Dul me Apar

Cwec ma Gubedo Cwiny​—Kit ma Gigudo Kwede Kwowa

Lumalaika mono gikonyo dano?

Yo ango ma cwiny mogo maraco gudwoyo kwede tam pa dano?

Omyero mono walwor cwiny maraco magi?

1. Pingo omyero wabed ki ngec i kom lumalaika?

ME NGEYO dano moni maber, omyero kong inge lok mo i kom jami ma tye i pacone. I yo acel-li, ngeyo Lubanga Jehovah bene kwako bedo ki ngec matir i kom lumalaikane ma gubedo calo jo me ode me polo. Baibul lwongo lumalaika ni “awobe pa Lubanga.” (Yubu 38:7) Dong gin ticgi ngo i yub pa Lubanga? Tika dong gutimo gin mo i tekwaro pa dano? Tic pa lumalaika magi mono gudo wa kwoni bene? Ka kumeno, ci i yo ango?

2. Lumalaika gua ki kwene, dok welgi tye adi?

² Baibul oloko pi lumalaika tyen makato mia acel. Kong wanenu jami manok nok i kom lok man wek okonywa me ngeyo lok i kom lumalaika. Lumalaika gua ki kwene? Jo Kolocai 1:16 waco ni: “Pien i en [Yecu Kricito] Lubanga ocweyo jami ducu, gin ma tye i polo ki gin ma tye i wi lobo.” Man nyuto ni Lubanga Jehovah ocweyo ginacweya ducu ma gubedo cwiny ma gilwongogi ni malaika, kun tiyo ki Wode me kayo. Lumalaika mono gitye gin adi? Baibul waco ni kicweyo Lumalaika milion mapol ata, dok gin ducu gitego.​—Jabuli 103:20. *

3. Yubu 38:4-7 tito botwa lok ango ma dok i kom lumalaika?

 ³ Baibul ma obedo Lok pa Lubanga tito ni i kare ma pud giketo te guti me lobo aketa, “awobe pa Lubanga ducu gidange ki yomcwiny.” (Yubu 38:4-7) Pi meno, lumalaika gubedo tye wa con ma onongo peya kicweyo dano, kadi wa lobo bene. Wang Baibul man nyuto ni lumalaika bene giwinyo jami i cwinygi, pien waco ni ‘gudange kacel ki yomcwiny madit.’ Niang kong ni ‘awobe pa Lubanga ducu’ gubedo kacel ki yomcwiny. I kare meno onongo lumalaika ducu guribbe kacel i tic pa Lubanga Jehovah.

KONY KI GWOK PA MALAIKA

4. I yo ango ma Baibul nyuto kwede ni lumalaika ma lugen gitye ki miti i tic pa dano?

⁴ Cakke ma gunen kwede cweyo dano me acel, cwec ma gubedo cwiny ma lugen magi gucako bedo ki miti i kom dano kacel ki cobbe pa yub pa Lubanga. (Carolok 8:30, 31; 1 Petero 1:11, 12) Kit ma kare obedo ka wot kwede anyim, pol pa lumalaika gucako neno kit ma pol pa dano guweko kwede Lacwecgi me amara. Labongo akalakala, lok man ocwero cwiny lumalaika ma lugen. Kitungcel, ka ce dano acel mo odok bot Jehovah, ‘bedo me yomcwiny i nyim lumalaika.’ (Luka 15:10) Kit ma lumalaika giparo matek tutwal pi ber bedo pa jo ma gitiyo bot Lubanga-ni, pe bedo gin me aura ni Jehovah otiyo ki lumalaika tyen mapol me gwoko ki jingo cwiny luticce ma lugen i lobo kany. (Jo Ibru 1:7,14) Kong dong wanenu lanen mogo.

5. Lanen ango me kony ma a ki bot lumalaika ma nonge i Baibul?

⁵ Lumalaika aryo mogo gukonyo laco ma kite atir Lot ki anyirane me loyo ki i jwero boma maraco me Codom ki Gomora, gupeyogi ki cinggi me a woko ki i kabedo meno. (Acakki 19:15, 16) I nge cencwari mapol, kibolo lanebi Daniel i boro pa labwor, ento en oloyo ki i doggi  ci owaco ni: “Lubangana ocwalo lamalaika otweyo dog lwak labwor magi woko.” (Daniel 6:22) I cencwari me acel K.M., lamalaika mo ogonyo lakwena Petero ki i ot buc. (Tic pa Lukwena 12:6-11) Medi i kom meno, lumalaika gukonyo Yecu i acakki me ticce me pwony i lobo. (Marako 1:13) Ma dong Yecu cok ki to, lamalaika acel obino bot Yecu ‘kun miye teko.’ (Luka 22:43) Meno pud dong obedo me kwe cwiny bot Yecu i kare meno ma onongo pire tek i kwone-ni ya!

