Dul me Apar Wiye Abongwen

Wubed i Mar pa Lubanga

Maro Lubanga tyen lokke ngo?

Wacako Bedo i mar pa Lubanga nining?

I yo ango ma Jehovah bimiyo kwede bakacic bot jo ma gimarre?

1, 2. Kombeddi watwero nongo kagwokke maber ki kwene?

GO KONG ni itye ka wot i yo gudo i nino mo ma kot nen calo mito cwe. Pe ocwalo kare malac te polo ocako ciddo woko, piny ocako meny kun woto ki mor matek, kot ocako cwe ki yamo magwa. In icako ngwec me yenyo ka gwokke. Ma peya icito ka mabor, itugi neno ot mo ma tye cok ki nget gudo ma nen ber adada. Cwinyi pud dong obipwoyo ya!

² Wan watye ka kwo i kare marac calo nino me kot-ti. Kwo i lobo tye ka balle medde ameda. Ento tye kalarre mo maber adada. Kabedo mo ma twero gwokowa maber ki i peko mogo ma twero balo kwowa pi nakanaka. Kagwokkene obedo gin ango? Niang maber i kom gin ma Baibul pwonyo ni: ‘Abiwaco bot Jehovah ni: In aye ka kagwokkena ki cella ki Lubangana ma ageno.’​—Jabuli 91:2.

3. Watwero keto Jehovah bedo kagwokkewa nining?

³ Tam kong lok meno! Jehovah ma obedo Lacwec dok Laloc me polo ki lobo-ni, kara  twero bedo kagwokkewa. En twero gwokowa maber, pien en tek loyo kit dano mo, nyo gin mo keken ma twero yelowa. Kadi bed gin mo marac otimme, Jehovah pud twero yubone woko. I yo ango dong ma wan watwero keto Jehovah calo kalarewa? Omyero waket genwa i kome. Medo i kom meno, Lok pa Lubanga cuko cwinywa ni: “Wugwokke kenwu i mar pa Lubanga.” (Juda 21) Ada, omyero wabed i mar pa Lubanga, kun wagwoko watwa ki Wonwa me polo. Man bimiyo wabedo labongo akalakala ni en aye kalarewa. Ento wan watwero moko kit wat meno nining?

NGE DOK IJOL MAR PA LUBANGA

4, 5. Yo ango ma Jehovah nyuto kwede marre piwa?

⁴ Me bedo i mar pa Lubanga, omyero wanyut pwoc i kom kit ma Jehovah onyuto kwede mar i komwa. Tam kong i kom lok me pwony mogo me Baibul ma in inongo ki i kwano buk man. Macalo Lacwec, Jehovah omiyo botwa lobo macalo pacowa mamwonya. En oketo jami calo cam, pii, lee mogo ma nenogi mit, kabedo mogo ma nenone mwonya ki mukene mapol. Kit macalo en aye omiyo kicoyo Baibul-li, Lubanga otito kite botwa i iye. Dok bene Lokke tito botwa ni en ocwalo Wode me amara Yecu i lobo, wek olim can ka dok oto piwa. (Jon 3:16) Dong ngo maber ma wanongo ki i mic meno? Miniwa gen me kwo me anyim ma mwonya.

⁵ Genwa me anyim bene dok cung i kom gin mukene mapat ma Lubanga otimo. Jehovah otyeko keto gamentene i polo, ma en aye Ker pa Meciya. Ker man dong cok ki giko kumo ka dong biyubo lobo doko paradic. Tam kong! Wabibedo kunnu ki kuc dok ki yomcwiny pi nakanaka. (Jabuli 37:29) Lubanga bene opwonyowa kit me kwo maber i kom kareni. En bene omiyo botwa mic me lega, oyabo yo ma twolo botwa me lok kwede. Magi gubedo yo mogo macego ma Jehovah nyuto kwede mar pi dano ducu ki pi in bene.

