Jo mapol gitamo ni pe tye yo mo me cobo pekki ma dano tye ka kato ki i iye i mwaka 2024. Ento, watwero nongo gen pi anyim maber. Ki kwene?

 Baibul cikke ni Lubanga bicobo pekki ma miyo dano girwenyo gen i kare-ni. Cokcok-ki, Lubanga ‘bijwayo pig wangwa woko ducu. To bene dong bibedo pe, kadi kumo nyo koko, nyo arem.’—Niyabo 21:4.

•   Me nongo ngec matut madok i kom cikke ma tye i Baibul pi anyim maber, kwan pwony ma wiye tye ni “Gen me Ada pi Anyim Maber.”

 Baibul miyo gen pi anyim maber ma twero konyi me lweny ki turcwiny ki dok me bedo ki neno matir. (Jo Roma 15:13) Tam mabeco ma Baibul miyo bene twero konyi me lweny ki pekki ma ikemme kwede i kare-ni, calo can lim, ngolo kop alenga, ki dong two.

•   Nen kit ma gen ma Baibul miyo okonyo kwede laco mo me nongo kuc ki yomcwiny kadi bed en odongo lacan adada. Nen vidio ma wiye tye ni Juan Pablo Zermeño: Jehovah Omiya Kwo ma Tyene Tye.

•   Pwony kit ma Baibul twero konyi kwede ka cwinyi tye ka pidi, cwinyi otur, itye ki par, ki dong ka ngat mo ma imaro oto. Kwan pwony ma wiye tye ni “Tika Atwero Nongo Kwecwiny ki i Baibul?”

•   Nen kit ma lamony mo ma owaco ni con ebedo “ngat ma cwinye col dok pe paro pi jo mukene” onongo kwede gen ki i gin ma en opwonyo ki i Baibul. Nen vidio ma wiye tye ni Aketo Mudukuna Piny .

 Wek mwaka 2024 obed mwaka maber piri ki jo gangwu. Pwony kit ma Baibul twero konyi kwede. Tem yubwa me kwano Baibul labongo cul mo. Pwony kit ma Lubanga twero mini kwede ‘kuc’ i kare-ni ki dong ‘anyim maber kacel ki gen.’—Jeremia 29:11.