6. (a) Lumalaika gigwoko jo pa Lubanga nining? (b) Wabineno lapeny ango?

⁶ I kare-ni lumalaika dong pe ginen bot jo pa Lubanga i lobo. Ento lumalaika pa Lubanga pud gigwoko jone, tutwalle ki i gin mo ma twero wanogi i yo me cwiny kadi bed ni pe ginen bot dano. Baibul wacci: “Lamalaika pa Rwot cung kun gwoko jo ma gilworo Rwot, dok larogi bene woko ki i can.” (Jabuli 34:7) Pingo omyero lok magi gubed me kwe cwiny botwa tutwal? Pien tye cwiny mogo maraco ma gimito nekowa woko! Gin gubedo angagi? Gua ki kwene? Gitye ka temme me wanowa nining? Kong wanenu gin ma otimme i tekwaro pa dano ka wek wanong lagam me lapeny magi.

CWEC MA GUBEDO CWINY MA GITYE LUMONEWA

7. Catan oloko dano ki i kom Lubanga ma rom mene?

⁷ Kit ma wakwano kwede i Dul me 3 me buk man, lamalaika mo acel ocako bedo ki miti me loyo jo mukene ci omiyo en ojemo i kom Lubanga. I yo ngeye, kicako lwongo lamalaika man ni Catan Larac. (Niyabo 12:9) I nge mwaki ma romo 1600 cakke ma Catan obwol kwede Kawa, en onongo dong oloko dano cok cok ducu ki bot Lubanga, nikwanyo jo manok ma lugen calo Abel, Enoka, ki Nua.​—Jo Ibru 11:4, 5, 7.

8. (a) Lumalaika mukene gucako doko jogi nining? (b) Jogi gutimo ngo wek gibwot ki i Pii Aluka me kare pa Nua-ni?

 ⁸ I kare pa Nua, lumalaika mukene bene gujemo i kom Jehovah. Guweko kabedogi ki Lubanga i polo, gubino i lobo kany ci gulokke guruko kom calo pa dano. Pingo? Wakwano i Acakki 6:2 ni: “Ka awobe pa Lubanga guneno anyira pa dano beco, gucako yero me anyoma ki i kingi.” Ento Lubanga Jehovah pe oweko tic pa lumalaika kacel ki balle pa kit dano macalo adwogine, me medde anyim. En ocoro pii aluka i wi lobo ka omolo jo maraco ducu ento ogwoko luticce ma lugen keken. (Acakki 7:17, 23) Man omiyo lumalaika ma  lujemo-ni nyo jogi, gubedo i lyeto me weko komgi macalo dano-ni wek gidok cen i polo macalo cwec ma gubedo cwiny. Gin gucako miyo cwakgi tung bot Larac, ma odoko “ladit pa cen.”​—Matayo 9:34.

9. (a) Ngo ma otimme i kom jogi i kare ma gudok i polo? (b) Wabineno lok ango i kom jogi?

⁹ I kare ma lumalaika ma pe gubedo luwiny gudok i polo, kiryemogi woko kit macalo kiryemo kwede laditgi Catan. (2 Petero 2:4) Kadi bed ni pe dong giromo ruko kom pa dano, gin pud gitye ka dwoyo tam pa dano i yo marac tutwal. Ki lok ada, Catan tye ka tic ki jogi magi me ‘bwolo dano ma i wi lobo ducu.’ (Niyabo 12:9; 1 Jon 5:19) I yo ango? Jogi gitiyo ki yo mogo me diro me bwolo dano. (2 Jo Korint 2:11) Wek kong wanenu yo magi.

YO MA JOGI GIBWOLO KWEDE DANO

10. Tim tyet obedo gin ango?

¹⁰ Jogi tiyo ki tim tyet me bwolo dano. Tic me tim tyet obedo tic me kubbe ki jogi, kadi ka ngat moni okube kwedgi atir nyo ocito bot ajwaka. Baibul kwero tim tyet dok cikowa me gwokke ki i jami mo keken ma kubbe kwede. (Jo Galatia 5:19-21) Tim tyet konyo jogi kit macalo obwo konyo kwede lumak rec. Lamak rec tiyo ki obwo mapat pat me mako wit rec mapat pat. Kit meno bene, cwiny mogo maraco-ni gitiyo ki wit tim tyet mapat pat me dwoyo tam pa dano i komgi.

