Pi mwaki 30 mukato angec, jo mapol onongo gitamo ni wat tye ka yubbe i kin lobe mapat pat. Ento, jami mutimme ma cokcok-ki tye ka loko tam meno.

•   “Lobo Icrael, ki Hezbollah gitye ka gwenyo mac i kingi i wang boda me lobo Lebanon. Lworo tye ni lweny ma tye ka timme i Gaza binya i kabedo mukene.”—Reuters, Januari 6, 2024.

•   “Adwii mogo ma lobo Iran cwakogi tye ka otto lweny i kabedo mapat pat, dok lobo Iran tye ka medde ki yubo bom me nuclear. Medo i kom meno, lobo Russia ki China dong gipoko pyer ngwen. Jami magi ducu tye ka keto lyeto magwar i kom lobe ma tye tung Kupoto Ceng.”—The New York Times, Januari 7, 2024.

•   “Russia tye ka medde ki bolo aranyi i kabedo mapol i lobo Ukraine.”—UN News, Januari 11, 2024.

•   “Lonyo pa lobo China ki kerone me lweny tye ka medde ameda. Ki tungcel, awaka pa lobo Taiwan bene tye ka medde. Wat i kin lobo China ki lobo Amerika tye ka balle abala. Jami magi weng weko kare bedo kere pi lweny me cakke magwar.”—The Japan Times, Januari 9, 2024.

 Tika Baibul waco gin mo i kom kukukuku i kin lobo mapol ma watye ka nenone i kare-ni? Tika bio wa i lweny ma kwako wi lobo ducu?

 Baibul pe otito pi lweny mo acel keken ma tye ka timme i kare-ni. Ento otito pi lweny mapol ma tye ka timme i kare man ma “kwanyo kuc woko ki i wi lobo.”—Niyabo 6:4.

 Buk pa Daniel otito ni “i kare me agikki,” oteka mogo me lobo-ni ‘gibiyoko wigi,’ kun gipyem me nyuto twerogi. Baibul otito ni lobe magi bipyem kun ginyuto tekogi madit me lweny dok gibitic ki “lwak lonyo” madwong.—Daniel 11:40, 42, 43.

 Baibul nyuto ni kwo i lobo man bidoko rac medde ameda ma peya olokke odoko maber. Yecu otito ni ‘twon can madit atika bitimme, ma yam peya onen i lobo, nia wa i acakki lobo.’ (Matayo 24:21) “Twon can madit atika” meno bio wa i lweny me Armagedon, ma kilwongo ni “mony i nino madit pa Lubanga Won Twer Ducu.”—Niyabo 16:14, 16.

 Lweny me Armagedon bilaro dano, ento pe bityekogi. Lubanga bitic ki lweny meno me giko loc pa dano, ma okelo lweny maraco adada. Me niang kit ma Armagedon bikelo kwede kuc marii nakanaka, kwan pwony magi:

•   “Lweny me Armagedon Obedo Ngo?”

•   “Armagedon Obedo Kwena Maber!”