Anga ma Obedo Mikael Lamalaika Madit?

PE KILOKO tyen mapol i kom cwec ma obedo cwiny ma kilwongo ni Mikael-li i Baibul. Ento ka kitye ka lok i kome, nongo en tye ka timo tic mo. I buk pa Daniel, Mikael onongo tye ka lweny ki lumalaika maraco; ki i waraga pa Juda, en onongo tye ka lweny ki Catan; ka dong i Niyabo, en obedo ka lwenyo i kom Larac ki lumalaikane. Pi cwako loc pa Jehovah ki lweny i kom lumone pa Lubanga, Mikael kwo i yo ma pore ki tyen lok me nyinge ma gonye ni​—“Anga ma Cal ki Lubanga?” Ento Mikael mono obedo anga?

Kare mukene, jo mogo gingeyogi ki nying ma kato acel. Me lapore, Yakobo ma obedo lawi ot bene onongo kilwonge ni Icrael, ki lakwena Petero bene onongo ngene ki nying ni Cimon. (Acakki 49:1, 2; Matayo 10:2) Kit meno bene, Baibul nyuto ni Mikael obedo nying mukene ma kilwongo kwede Yecu Kricito, i kare ma en onongo peya okwo i lobo ki dok i nge dokke i polo. Wek kong wanenu tyen lok me Ginacoya ma kelowa i moko tam man.

Lamalaika madit. Lok pa Lubanga lwongo Mikael ni “lamalaika madit.” (Juda 9) Man te lokke ni “lawi lumalaika.” Niang maber ni kilwongo Mikael ni lamalaika madit. Man nyuto ni lamalaika ma kit man tye en acel-li keken. Ki lok ada, kitiyo ki lok man ni “lamalaika madit” i kom ngat acel keken i Baibul, ento pe calo jo mapol ni “lumalaika madito.” Medo i kom meno, kikubo Yecu ki tic pa lamalaika madit. 1 Jo Tecalonika 4:16 oloko i kom Rwot Yecu Kricito ma dong kicero woko ni: “Rwot kikome  bilor piny kun a ki i polo ki lwongo me twer, ma dwan lamalaika maditte biwinnye.” Dong kitito kany ni dwan Yecu obedo dwan lamalaika madit. Pi meno ginacoya man nyuto ni Yecu kikome en aye obedo Mikael lamalaika madit.

Ladit wi Mony. Baibul waco ni ‘Mikael kacel ki lumalaikane gulwenyo i kom min kulu madit-ti . . . ki lumalaikane.’ (Niyabo 12:7) Man nyuto ni Mikael obedo Ladit wi mony pa lumalaika ma lugen. Niyabo bene oloko i kom Yecu macalo Ladit wi mony pa lumalaika ma lugen. (Niyabo 19:14-16) Dok lakwena Paulo olwongo atir ni, “Rwot Yecu,” NW, ki “Lumalaikane matek.” (2 Jo Tecalonika 1:7; Matayo 16:27; 24:31; 1 Petero 3:22) Pi meno Baibul loko i kom Mikael ki “lumalaikane” ki Yecu ki “lumalaikane.” (Matayo 13:41) Kit ma Lok pa Lubanga pe nyuto ni tye dul mony aryo pa lumalaika ma lugen i polo​—nyo ni acel Mikael aye telo wigi ki acel Yecu aye telo wigi, miyo nen dong kene ni Mikael aye Yecu Kricito ma nongo tye ka timo ticce ki i polo. *

[Lok ma tye piny]