“Dano gitye ka timo jami mogo ma twero balo kabedo ma orumowa marac adada. Me labolle, pii aluka bibalo citi mapol kwicikwici. Lyeto pa piny bimedde matek adada. Yamo kot magwar bibalo piny. Can pii bimedde matek adada. Kwai lee ki yadi milion mapol ata birweny woko. Man pe obedo ododo mo ata nyo lok ma kimedo kado iye. Ento meno gin ma cayan waco ni bitimme ka gamente pe oloko cik madok i kom kit ma kitiyo kwede ki jami ma i kabedo ma orumowa.”—Man lok ma António Guterres, ma tye secretary-general me United Nations owaco i April 4, 2022 i ripot pa Dul ma Neno Lok Kom Kabedo ma Orumowa [Intergovernmental Panel on Climate Change].

 “Lucayan gitye ka ciko dano ni ma pe otero mwaki mapol, cokcok bunga 423 ducu [ma tye i lobo Amerika] nongo oballe woko pi alokaloka me piny, tutwalle pi lyeto me piny ma tye ka medde marac adada. Jami maraco ma twero timme cal ki jami maraco ma Baibul oloko i komgi: mac ki pii aluka, leny pa pee, medde pa pii nam ki dong medde pa lyeto piny.”—Magajin me The New York Times, me Juni 15, 2022, ma wi lokke onongo tye ni “Pii Aluka ma Opong i Bunga me Yellowstone, Obedo Lanyut me Pekki ma Bitimme i Anyim.”

 Tika kitwero cobo peko me balle pa kabedo ma orumowa? Ka twere, ci anga ma bicobone? Nen kong gin ma Baibul waco.

 Baibul waco ni Lubanga “binyoto jo a tye a nyoto lobo.” (Niyabo 11:18, Baibul me Leb Lango.) Wang Baibul man pwonyowa jami adek mapatpat:

1.  1. Jami mogo ma dano timogi bibalo lobo.

2.  2. Balle pa lobo bigik.

3.  3. Lubanga, ento pe dano, aye bicobo peko me balle pa kabedo ma orumowa.

 Baibul waco ni ‘lobo bibedo matwal.’ (Latitlok 1:4) Dano bibedo iye kare ducu dok pi naka.

•   “Jo ma kitgi atir gibicamo lobo, dok gibibedo iye matwal.”—Jabuli 37:29.

 Kibiroco lobowa-ni wek obed maber kit ma onongo tye kwede con.

•   “Lobo mutwo kacel ki tim bibedo ki yomcwiny, ature bituru iye calo lenga.”—Icaya 35:1.