6. In dong ibitimo gin ango pi mar ma Jehovah onyuto piri?

⁶ Lapeny ma pire tek ma myero ipenye kwede tye ni:  An mono abitimo ngo pi mar pa Jehovah-ni? Jo mukene giwaco-ni, “An bene omyero amar Jehovah do.” Man mono aye kit ma in iwinyo kwede? Yecu owaco ni cik man aye dong cik madit kato ducu: ‘Mar Jehovah Lubangani ki cwinyi ducu, ki tammi ducu.’ (Matayo 22:37) Ngene kene ni itye ki tyen lok mapol me maro Lubanga Jehovah. Ento winyo ni imaro Jehovah ki cwinyi ducu, ki kwoni ducu, dok ki tammi ducu mono romo?

7. Mar pi Lubanga mono obedo gin ma wawinyo ki i cwinywa keken? Tit kong.

⁷ Kit macalo Baibul otito, maro Lubanga pe obedo gin ma wawinyo awinya ki i cwinywa keken. Adada, winyo ni cwinyi maro Jehovah obedo gin mapire tek, ento meno pud obedo gin me acakki me maro en. Nyig yat apple obedo gin mapire tek me pito yat me apple. Ento ka onongo itye ka mito kom apple ci ngat mo omini nyige calo ma i cal-li kono? Pe cobo mitini! Meno bene rom aroma ki winyo ni imaro Lubanga Jehovah, meno pud obedo acakki. Baibul pwonyo ni: “Pien maro Lubanga en aye gwoko cikke. Dok cikke pe nurowa.” (1 Jon 5:3) Wek marwa pi Lubanga obedo mar kikome, omyero bene wanyut i tic.​—Matayo 7:16-20.

8, 9. Yo ango ma watwero nyuto kwede marwa ki pwocwa bot Lubanga?

⁸ Wanyuto marwa pi Lubanga ki lubo cikke ki bene keto cikke ma igi lac i tic. Pe obed gin ma timone dok tek tutwal. Lubo cikke pe obed gin ma pek, cik pa Jehovah kiketo me konywa wek wabed maber ki yomcwiny ma nongo wayeng ki kwo. (Icaya 48:17, 18) Ka wakwo ma lubbe ki tela pa Jehovah, nongo wanyuto bot Wonwa ma tye i polo ni wan ada wapwoyo jami ducu ma en tye ka timone piwa. Lok marac tye kono ni jo manok keken i lobo kombeddi aye ginyuto  pwoc ma kit man. Pe wamito bedo calo dano ma pe ginyuto pwoc, calo dano ma gukwo i kare ma Yecu onongo pud tye i lobo. Yecu ocango ludobo apar, ento acel keken aye odwogo cen ka pwoyo en. (Luka 17:12-17) Adada, mito wabedu calo dano acel ca ma onyuto pwoc-ci, ento pe calo jo abongwen ma pe gunyuto pwoc-ci!

⁹ Dong cik pa Jehovah mene ma mito walubi? Watyeko nyamo kop mogo mapol i buk man, ento kong dok wanenu mogo wiye wiye. Lubo cik pa Lubanga bikonyowa me bedo i mar pa Lubanga.

MEDDE KI NYIKO COK BOT JEHOVAH

10. Tit kong gin mumiyo pire tek mada me medde ki nongo ngec i kom Lubanga Jehovah.

¹⁰ Pwonyo lok i kom Jehovah obedo gin ma pire tek mada me nyiko cok bote. Pe omyero wawek ocung woko. Ka in ibedo ka oyo mac i nino mo ma piny ngic atika, dok pud ibiye ni mac ma ibako-ni oto woko? Pe. Wek pe iket kwoni ka mading, Ibiyelle matek me bako yen i mac  wek olyet dok omeny piny maleng! Kit macalo yen medo mac, kit meno bene, ‘ryeko pa Lubanga kikome’ gwoko marwa pi Jehovah bedo matek.​—Carolok 2:1-5.

11. Pwony pa Yecu-ni ogudo lulub kore nining?

¹¹ Yecu omito ni jo ma lubo kore gugwok margi pi Jehovah ki pi Lokke ma pire tek-ki me medde ki lyel maber. Inge cerre, Yecu opwonyo lukwenane aryo i kom gin ma ocobbe i kome i lok pa lunebi ma tye i Ginacoya pa jo Ibru. Adwogine obedo nining? Lacen gin dong guwaco ni: “Cwinywa nakanen pe obedo ka pukke, i kare ma en tye ka lok kwedwa i wangayo, kun yabbiwa [G]inacoya?”​—Luka 24:32.

