Ma lubbe ki ripot ma Preciden me World Bank omiyo i Juni 2022, en owaco ni “kero pa cente tye ka dok piny adada. Wel jami tye ka medde matek, dok dano tye ki cente manok me wilo jami magi.”

 Dul me International Monetary Fund owaco ni “wel moo ki cam omedde matek adada, dok man tutwalle tye ka gudo lobe ma pol pa jo ma iye lucan.”

 Baibul konyowa me niang pingo watye ka kato ki i peko me can lim ma kit meno, kit me lweny ki pekki magi, ki dong kit ma kibigiko kwede pekki magi matwal.

•   Baibul waco ni watye ka kwo “i kare me agikki.”—2 Temceo 3:1.

•   Yecu owaco ni “gin ma miyo lworo” bitimme i kare man. (Luka 21:11) Medde pa wel jami weko dano gibedo ki lworo. Dano gibedo ki par pi anyim ki dong kit ma gibinongo kwede jami me gwoko jo ganggi.

•   Buk me Niyabo otito con pi medde pa wel jami i kare me agikki. ‘Awinyo dwan mo ma owacci: “Ngano agwata acel welle ciling abic, cayiri agwata adek welle ciling abic.”’—Niyabo 6:6.

 Me nongo ngec mapol madok i kom “kare me agikki” ki dong lok pa lunebi ma tye i buk me Niyabo, nen vidio ma wiye tye ni Lobo Olokke Woko Nicakke i Mwaka 1914, dok ikwan pwony ma wiye tye ni “Lungwec ki Aguragura Angwen-ni—Gubedo Angagi?”

•   “Dano gibigero odi ci gibedo i igi, gibipuro poto olokgi, ci gibicamo nyige bene. Pe gibigero odigi ci giweko ngat mukene aye bedo iye, pe gibipuro poto olokgi ci giweko ngat mukene aye ma camo nyige.”—Icaya 65:21, 22.

•   “Cam bene myero ocek mabup i lobone, opong wa wi godi-gu woko ducu.”—Jabuli 72:16.

•   ‘“Ento kombeddi abibino,” Rwot ma owaco, “pien dong giyako jami pa lucan woko, dok jo ma piny obwoyogi gitye ka cur acura. Abigwokogi kit ma gimito-ni.”’—Jabuli 12:5.

 Cokcok-ki Lubanga bigiko can lim woko, pe ki i lobo acel keken, ento i wi lobo ducu. Me niang kit ma meno bitimme kwede, kwan pwony ma wiye tye ni “Tika Twere pi Dano Ducu me Bedo Labongo Can Lim?”

 Kadi wa i kare-ni, Baibul twero konyi i kare ma wel jami tye ka medde matek adada. Man twere nining? Baibul tye ki tam ma konyowa me tic ki cente i yo maber. (Carolok 23:4, 5; Latitlok 7:12) Me nongo ngec mapol, kwan pwony ma wiye tye ni “Gwok Jamini ma Mitte pi Kwo,” ki dong “Kit me Kwo ki Jami Manok.”