Omyero Mono Wakwer Nino Madongo?
Omyero Mono Wakwer Nino Madongo?
NINO madongo muywek me dini ki me lobo ma kikwero i lobo mapol i kare-ni pe gua ki i Baibul. Dong, nino madongo magi kono gua ki kwene? Ka iromo yenyo ngec ki ka ma kigwoko iye bukke akwana mapol mapat pat, ci ibimoko lok ada ma bukke man gitito i kom nino madongo ma gingene tutwal i kabedo ni. Nen kong lapor mogo manok.
Easter. Buk me The Encyclopædia Britannica waco ni: “Pe tye ka mo i Cik Manyen ma nyuto kwero Easter.” Easter kono ocakke nining? Lwite oa ki woro pa lukampiri. Kadi bed kiwaco ni nino madit-ti obedo nino me kwero cer pa Yecu, ento yo me kwer me Easter pe obedo pa Lukricitayo. Me laporre, kop i kom “Apwoyo me Easter,” buk me The Catholic Encyclopedia waco ni: “Apwoyo obedo lanyut pa lukampiri ma cung pi teko me nywal.”
Kwer me Kato Mwaka. Nino dwe ki kwer me Kato Mwaka pe rom i lobbe ducu. Buk me The World Book Encyclopedia waco ni: “Laloc mo me Roma ma kilwongo ni Julio Cecar oketo nino dwe acel me Dwe me 1 calo Nino me Mwaka Manyen i mwaka 46 K.M.P. Jo Roma gudyero nino man ki Janus ma obedo lubanga me dog cel, dogola, ki acakki. Dwe ma kombeddi muno lwongo ni Janwari-ni oa ki i nying Janus, ma onongo tye ki tur nyime ariyo—acel neno tung anyim acel neno tung ngeye.” Pi meno kwer me kato Mwaka Manyen obedo kwer ma oa ki i tekwaro pa lukamfiri.
Halloween. Buk me The Encyclopedia Americana waco ni: “Jami mogo ma kubbe ki kwer me Halloween oa ki i kwer mo macon ma kato wa kare pa Lukricitayo woko ma kilwongo ni Druid [tic pa lulam dog mogo macon me Celtic]. Jo me Celtic onongo gibedo ki karama mogo pi lubange ariyo madongo—lubanga me ceng ki lubanga pa jo ma oto (ma kilwongo ni Samhain) ma onongo kikwero i nino dwe 1 me Dwe me Aparacel, ma bedo acakki me Mwaka Manyen pa jo Celtic. Mot mot, kilutu kwer pi jo ma oto man i kwer pa Lukricitayo.”
Nino Madongo Mukene-ni. Pe twere me lok i kom kwer ducu ma kikwero i lobo ducu. Ento, kwer ma keto deyo i kom dano nyo dul mogo pe rwatte bot Jehovah. (Jeremia 17:5-7; Tic pa Lukwena 10:25, 26) Pe wi owil bene ni ka ma kwer me dini moni oa ki iye weko Lubanga cwako nyo pe. (Icaya 52:11; Niyabo 18:4) Cik ma iye lac me Baibul ma kiloko iye i Dul me 16 me buk man bikonyi me ngeyo tam pa Lubanga i kom kwero nino madongo ma pe obedo me dini.
