Sheol ki Hades Gubedo Gin Ango?

ILEB ma kicako coyo kwede Baibul, kitiyo ki nyig lok sheʼohlʹ i leb Ibru ki haiʹdes i leb Grik tyen ma kato 70 kulu. Nyig lok aryo-ni ducu gikubbe ki lok i kom to. Lugony Baibul mogo gugonyo lok aryo magi ni “lyel,” “kapiny,” nyo “bur.” Ento kono, leb mapol pe gitye ki nyig lok ma rom aroma nitap ki nyig lok me Ibru ki Grik-ki magi. Pi meno New World Translation tiyo ki “Sheol” ki “Hades” Kikome. Dong nyig lok magi mono tyen-gi tye ningo? Kong wanenu kit ma kitiyo kwedgi i kabedo mapat pat ma tye i Baibul.

Latitlok 9:10, (NW) waco ni “Tic nyo tam nyo ngec nyo ryeko mo dong pe i Sheol, kabedo ma in ibicito iye.” Man mono tyene ni Sheol obedo bur lyel acel moni, nyo bur lyel ki acel acel, ka ma gwok nyo wayiko iye ngat mo ma wamaro? Pe. Ka Baibul loko pi ka ma kiyiko iye lyel acel mo, nyo bur lyel acel mo, ci tiyo ki nyig lok me leb Ibru ki Grik mukene, ento pe sheʼohlʹ ki haiʹdes. (Acakki 23:7-9; Matayo 28:1) Dok bene, Baibul pe tiyo ki nyig lok “Sheol” i kom ka ma kiyiko iye dano mapol, calo kabedo me yik pa jo me paco moni, nyo i bur ma kitoro iye dano mapol.​—Acakki 49:30, 31.

“Sheol” kono dong obedo kabedo ma nining? Lok pa Lubanga nyuto ni “Sheol” nyo “Hades,” gubedo gin ma dok kato wa twon bur ma kiyiko iye dano lumuku. Me labolle, Icaya 5:14 (NW) waco ni Sheol “oyabo doge malac ma okato kare.” Kadi bed ni Sheol dong otyeko mwonyo jo muto ma pe kwane, ento pud nongo ni pe romo. (Carolok 30:15, 16) Pat dok ki ka ma kiyiko iye yik mo keken, pien twero pong woko, ento ‘Sheol pe twero yeng.’ (Carolok 27:20) Sheol pe twero pong. Pi meno Sheol, nyo Hades, pe obedo kabedo ma tye ada i kabedo mo. Kono do, obedo lyel pa dano, gin ma cung pi kabedo ma pol pa dano ma guto gitye ka nino iye.

Pwony me Baibul i kom nicer konyowa me niang matut i kom tyen lok me “Sheol” ki “Hades.” Lok pa Lubanga kubu  Sheol kacel ki Hades, ki to ma kibedo iye ki gen me nicer. * (Yubu 14:13; Tic pa Lukwena 2:31; Niyabo 20:13) Lok pa Lubanga bene nyuto ni jo ma tye i Sheol, nyo Hades, pe obedo jo ma gutiyo pi Jehovah keken ento kadi wa jo ma pe gutiyo pi en bene. (Acakki 37:35; Jabuli 55:15) Pi meno, Baibul pwonyo ni cer bibedo pi “jo ma kitgi atir wa ki jo ma kitgi pe atir.”​—Tic pa Lukwena 24:15.

[Lok ma tye piny]