12, 13. (a) Gin ango ma otimme bot dano mapol kombeddi-ni ma dok i kom maro Lubanga kacel ki Baibul? (b) Yo ango ma watwero gwoko kwede marwa pe me kwe?

¹² I kare ma in pud i cako pwonyo Baibul apwonya, jami ma i pwonyo tika cwinyi opukke iye ki yomcwiny, mit kom, ki mar pi Lubanga? Ngene kene ni iwinyo kumeno. Jo mapol bene guwinyo kit meno. Gin ma tye matek kombeddi aye me gwoko mar-ri pe me kwe ento me medde ameda. Pe wamito lubo kit me lobo ma komkare-ni. Yecu otito ni: “Mar pa jo mapol bikwe woko.” (Matayo 24:12) Yo ango ma in iromo tic kwede wek marri pi Jehovah ki pi ada ma tye i Baibul pe okwe woko?

¹³ Bed ka nongo ngec i kom Lubanga Jehovah gin ki Yecu Kricito. (Jon 17:3) Lwod nyo itam matut i kom jami ma ipwonyo ki i Lok pa Lubanga, penye keni ni: ‘Jami magi pwonya gin ango i kom Lubanga Jehovah? Tyen lok ango mukene man miya amaro Lubanga ki cwinya ducu, ki tamma ducu, dok ki koma ducu?’ (1 Temceo 4:15) Lwodo lok kit meno biweko igwoko marri pi Jehovah me bedo ka lyel i cwinyi ma pe to.

14. Lega twero konyowa nining me gwoko mar pi Jehovah wek obed makwo?

¹⁴ Yo mukene ma wan waromo gwoko kwede marwa pi Jehovah me bedo ka lyel maber ma pe to aye obedo lega kare  ducu. (1 Tecalonika 5:17) I Dul me 17 me buk man, waneno ni lega obedo mic ma pire tek ma oa ki bot Lubanga. Kit macalo wat i kin dano dongo ka dano loko i kin-gi kare ki kare, kit meno bene, wat ma watye kwede ki Jehovah bedo matek ka walego bote kare ducu. Dong pire tek ni, pe omyero wabed ka wero legawa awera ki wiwa ma nongo wanwoyo en lega acel-li kare ducu labongo paro pi gin ma waloko. Mito walok bot Jehovah kit macalo latin loko ki wonne me amara. Omyero walok ki woro, ento labongo lworo mo kun nongo legawa a ki i cwinywa. (Jabuli 62:8) Ada gire, kwano Baibul piwa kenwa ki lega ma a ki i cwinywa gubedo yo ma pigi tego me woro, dok gitwero konyowa me bedo i mar pa Lubanga.

NONG YOMCWINY I WORO-NI

15, 16. Pingo omyero wanen tic me tito pi Ker-ri calo mic me deyo?

¹⁵ Kwano Baibul piri keni ki lega obedo yo me woro ma waromo timone piwa kenwa. Kombeddi, kong wanenu yo acel me woro ma watimo i kin lwak: tito pi niyewa bot dano. In mono tika dong inywako lok me ada ma tye i Baibul ki jo mukene? Ka tye kumeno, ci nongo dong itimo tic me deyo atika. (Luka 1:74) Ka wanywako lok me ada ma dong watyeko pwonyone i kom Lubanga Jehovah, nongo watimo tic ma pire tek ma kimiyo bot Lukricitayo me ada ducu​—tic me tito lok me kwena maber me Ker pa Lubanga.​—Matayo 24:14; 28:19, 20.

