I mwaka 2024, kibibolo kwir tyen mapol loyo mwaka mo keken mukato angec. Ento, jo mapol gitye ka rwenyo gen i kom lucungo wibye.

•   Jo mapol ma kipenyogi i lobo Amerika guwaco ni “pol pa lucungo wibye gitimo jami pi cwiny me woro” ento pe ni pien gimito konyo dano. a—Pew Research Center, Sektemba 19, 2023.

 Jo matino mapol bene pe gigeno lucungo wibye.

•   “Bulu pol kare giketo tamgi i kom cobo pekki ma gitye ka wok ki iye, ento i kwed mo ma kitimo, kinongo ni bulu gitamo ni lucungo wibye pe gitye ka cobo pekogi.”—The New York Times, Januari 29, 2024.

•   “I kwed mo ma kitimo, kinongo ni jo matino gigeno jo ma gineno i YouTube makato wa lucungo wibye.”—The Korea Times, Januari 22, 2024.

 Tika watwero geno lucungo wibye pi anyim maber? Anga ma genne?

 Ber ka dano gigwokke ki geno ngat mo keken. Baibul waco ni “dano ma laming ye jami ducu ayeya, ento ngat maryek kong ngiyo ka kwene ma en ecito iye.”—Carolok 14:15.

•   Pi kony me moko ka ce ngec moni tye kakare nyo obedo goba, kwan pwony ma wiye tye ni “Gwokke ki Ngec ma Pe Tye Kakare.”

 Medo i kom meno, kadi wa lacungo wibye ma genne dok tye ki cwiny maber loyo pe tye ki kero me timo jami weng ma en mito. Meno aye gin mumiyo Baibul cikowa ni:

•   “Pe ibed ka geno rwodi, pe igen dano adana mamwa ma pe romo konyi-ni.”—Jabuli 146:3.

 Baibul waco ni Lubanga ocimo latela mo ma genne adada. Latela meno aye Yecu Kricito. (Luka 1:32, 33) Yecu aye Kabaka me Ker pa Lubanga, gamente ma loyo ki i polo.—Matayo 6:10.

•   Pwony gin mumiyo itwero geno Yecu ki gin ma en bitimo me cobo pekki ma watye ka kato ki iye. Kwan pwony ma wiye tye ni “Anga ma Obedo Kabaka me Ker pa Lubanga?” ki “Ngo ma Ker pa Lubanga Bitimone?”