11. Tyeto gin ma tye anyim obedo ngo, dok pingo omyero wagwokke ki iye?

¹¹ Obwo acel ma jogi gitiyo kwede aye obedo tyeto gin ma tye anyim. Man mono obedo gin ango? Man en aye obedo temme me ngeyo gin ma tye i anyim nyo gin ma pe kingeyo. Man kwako tyeto gin ma tye anyim kun nongo kitiyo ki lakalatwe, tyeto tyet ki karata, ngiyo i cing, lek, ki mukene mapol. Kadi bed dano mapol gitamo  ni tyeto gin ma tye anyim pe rac, ento Baibul nyuto ni jo ma gityeto jami ma tye anyim gitiyo ki jogi. Me laporre, Tic pa Lukwena 16:16-18 loko pi nyako mo ma onongo ‘tyeto lok ma tye anyim’ kun tiyo ki kony pa “jok.” Ento en pe dong obedo ki teko man i kare ma kiryemo jok meno woko ki i kome.

12. Pingo obedo gin marac tutwal me temo lok ki jo muto?

¹² Yo mukene ma jogi bwolo kwede dano en aye obedo cuko cwinygi me penyo dog jo muto. Pol kare kibwolo jo ma nongo gitye ka kumo pi dano me amaragi muto ki tam mogo ma pe tye atir i kom jo muto. Ajwaka oromo miyo ngec mo ma kite dok pat nyo lok ki dwan ma cal ki ngat ma oto-ni. Adwogine weko jo mapol giye ni jo muto kara gitye kwo dok ni lok kwedgi olo kong konyo me kweyo cwiny jo makwo. Ento kit “kwe cwiny” macalo meno obedo goba keken dok rac adada. Pingo? Pien jogi aye giporo dwan ngat muto-ni ka gitiyo kwede me miyo ngec i kom ngat muto-ni bot ajwaka. (1 Camuel 28:3-19) Medo i kom meno, jo muto  dong pe gitye ka kwo i kabedo mo kit ma wapwonyo kwede i Dul me 6. (Jabuli 115:17) Pi meno jogi aye nongo gibwolo “lapeny dog tipo pa lato” dok nongo en tye ka timo gin ma pe rwatte ki miti pa Lubanga. (Nwoyo Cik 18:10, 11; Icaya 8:19) Pi meno omyero ikwer obwo man marac ma jogi tiyo kwede-ni.

13. Gin ango ma jo ma onongo gilworo jogi gutimo?

¹³ Cwiny maraco pe gibwolo dano abwola keken ento giminigi lworo bene. I kare-ni, Catan ki jogine gingeyo ni ‘kare odong manok’ me juko ticgi woko, ci oweko gudoko rac loyo kit macon. (Niyabo 12:12, 17) Kadi bed kit meno, dano alip mapol ata ma onongo gubedo ka lworo cwiny maraco magi dong guweko lworo ma kumeno woko. Gin gucako timo man nining? Ngat moni twero timo ngo kadi bed ni onongo dong en tye ka timo tim tyet?

KIT ME JEMO I KOM CWINY MOGO MARACO

14. Wan watwero weko tim tyet kit macalo Lukricitayo me cencwari me acel ma onongo gibedo i Epeco gutimo nining?

¹⁴ Baibul tittiwa kit me jemo kacel ki kit me juko wat ma tye i kinwa ki cwiny maraco. Nen kong lanen pa Lukricitayo me cencwari me acel ma onongo gibedo i boma me Epeco. Jo mukene i kingi kong gubedo ka timo tim tyet ma peya gudoko Lukricitayo. Gin gutimo ngo i kare ma gumoko tamgi me weko tim tyet? Baibul waco ni: “Jo ma yam lujogi gukelo buk tyetgi guguro kacel guwangogi woko i nyim lwak ducu.” (Tic pa Lukwena 19:19) Lukricitayo magi ma onongo pud ginyen-ni gumiyo lanen maber bot jo ma gimito weko tim tyet i kare-ni ki wango bukke me tim tyetgi. Jo ma gimito tic bot Jehovah omyero gubwot tic ki jami mo keken me tim tyet. Man kwako jami macalo bukke, magajin, cinema, karatac mogo ma gimwono i nyim duka nyo i dog yo nyo wer mogo ma ywayo tam pa dano i  tim tyet. Man coko wa yat nyo ginaruka mogo ma giruko ni me gwoko kom.​—1 Jo Korint 10:21.

