada jami ma gigeno bicobbe. Cikke ma Baibul miyo dok pat. Pingo? Pien cikke ma tye i Baibul oa ki bot Lubanga Jehovah a kikome, “ma pe loko lok goba.” (Tito 1:2) Jehovah keken aye tye ki teko me cobo cikkene ducu; en twero timo ‘gin mo keken ma iye mito.’—Jabuli 135:5, 6.

 Wacuko cwinyi me nongo adwogi maber ki i gen ma Baibul miyo. Itwero jingo genni i kom cikke me Baibul kun ‘ingiyo ginacoya ki diro.’ (Tic pa Lukwena 17:11) Tem yubwa me kwano Baibul ki dano labongo cul mo wek itim meno. Cak mwaka 2023 kun ibedo ki gen pi anyim!