¹⁶ Lakwena Paulo otero tic me pwony calo gin ma pire tek, ma olwongo ni lonyo madit. (2 Jo Korint 4:7) Tito pi Lubanga Jehovah ki yubbe bot dano obedo tic ma pire tek loyo tic mo keken. Obedo tic pi Ladit mo ma loyowa ma pud dong ber loyo, dok tic ma kelo adwogi maber ma loyo tic mo keken ma watwero timone. Ka watye ka timo man, nongo watye ka konyo jo ma cwinygi mwol me nyikke cok ki Wonwa me polo ki bene nongo, wacako wot i yo ma terowa i kwo ma pe tum! Tic ango mukene ma in itwero timone ma  kelo yomcwiny calo man? Medo i kom meno, nongo pwony i kom Jehovah ki Lokke jingo niyewa dok medo marwa pi en. Jehovah bene pwoyo yellewa. (Jo Ibru 6:10) Bedo ka tiyo tic man konyo in me moko i mar pa Lubanga.​—1 Korint 15:58.

17. Pingo tic me pwony pa Lukricitayo obedo gin ma mitte me oyot mada?

 ¹⁷ Wiwa omyero opo ni tic me tito pi Ker-ri obedo gin me mitte me oyot mada. Baibul owaco ni: ‘tit lok pa Lubanga i kare ma maber ki i kare me peko.’ (2 Temceo 4:2) Pingo tic man mitte pi oyot mada i kare ni? Lok pa Lubanga miyowa lagam ni: ‘Nino madit pa Jehovah tye cok. Dok tye ka bino oyotoyot.’ (Jepania 1:14) Adada, kare ma Jehovah dong bikelo kwede agikki me yub me jami me kare-ni tye ka bino oyotoyot. Mito kicik dano! Omyero gunge ni kare man aye dong obedo kare me ye i kom Jehovah calo Won Twer Ducu. Agikki “tye ka wot oyotoyot mada.”​—Kabakuk 2:3.

18. Pingo omyero wawor Jehovah ki pwonyo dano kun nongo waribbe kacel ki Lukricitayo me ada?

¹⁸ Jehovah mito ni wamiye woro i tic me pwonyo dano kun nongo watiyo kacel ki Lukricitayo me ada. En aye gin ma omiyo lokke waco ni: “Dok bene myero watamu kit macalo watwero tugo kwede cwinywa kekenwa i mar ki i tiyo tic mabeco, kun pe waweko cokke kacel, kit macalo jo mogo dong guloko odoko kitgi-ni, ento myero wacuku cwinywa kekenwa, makatone kit macalo wuneno Nino maca dong tye ka nyiko cok-ki.” (Jo Ibru 10:24, 25) Ka waribbe kacel ki Lukricitayo luwotwa i cokke, wabedo ki kare mamwonya me pako ki woro Lubangawa me amara. Kun bene nongo wajingo kwede cwiny ngat acel acel.

19. Watwero tic matek me jingo mar ma watye kwede me bedo matek i kacokke pa Lukricitayo nining?

¹⁹ Ka waribbe kacel ki luwor Jehovah mukene-ni, ci wajingo mar ki larem ma watye kwede i kacokke. Pire tek mada ka waketo wangwa me neno ber pa ngat acel acel, kit macalo Jehovah keto wange me neno berwa. Omyero watergi calo jo ma pe ki bal. Wi myero opo ni dongo i yo me cwiny tye mapat pat bot jo ducu ki dok bene ni wan ducu wabedo luroc. (Jo Kolocai 3:13) Yeny yo me dongo larem macok ki jo ma gitye ki mar matut pi Jehovah, man biweko i dongo i yo me  cwiny. Ada gire, ribbe kacel ki utmego ki lumego me cwiny bikonyi me bedo i mar pa Lubanga. Yo ango ma Jehovah miyo kwede mot bot jo ma lugen ma giworo en dok weko gibedo i marre?

YELLE MATEK WEK INONG KOM ‘KWO KIKOME’

20, 21. Ngo ma obedo ‘kwo ki kome,’ dok pingo obedo gen mamwonya atika?

²⁰ Jehovah miyo kwo calo mot bot laticce ma lagen, ento en miyo kit kwo ma nining? I ada, in mono dong i tye ma kwo kombeddi? Pol pa wan ducu watwero wacci meno dong ngene kene do. Pien waywe, wacamo, dok wamato. Meno nyuto ni watye ma kwo. I cawa ma nongo cwinywa yom watwero waco ni, “Man aye kom kwo kikome!” Ento, Baibul nyuto ni, ka ni kilok lok ada ci nongo pe tye dano mo ma tye makwo i kareni.

