MEDDE KI KIYU PINY!

Lweny Kacel ki Alokaloka me Piny Tye ka Kelo Can Cam i Wi Lobo Ducu—Gin Ango ma Baibul Waco?

TUKI

Lweny ma i Ukraine, kacel ki alokaloka me piny tye ka medde ki kelo can cam i twok lobo ducu. Peko man gudo tutwalle lobe mogo ma dano ma iye giyelle ayela me nongo cam muromo.

“Lweny, alokaloka me piny, wel moo ki jami mukene tye ka kelo peko me can cam.”—António Guterres, UN secretary-general, July 17, 2023.
“Lobo Russia dong pe tye i winye maber me ye ni kicwal cam ki i lobo Ukraine. Luryeko gitamo ni man bikelo can cam madit i wi lobo dok wel cam bimedde matek i lobe ma pol pa dano ma iye lucan calo i North Africa ki dong Middle East.”—Atalayar.com, July 23, 2023.

Nen gin ma Baibul waco madok i kom can cam ki dong anyimwa.

Baibul otito wacon ni peko me can cam bibedo tye i kare-ni

Yecu otito wacon ni: “Rok bilweny ki rok wadi, ki ker bene bilweny ki ker wadi, ki kec bene bipoto i lobo.”—Matayo 24:7.
Buk me Niyabo tito pi lungwec ki aguragura angwen. Langwec ki aguragura acel i kingi cung pi lweny. Langwec ma lubo kore-ni cung pi kec, nyo kare ma cam bibedo nok dok welle bibedo tek adada. ‘Cutcut atugi neno aguragura macol; onongo ngat ma ringo kwede omako mijan i cinge. Lacen dok awinyo dwan kun loko ni, “Ngano agwata acel welle tye ciling ma inongo i nge tic pi nino acel olu, ki bel cayiri agwata adek welle tye ciling ma inongo i nge tic pi nino acel bene.”’—Niyabo 6:5, 6.

Lok magi pa lunebi me Baibul madok i kom can cam tye ka cobbe i karewa-ni ma Baibul lwongo ni “kare me agikki.” (2 Temceo 3:1) Me niang matut i kom “kare me agikki” ki dong lungwec ki aguragura angwen ma kiloko i komgi i buk me Niyabo, nen vidio ma wiye tye ni Lobo Olokke Woko Nicakke i Mwaka 1914 dok ikwan pwony ma wiye tye ni “Lungwec ki Aguragura Angwen-ni—Gubedo Angagi?”

Kit ma Baibul twero konyowa kwede

Baibul tye ki tam mabeco ma twero konyowa me lweny ki pekki madongo calo medde pa wel cam nyo can cam. Nen labol mogo i pwony ma wiye tye ni “Kit me Kwo ki Cente Manok.”
Baibul bene miniwa gen ni jami biyubbe bedo maber. Baibul cikke pi kare ma ‘cam bicek mabup i lobo’ dok dano weng bibedo ki cam muromo. (Jabuli 72:16) Me nongo ngec matut i kom gen man pi anyim ki dok pingo itwero genone, kwan pwony ma wiye tye ni “Gen me Ada pi Anyim Maber.”