15. Omyero watim ngo ka wamito jemo i kom jogi?

¹⁵ Ka mwaki mogo okato i nge kare ma Lukricitayo me Epeco guwango bukkegi me tim tyet, lakwena Paulo ocoyo botgi ni: ‘Walwenyo i kom dul mony mogo maraco me cwiny.’ (Jo Epeco 6:12) Jogi meno onongo pud peya guilo cingi. Onongo pud gimito ni gilo lweny-nyi. Onongo mitte ni Lukricitayo-ni dong gutim ngo? Paulo ocoyo ni: “Makato ducu, niye aye omyero obed kwotwu ma bimiyo wutwero neko mac ki i kom atero ma [Catan] bayo.” (Jo Epeco 6:16) Ka ce niyewa tye matek ci wabibedo ki teko madwong me jemo i kom cwiny maraco.​—Matayo 17:20.

16. Watwero jingo niyewa nining?

¹⁶ I yo ango kono dong ma watwero jingo kwede niyewa? Watwero timo man ki kwano Baibul. Teko me kor ot a ki i te gutine. Kit meno bene, wabedo ki niye matek pien teko pa niyewa cung i kom teko me te gutine ma en aye ngec matir ma a ki i Baibul, ma obedo Lok pa Lubanga. Ka wakwano Baibul kun wangiyo iye nino ki nino, ci niyewa bibedo matek. Macalo kor ot matek, niye ma kit meno bigwokowa ki i tic ma jogi timo me dwoyo tamwa.​—1 Jon 5:5.

17. Gin ango ma mitte tutwal me loyo lweny i kom cwiny maraco?

¹⁷ Yo ango mukene ma omyero onongo Lukricitayo me Epeco-ni gukwany? Onongo mitte ni omyero gunong teko mukene me gwokke pien boma ma gibedo iye ni onongo opong ki tic pa jogi. Ci omiyo Paulo owaco botgi ni: “Wuleg kare ducu i [c]winy ki lega me bako dog.” (Jo Epeco 6:18) Kit ma wan bene i kare-ni wakwo i lobo ma opong ki tic pa jogi-ni, ber wamak lego Jehovah matek pien wamito gwok ma a ki bote me jemo i kom cwiny maraco. Dok ngene kene ni omyero walwong nying Jehovah i legawa. (Carolok 18:10) Pi  meno, omyero wabed ka lego Lubanga wek ‘olarwa ki bot larac,’ Catan Larac. (Matayo 6:13) Jehovah bijolo lega ma kit man.​—Jabuli 145:19.

18, 19. (a) Pingo watwero bedo ki gen me loyo lweny i kom cwiny maraco? (b) Lapeny ango ma kibigamo i dul ma lubo man?

¹⁸ Cwiny maraco gubedo gin marac mada, ento pe omyero walworgi ka ce wakwero Larac kun wanyiko cok ki Lubanga ki timo Mitine. (Yakobo 4:7, 8) Teko pa cwiny maraco nok. Kimiyo botgi pwod i kare pa Nua, dok i anyim kibingolo kop i komgi. (Juda 6) Wi opo bene ni lumalaika matego pa Jehovah gitye ka gwokowa. (2 Luker 6:15-17) Cwiny lumalaika magi bedo yom me neno ni waloyo lweny ki cwiny maraco. Waromo wacci lumalaika ma kitgi atir man gitye ka cuko cwinywa. Pi meno omyero wabed cok ki Jehovah wa ki jo me ode ma gubedo cwec me cwiny ma lugen. Omyero wagwokke ki i tim tyet i yo mo keken kun waketo tira ma a ki i Lok pa Lubanga i tic kare ducu. (1 Petero 5:6, 7; 2 Petero 2:9) Ka watimo meno ci wabibedo ki gen me loyo lweny i kom cwiny maraco.

¹⁹ Ento pingo Lubanga oweko kare ki cwiny maraco me timo ticgi ma dong okelo can bot dano malit tutwal-li? Lapeny man kibigamo i dul ma lubo man.

[Lok ma tye piny]

GIN MA BAIBUL PWONYO

▪ Lumalaika ma lugen gikonyo jo ma tiyo bot Jehovah.​—Jo Ibru 1:7, 14.

▪ Catan ki jogine gitye ka bwolo dano me lokogi woko ki bot Lubanga.​—Niyabo 12:9.

▪ Ka ce itimo miti pa Lubanga kun ikwero Catan Larac, ci en biringo woko ki boti.​—Yakobo 4:7, 8.

[Peny me Kwan]

 [Bok/Cal ma tye i pot karatac 102]

KIT ME JEMO I KOM CWINY MARACO

▪ Bwot tic ki jami mo keken me tim tyet

▪ Kwan Baibul

▪ Leg bot Lubanga

[Cal ma tye i pot karatac 99]

‘Lubangana ocwalo lamalaika otweyo dog labwor magi woko.’​—Daniel 6:22

[Cal ma tye i pot karatac 101]

Jogi gitiyo ki yo mapol ata me bwolo dano