²¹ Lok pa Lubanga cuko cwinywa ‘me yelle matek wek wanong kwo ma en aye kwo kikome.’ (1 Temceo 6:19) Lok magi nyuto ni ‘kwo kikome-ni’ obedo kwo ma watwero bedo ki gen me limone i anyim. I kare ma nongo dong wa pe ki roc mo, wabibedo ki kwo kit macalo kitito-ni kikome, pi meno wabikwo kit macalo Lubanga onongo oyubo i acakki. I nino ma wabikwo i lobo i paradic ki yot kom, kuc wa ki yomcwiny, en aye nongo dong watye i ‘kwo kikome’​—kwo ma pe tum. (1 Temceo 6:12) Meno mono pe obedo gen ma mamwonya atika?

22. Itwero ‘nongo kom kwo ma en aye kwo kikome nining’?

²² Dong watwero nongo kom kwo ma ‘en kwo kikome ni nining’? I kabedo acel-li, Paulo olego Lukricitayo ni “guti tic mabeco, gubed lulonyo i timo ber bot dano, i poko jami, ki i miyo mot ki yomcwiny.” (1 Temceo 6:18) Nen dong atir ka maleng, ni dit me tic dong ocung i kit ma watiyo kwede ki niye ma wapwonyo ki i Baibul-li. Ento mono Paulo onongo tye ka wacci ‘kwo kikome’ nonge pi tiyo tic mabeco? Pe, mic mamwonya me kwo macalo meno gire cungo i ‘kica ma pe  wapore pire’ ma a ki bot Lubanga. (Jo Roma 5:15) Pi meno, Jehovah tye ki mitti me miyo mot bot jo ma gitiyo pire ki niye. En mito ni in bene ibed i ‘kwo kikome.’ Kwo me kuc ki me yom cwiny, pi nakanaka tye anyim pi jo ma gimoko i mar pa Lubanga.

23. Pingo pire tek me bedo i mar pa Lubanga?

²³ Wan ducu ki acel acel omyero wapenye kong kenwa ni, ‘Tika ada an atye ka woro Lubanga ma lubbe ki yo ma en oketogi i Baibul?’ Ka wabedo ka ngine, nino ducu, ento wanongo ni tye kumeno, ci nongo watye ka lubo yo me kwo matir. Omyero wabedo ki gen ni Jehovah aye obedo kalarewa. En bigwoko jone ma lugen ki i peko me kare me agikki me yub man ducu maber labongo awano mo. Jehovah bene bimiyowa kwo i yub me jami manyen ma tye cok mada-ni. Cwinywa bibedo yom me bedo i kare meno tutwal! Cwinywa bibedo yom i komwa kekenwa pi kwanyo yo matir i kare me agikki pud dong ya! Ka itimo man i kare ni, ci ibinongo ‘kom kwo kikome,’ ma en aye obedo kwo kit ma Lubanga Jehovah mito ni ibed kwede pi nakanaka!

GIN MA BAIBUL PWONYO

▪ Wanyuto mar me ada pi Lubanga ki lubo cikke ki dok keto cikke ma igi lac i tic.​—1 Jon 5:3.

▪ Kwano Lok pa Lubanga, lega bot Jehovah ki cwinywa ducu, pwonyo lokke bot jo mukene, ki woro en i kacokke pa Lukricitayo bikonyowa me bedo i mar pa Lubanga.​—Matayo 24:14; 28:19, 20; Jon 17:3; 1 Tecalonika 5:17; Jo Ibru 10:24, 25.

▪ Jo ma bedo i mar pa Lubanga gitye ki gen me nongo ‘kwo kikome.’​—1 Temceo 6:12, 19; Juda 21.

[Peny me Kwan]

[Cal ma tye i pot karatac 184]

Tika ibiweko Jehovah bedo kalareni i kare man marac calo kare me kot ki yamomagwa-ni?

[Cal ma tye i pot karatac 187]

Marri pi Jehovah kiporo ki yen ma weko mac bedo ka lyel

[Cal ma tye i pot karatac 190]

Jehovah mito ni in inong kom ‘kwo kikome.’ Tika ibilimone?