I twok lobo lung, lok me wibye kelo apokapoka i kin dano mapol. Ma lubbe ki kwed mo ma kitimo i mwaka 2022, “dano ma romo pacen 65 ma gia ki i lobe 19 guwacci adegadega tye matek i kin jo ma gicwako pati me wibye mapat pat.”

 Tika dong ineno ni lok me wibye tye ka kelo apokapoka madit i kin dano me kabedowu? Pingo tye kumeno? Tika tye yo mo me cobo peko meno? Nen kong gin ma Baibul waco.

 Baibul otito ni i karewa-ni, ma kilwongo ni “kare me agikki,” dano mapol gibibedo ki kit maraco ma pe kelo ribbe i kingi.

•   ‘I kare me agikki, piny bibedo marac i kare mogo. Dano bibedo ka maro komgi kengi, dok pe gibiwinye.’—2 Temceo 3:1-3.

 Kadi bed dano mapol gitiyo matek wek gamente ocob ticce maber, ento adwogi mo maber pe. Dano ma gitye ki tam mapat pat, ginongo ni tek nyo ni pe twere me tic kacel me cobo peko. Man moko gin ma Baibul owaco mwaki mapol angec.

•   “Dano ma tye ki twero loyo jo mukene ki tek.”—Latitlok 8:9.

 Kadi bed kumeno, Baibul nyuto gin ma twero cobo peko meno—gamente ma lalocce twero cobo pekki ducu ma weko dano deno can.

 Baibul tito pi laloc ma oporre me cobo pekki magi: Yecu Kricito. Yecu tye ki teko, twero, ki dong miti me kelo ribbe ki kuc i kin dano ducu.

•   ‘Kit ma atir bimedde ameda i kare me locce, dok kuc bene bibedo i lobone nakanaka.’—Jabuli 72:7.

•   “Rok ducu myero guti bote!”—Jabuli 72:11.

 Yecu obedo laloc maber loyo pien en paro pi dano dok mito konyogi, tutwalle jo ma kiterogi marac.

•   “En laro dano ma piny obwoyo ka okok bote, konyo lucan ki jo ma pe gitye ki ngat ma konyogi. Kica make i kom jo magoro ki ma piny obwoyogi, ci laro kwo pa jo ma piny oloyo. En kokogi ki i tim bwami ki i un ma gibedo ka unogi kwede; kwogi pire tek bote ma pe wacce.”—Jabuli 72:12-14.

 Pwony lok mapol madok i kom Ker pa Lubanga, gamente me polo ma Yecu aye latelane. Pwony kit ma itwero nongo kwede adwogi maber ki i locce ki kit ma itwero cwakone kwede.

•   Nen vidio ma wiye tye ni Ker pa Lubanga Obedo Gin Ango?

•   Kwan pwony ma wiye tye ni “Ker pa Lubanga—Gamente ma Camucana Pe Iye.”