Kit me Ngeyo “Babilon Madit”

BUK me Niyabo tye ki lok mogo ma omyero pe kiniang iye kit ma nongo tye kwede-ni. (Niyabo 1:1) Me lapore, buk man loko pi dako mo ma kicoyo nying i tur nyime ni “Babilon Madit.” Kitito ni dako man tye ka bedo i wi “dano ma i wi lobo, ki lwak rok ducu.” (Niyabo 17:1, 5, 15) Babilon Madit-ti omyero obed lanyut mo kit macalo dako mo ma dano adana pe twero timo gin macalo man. Dong en obedo lanyut ma cung pi gin ango?

I Niyabo 17:18, en dako acel-li gitito ni obedo “gang madit ma tye ka loyo luker ducu me wi lobo.” Lok man  ni obedo ‘gang-ngi,’ nyuto ni obedo dul mo pa dano. Kit macalo “gang madit” man tye ka loyo ‘luker ducu me wi lobo-ni,’ dako ma nyinge Babilon Madit-ti myero obed dul mo ma loyo tam pa dano ma i wi lobo kulu. Kitwero lwongone ni twon ker malac me wi lobo. Twon ker malac ango? Twon ker malac me dini. Nen kong kit ma tyeng mukene ma girwatte ki man i buk pa Niyabo miyo wamoko lok man.

Twon ker malac mo twero bedo me wibye, cato wil, nyo me dini. Dako ma nyinge Babilon Madit-ti pe obedo twon ker malac me wibye, pien Lok pa Lubanga waco ni “luker me wi lobo,” nyo luloc me wibye me lobo-ni, “gutimo kwede abor.” Timo abor-ne cung pi wat macok ma tye i kingi ki luker me lobo-ni dok en aye oweko gilwonge ni “lakwele marac.”​—Niyabo 17:1, 2; Yakobo 4:4.

Babilon Madit pe twero bedo twon ker malac me cato wil pien “lucat-wil ma i wi lobo,” ma gicung pi dul me cato wil gibikok matek pire i kare ma kibijwere iye. Ada kiwacci luker kacel ki lucat-wil gibibedo ka neno en Babilon Madit ki “ka mabor.” (Niyabo 18:3, 9, 10, 15-17) Pi meno twero bedo atir ka kiwaco ni Babilon Madit-ti pe obedo twon ker malac me wibye, nyo me cato wil, ento obedo twon ker malac me dul dini aye.

Gin mukene ma nyuto ni Babilon Madit-ti obedo dini onen i lok ma waco ni en obwolo jo me rok ducu ki “tim jokjok” ma en obedo ka timone. (Niyabo 18:23) Kit ma tim tyet ducu a kit bot jogi-ni, pe bedo gin me ur ka Baibul lwongo Babilon Madit ni “kabedo pa jogi.” (Niyabo 18:2; Nwoyo Cik 18:10-12) Twon ker malac man bene kiwacci tye ki adage i kom dini me ada, kun uno “lutit lok pa Lubanga” ki “jo maleng.” (Niyabo 18:24) Adada, Babilon Madit tye ki adegadega madit i kom dini me ada ma oweko en uno dok neko “lucaden pa Yecu.” (Niyabo 17:6) Pi meno, nen atir ka maleng ni dako ma nyinge Babilon Madit-ti cung pi twon ker malac me dini goba me wi lobo-ni, ma ocoko dini ducu ma gikwero Lubanga Jehovah.